ਦੇਹਰਾਦੂਨ, 18 ਸਤੰਬਰ- ਉਤਰਾਖ਼ੰਡ ਦੇ ਚਮੋਲੀ ਵਿਚ ਨੰਦਾਨਗਰ ਨਗਰ ਪੰਚਾਇਤ ਦੇ ਕੁੰਤਰੀ ਲਾਗਾਫਲੀ ਵਾਰਡ ਵਿਖੇ ਬੱਦਲ ਫਟਣ ਕਾਰਨ ਛੇ ਇਮਾਰਤਾਂ ਮਲਬੇ ਕਾਰਨ ਪੂਰੀ ਤਰ੍ਹਾਂ ਨੁਕਸਾਨੀਆਂ ਗਈਆਂ। ਇਸ ਵਿਚ ਸੱਤ ਲੋਕ ਲਾਪਤਾ ਹਨ ਅਤੇ ਦੋ ਨੂੰ ਬਚਾ ਲਿਆ ਗਿਆ ਹੈ। ਰਾਹਤ ਅਤੇ ਬਚਾਅ ਕਾਰਜ ਜਾਰੀ ਹਨ। ਇਸ ਦੇ ਨਾਲ ਹੀ ਧੁਰਮਾ ਪਿੰਡ ਵਿਚ ਵੀ ਭਾਰੀ ਬਾਰਸ਼ ਨੇ ਘਰਾਂ ਨੂੰ ਨੁਕਸਾਨ ਪਹੁੰਚਾਇਆ। ਇਸ ਦੌਰਾਨ ਦੇਹਰਾਦੂਨ ਜ਼ਿਲ੍ਹੇ ਦੇ ਸਾਰੇ ਸਕੂਲ ਅਤੇ ਆਂਗਣਵਾੜੀ ਕੇਂਦਰਾਂ ਨੂੰ ਅੱਜ ਬੰਦ ਰੱਖਣ ਦੇ ਹੁਕਮ ਦਿੱਤੇ ਗਏ ਹਨ।
ਚਮੋਲੀ ਦੇ ਜ਼ਿਲ੍ਹਾ ਮੈਜਿਸਟ੍ਰੇਟ ਸੰਦੀਪ ਤਿਵਾੜੀ ਨੇ ਦੱਸਿਆ ਕਿ ਬੁੱਧਵਾਰ ਰਾਤ ਨੂੰ ਚਮੋਲੀ ਜ਼ਿਲ੍ਹੇ ਦੇ ਨੰਦਾਨਗਰ ਘਾਟ ਖੇਤਰ ਵਿਚ ਬੱਦਲ ਫਟਣ ਨਾਲ ਵੱਡਾ ਨੁਕਸਾਨ ਹੋਇਆ ਹੈ। ਨੰਦਾਨਗਰ ਦੇ ਕੁੰਤਰੀ ਲਾਗਾਫਲੀ ਵਾਰਡ ਵਿਚ ਛੇ ਘਰ ਮਲਬੇ ਹੇਠ ਦੱਬ ਗਏ। ਇਕ ਐਸ.ਡੀ.ਆਰ.ਐਫ਼. ਟੀਮ ਨੰਦਪ੍ਰਯਾਗ ਪਹੁੰਚ ਗਈ ਹੈ ਅਤੇ ਐਨ.ਡੀ.ਆਰ.ਐਫ਼. ਵੀ ਗੋਚਰ ਤੋਂ ਨੰਦਪ੍ਰਯਾਗ ਲਈ ਰਵਾਨਾ ਹੋ ਗਈ ਹੈ। ਸੀ.ਐਮ.ਓ. ਨੇ ਦੱਸਿਆ ਕਿ ਇਕ ਮੈਡੀਕਲ ਟੀਮ ਅਤੇ ਤਿੰਨ 108 ਐਂਬੂਲੈਂਸਾਂ ਨੂੰ ਘਟਨਾ ਸਥਾਨ ’ਤੇ ਭੇਜਿਆ ਗਿਆ ਹੈ। ਨੰਦਨਗਰ ਤਹਿਸੀਲ ਦੇ ਧੁਰਮਾ ਪਿੰਡ ਵਿਚ ਭਾਰੀ ਬਾਰਿਸ਼ ਨੇ 4-5 ਇਮਾਰਤਾਂ ਨੂੰ ਨੁਕਸਾਨ ਪਹੁੰਚਾਉਣ ਦੀ ਵੀ ਰਿਪੋਰਟ ਦਿੱਤੀ ਹੈ। ਇਹ ਰਾਹਤ ਦੀ ਗੱਲ ਹੈ ਕਿ ਕੋਈ ਜਾਨੀ ਨੁਕਸਾਨ ਨਹੀਂ ਹੋਇਆ। ਮੋਕਸ਼ ਨਦੀ ਦੇ ਪਾਣੀ ਦਾ ਪੱਧਰ ਵਧ ਗਿਆ ਹੈ।
