ਨਵੀਂ ਦਿੱਲੀ, 17 ਜੂਨ- ਅਰਜਨਟੀਨਾ ਦੇ ਸਟਾਰ ਫੁੱਟਬਾਲਰ ਲਿਓਨਲ ਮੇਸੀ ਨੇ ਅੱਜ ਆਪਣੀ ਪਹਿਲੀ ਵਿਸ਼ਵ ਕੱਪ ਹੈਟ੍ਰਿਕ ਬਣਾਈ। ਇਹ ਮੌਜੂਦਾ ਵਿਸ਼ਵ ਕੱਪ ਦੀ ਪਹਿਲੀ ਹੈਟ੍ਰਿਕ ਵੀ ਹੈ। ਮੈਸੀ ਦੀ ਹੈਟ੍ਰਿਕ ਇਕ ਖਾਸ ਮੌਕੇ 'ਤੇ ਆਈ ਹੈ। ਉਨ੍ਹਾਂ ਨੇ ਅੱਜ ਦੇ ਦਿਨ 17 ਜੂਨ, 2006 ਨੂੰ ਆਪਣਾ ਪਹਿਲਾ ਫ਼ੀਫਾ ਵਿਸ਼ਵ ਕੱਪ ਮੈਚ ਖੇਡਿਆ ਸੀ।
38 ਸਾਲਾ ਮੈਸੀ ਨੇ 17ਵੇਂ, 60ਵੇਂ ਅਤੇ 76ਵੇਂ ਮਿੰਟ ਵਿਚ ਗੋਲ ਕੀਤੇ। ਉਹ 78 ਮਿੰਟ ਦੀ ਖੇਡ ਤੋਂ ਬਾਅਦ ਮੈਦਾਨ ਛੱਡ ਕੇ ਚਲੇ ਗਏ। ਕੈਨਸਸ ਸਿਟੀ ਦੇ ਐਰੋਹੈੱਡ ਸਟੇਡੀਅਮ ਵਿਚ ਮੈਸੀ ਦੇ ਸ਼ਕਤੀਸ਼ਾਲੀ ਪ੍ਰਦਰਸ਼ਨ ਨੇ ਅਰਜਨਟੀਨਾ ਨੂੰ ਗਰੁੱਪ ਜੇ ਮੈਚ ਵਿਚ ਅਲਜੀਰੀਆ ਨੂੰ 3-0 ਨਾਲ ਹਰਾਉਣ ਵਿਚ ਮਦਦ ਕੀਤੀ। ਮੈਸੀ ਨੇ ਹੁਣ ਤੱਕ 11 ਅੰਤਰਰਾਸ਼ਟਰੀ ਹੈਟ੍ਰਿਕ ਲਗਾਏ ਹਨ।
ਇਸ ਜਿੱਤ ਨਾਲ ਅਰਜਨਟੀਨਾ ਗਰੁੱਪ ਜੇ ਪੁਆਇੰਟ ਟੇਬਲ ਵਿਚ ਸਿਖਰ 'ਤੇ ਹੈ। ਅਰਜਨਟੀਨਾ ਹੁਣ 22 ਜੂਨ ਨੂੰ ਆਪਣੇ ਅਗਲੇ ਗਰੁੱਪ ਮੈਚ ਵਿਚ ਆਸਟਰੀਆ ਦਾ ਸਾਹਮਣਾ ਕਰੇਗਾ। ਅਲਜੀਰੀਆ ਆਪਣੇ ਅਗਲੇ ਮੈਚ ਵਿਚ ਜੌਰਡਨ ਦਾ ਸਾਹਮਣਾ ਕਰੇਗਾ।
ਦੱਸ ਦੇਈਏ ਕਿ ਮੈਸੀ ਨੇ ਟੂਰਨਾਮੈਂਟ ਦੇ ਇਤਿਹਾਸ ਵਿਚ ਸਭ ਤੋਂ ਵੱਧ ਗੋਲ ਕਰਨ ਦੇ ਰਿਕਾਰਡ ਦੀ ਬਰਾਬਰੀ ਕਰ ਲਈ ਹੈ। ਹੁਣ ਉਸ ਦੇ 16 ਗੋਲ ਹੋ ਗਏ ਹਨ।
ਮੈਸੀ ਪੰਜ ਵੱਖ-ਵੱਖ ਵਿਸ਼ਵ ਕੱਪਾਂ ਵਿਚ ਗੋਲ ਕਰਨ ਵਾਲੇ ਦੁਨੀਆ ਦੇ ਦੂਜੇ ਫੁੱਟਬਾਲਰ ਬਣ ਗਏ ਹਨ। ਉਸ ਤੋਂ ਪਹਿਲਾਂ ਪੁਰਤਗਾਲ ਦੇ ਕ੍ਰਿਸਟੀਆਨੋ ਰੋਨਾਲਡੋ ਦੇ ਨਾਂਅ ਇਹ ਰਿਕਾਰਡ ਸੀ।
