ਆਪ੍ਰੇਸ਼ਨ ਬਲੈਕ ਥੰਡਰ-1 ਦੀ ਅਗਵਾਈ ਕਰਨ ਵਾਲੇ ਪਹਿਲੇ ਐਨ.ਐਸ.ਜੀ. ਮੁਖੀ ਦਾ ਦਿਹਾਂਤ

ਨਵੀਂ ਦਿੱਲੀ, 26 ਜੁਲਾਈ (ਪੀਟੀਆਈ) ਆਰ.ਟੀ. ਨਾਗਰਾਨੀ, ਜਿਸ ਨੇ 1986 ਵਿਚ ਅੰਮ੍ਰਿਤਸਰ ਦੇ ਹਰਿਮੰਦਰ ਸਾਹਿਬ ਤੋਂ ਹਥਿਆਰਬੰਦ ਖਾੜਕੂਆਂ ਨੂੰ ਬਾਹਰ ਕੱਢਣ ਲਈ ਐਲੀਟ ਨੈਸ਼ਨਲ ਸਕਿਓਰਿਟੀ ਗਾਰਡ ਦੇ ਪਹਿਲੇ ਮੁਖੀ ਵਜੋਂ ਆਪ੍ਰੇਸ਼ਨ ਬਲੈਕ ਥੰਡਰ-1 ਦੀ ਅਗਵਾਈ ਕੀਤੀ ਸੀ, ਦਾ 98 ਸਾਲ ਦੀ ਉਮਰ ’ਚ ਦੱਖਣੀ ਦਿੱਲੀ ਸਥਿਤ ਆਪਣੇ ਘਰ ਵਿਚ ਦਿਹਾਂਤ ਹੋ ਗਿਆ । ਨਾਗਰਾਨੀ ਆਂਧਰਾ ਪ੍ਰਦੇਸ਼ ਕੇਡਰ ਤੋਂ ਭਾਰਤੀ ਪੁਲਿਸ ਸੇਵਾ (ਆਈ.ਪੀ.ਐਸ.) ਦੇ 1951 ਬੈਚ ਦੇ ਅਧਿਕਾਰੀ ਸਨ । ਉਨ੍ਹਾਂ ਨੇ 17 ਅਗਸਤ, 1984 ਤੋਂ 25 ਸਤੰਬਰ, 1986 ਤੱਕ ‘ਬਲੈਕ ਕੈਟਸ’ ਕਮਾਂਡੋ ਫੋਰਸ ਦੀ ਅਗਵਾਈ ਕੀਤੀ । ਆਪ੍ਰੇਸ਼ਨ ਬਲੈਕ ਥੰਡਰ-1 30 ਅਪ੍ਰੈਲ, 1986 ਦੀ ਰਾਤ ਨੂੰ ਹਰਿਮੰਦਰ ਸਾਹਿਬ ਕੰਪਲੈਕਸ ਤੋਂ ਸ਼ੁਰੂ ਹੋਇਆ ਸੀ ਤੇ ਅਗਲੇ ਦਿਨ ਤੜਕੇ ਤੱਕ ਚੱਲਿਆ । ਸਾਰਾ ਆਪ੍ਰੇਸ਼ਨ ਫੌਜੀਆਂ ਦੁਆਰਾ ਨੰਗੇ ਪੈਰੀਂ ਸਿਰ ਢੱਕ ਕੇ ਕੀਤਾ ਗਿਆ ਸੀ ਤੇ ਹਰਿਮੰਦਰ ਸਾਹਿਬ ਦੀ ਪਵਿੱਤਰਤਾ ਨੂੰ ਬਣਾਈ ਰੱਖਣ ਲਈ ਕੋਈ ਵੀ ਦਰਬਾਰ ਸਾਹਿਬ ਵਿਚ ਦਾਖਲ ਨਹੀਂ ਹੋਇਆ । ਆਪ੍ਰੇਸ਼ਨ ਦੌਰਾਨ ਕੋਈ ਵੀ ਜਾਨੀ ਮਾਲੀ ਨੁਕਸਾਨ ਨਹੀਂ ਹੋਇਆ ਤੇ ਫੌਜੀਆਂ ਨੇ 122 ਸ਼ੱਕੀ ਕਰਮਚਾਰੀਆਂ ਨੂੰ ਗ੍ਰਿਫਤਾਰ ਕੀਤਾ । ਨਾਗਰਾਨੀ 1987 ਵਿਚ ਸੇਵਾਮੁਕਤ ਹੋਏ ਸਨ ।