ਬਾਬਾ ਫ਼ਰੀਦ ਮੈਡੀਕਲ ਯੂਨੀਵਰਸਿਟੀ ਨੇ ਡਬਲ ਡੋਮੀਸਾਈਲ ਵਾਲੇ 25 ਉਮੀਦਵਾਰਾਂ ਦਾ ਐਮਬੀਬੀਐਸ ਦਾਖ਼ਲਾ ਰੋਕਿਆ

ਫ਼ਰੀਦਕੋਟ, 2 ਸਤੰਬਰ (ਜਸਵੰਤ ਸਿੰਘ ਪੁਰਬਾ) - ਬਾਬਾ ਫ਼ਰੀਦ ਯੂਨੀਵਰਸਿਟੀ ਆਫ ਹੈਲਥ ਸਾਇੰਸਿਜ਼, ਫ਼ਰੀਦਕੋਟ ਵਲੋਂ ਪੰਜਾਬ ਵਿਚ 25 ਉਮੀਦਵਾਰਾਂ ਦਾ ਐਮਬੀਬੀਐਸ ਵਿਚ ਦਾਖ਼ਲਾ ਰੋਕ ਦਿੱਤਾ ਗਿਆ ਹੈ। ਯੂਨੀਵਰਸਿਟੀ ਨੇ ਇਹ ਕਾਰਵਾਈ ਡਬਲ ਡੋਮੀਸਾਈਲ ਕਰਕੇ ਕੀਤੀ। ਯੂਨੀਵਰਸਿਟੀ ਅਧਿਕਾਰੀਆਂ ਅਨੁਸਾਰ 85% ਪੰਜਾਬ ਸਟੇਟ ਕੋਟੇ ਲਈ ਅਰਜ਼ੀਆਂ ਦੀ ਜਾਂਚ ਦੌਰਾਨ ਨਿਯਮਾਂ ਦੀ ਇਹ ਉਲੰਘਣਾ ਸਾਹਮਣੇ ਆਈ। ਬਾਬਾ ਫ਼ਰੀਦ ਯੂਨੀਵਰਸਿਟੀ ਆਫ ਹੈਲਥ ਸਾਇੰਸਿਜ਼, ਫ਼ਰੀਦਕੋਟ ਵਲੋਂ ਐਮਬੀਬੀਐਸ ਦੇ 85% ਸਟੇਟ ਕੋਟਾ ਸੀਟਾਂ ਲਈ 25 ਉਮੀਦਵਾਰਾਂ ਦੇ ਖ਼ਿਲਾਫ਼ ਕਾਰਵਾਈ ਕੀਤੀ ਹੈ। ਇਨ੍ਹਾਂ ਉਮੀਦਵਾਰਾਂ ਨੇ ਮੈਡੀਕਲ ਵਿਚ ਦਾਖ਼ਲਾ ਲੈਣ ਲਈ ਪੰਜਾਬ ਦੇ ਡੋਮੀਸਾਈਲ ਸਰਟੀਫ਼ਿਕੇਟ ਲਗਾਏ ਸਨ। ਪਰ ਉਮੀਦਵਾਰਾਂ ਨੇ ਹੋਰ ਰਾਜਾਂ ਵਿਚ ਵੀ ਦਾਖ਼ਲਾ ਲੈਣ ਲਈ ਆਪਣੇ ਡੋਮੀਸਾਈਲ ਉਨ੍ਹਾਂ ਰਾਜਾਂ  ਦੇ ਲਗਾਏ ਸਨ। ਜਿਨ੍ਹਾਂ 25 ਉਮੀਦਵਾਰਾਂ ਦਾ ਐਮਬੀਬੀਐਸ ਵਿਚ ਦਾਖ਼ਲਾ ਰੋਕਿਆ ਗਿਆ ਹੈ, ਉਨ੍ਹਾਂ ਵਿਚ ਚੰਡੀਗੜ੍ਹ ਦੇ 8, ਕਰਨਾਟਕ ਦੇ 5, ਹਿਮਾਚਲ ਪ੍ਰਦੇਸ਼ ਦੇ 3, ਅਸਾਮ ਦਾ 1, ਤੇਲਗਾਨਾ ਦਾ 1, ਜੰਮੂ ਕਸ਼ਮੀਰ ਦਾ 1, ਤਾਮਿਲਨਾਡੂ ਦਾ 1, ਮਹਾਰਾਸ਼ਟਰਾ ਦਾ 1 ਸ਼ਾਮਿਲ ਹਨ। ਯੂਨੀਵਰਸਿਟੀ ਨੇ ਇਹ ਕਾਰਵਾਈ ਪੰਜਾਬ ਸਰਕਾਰ ਦੀ 10 ਜੁਲਾਈ ਦੀ ਆਦਰਸ਼ ਸੂਚਨਾ ਦੇ ਕਲੌਜ਼ 18 ਤਹਿਤ ਕੀਤੀ ਹੈ। ਇਸ ਨਿਯਮ ਅਨੁਸਾਰ ਪੰਜਾਬ ਸਟੇਟ ਕੋਟਾ ਸੀਟਾਂ ਤਹਿਤ ਦਾਖ਼ਲਾ ਲੈਣ ਲਈ ਨਿਰਧਾਰਤ ਸ਼ਰਤਾਂ ਦੀ ਪਾਲਣਾ ਕਰਨੀ ਲਾਜ਼ਮੀ ਸੀ। ਯੂਨੀਵਰਸਿਟੀ ਨੇ ਦਾਅਵਾ ਕੀਤਾ ਹੈ ਕਿ ਇਨ੍ਹਾਂ ਨਿਯਮਾਂ ਦੀ ਉਲੰਘਣਾ ਕਰਕੇ ਇਨ੍ਹਾਂ 25 ਉਮੀਦਵਾਰਾਂ ਨੂੰ ਸਾਲ 2026-2027 ਦੀਆਂ 85% ਪੰਜਾਬ ਸਟੇਟ ਕੋਟਾ ਸੀਟਾਂ ਦੇ ਦਾਖ਼ਲੇ ਦੀ ਪ੍ਰਕਿਰਿਆ ਵਿਚੋਂ ਬਾਹਰ ਕਰ ਦਿੱਤਾ ਗਿਆ ਹੈ। ਇਸ ਨਿਯਮਾਂ ਤਹਿਤ ਕੋਈ ਵੀ ਉਮੀਦਵਾਰ ਕੇਵਲ ਇਕ ਰਾਜ ਵਿਚ ਹੀ ਕੋਟਾ ਸੀਟ 'ਚ ਦਾਖ਼ਲਾ ਲੈ ਸਕਦਾ ਹੈ। ਯੂਨੀਵਰਸਿਟੀ ਨੇ ਅੱਗੇ ਆਖਿਆ ਕਿ ਇਸ ਤਰ੍ਹਾਂ ਦੇ ਮਾਮਲਿਆਂ ਵਿਚ ਦਸਤਾਵੇਜ਼ਾਂ ਦੀ ਜਾਂਚ ਹੋਰ ਵੀ ਮਹੱਤਵਪੂਰਨ ਬਣ ਜਾਂਦੀ ਹੈ। ਯੂਨੀਵਰਸਿਟੀ ਅਧਿਕਾਰੀਆਂ ਨੇ ਇਸ ਮਾਮਲੇ ਦੀ ਪੁਸ਼ਟੀ ਕਰਦਿਆਂ ਦੱਸਿਆ ਕਿ 25 ਉਮੀਦਵਾਰਾਂ ਵਿਚੋਂ 4 ਉਮੀਦਵਾਰਾਂ ਨੇ ਆਪਣੀਆਂ ਸੀਟਾਂ ਦੂਸਰੇ ਰਾਜਾਂ ਤੋਂ ਛੱਡ ਦਿੱਤੀਆਂ ਹਨ, ਜਿਨ੍ਹਾਂ ਦੇ ਦਾਖਲਿਆਂ 'ਤੇ ਵਿਚਾਰ ਹੋ ਸਕਦਾ ਹੈ।