87 ਸੜਕਾਂ ਬੰਦ, ਹਿਮਾਚਲ ’ਚ ਮੀਂਹ ਦਾ ਦੌਰ 10 ਤੱਕ ਜਾਰੀ ਰਹੇਗਾ-ਮੌਸਮ ਵਿਭਾਗ

ਸ਼ਿਮਲਾ, 4 ਸਤੰਬਰ (ਪੀ.ਟੀ.ਆਈ.)-ਹਿਮਾਚਲ ਪ੍ਰਦੇਸ਼ ਵਿੱਚ ਮੀਂਹ ਤੋਂ ਬਾਅਦ ਕੁੱਲ 87 ਸੜਕਾਂ ਬੰਦ ਹੋ ਗਈਆਂ ਹਨ, ਜਦਕਿ ਸ਼ਿਮਲਾ ਮੌਸਮ ਵਿਭਾਗ ਦਫ਼ਤਰ ਨੇ ਸ਼ੁੱਕਰਵਾਰ ਨੂੰ ਯੈਲੋ ਅਲਰਟ ਜਾਰੀ ਕਰਦਿਆਂ ਸਨਿਚਰਵਾਰ ਨੂੰ ਕਾਂਗੜਾ ਅਤੇ ਸਿਰਮੌਰ ਜ਼ਿਲ੍ਹਿਆਂ ਦੇ ਕੁਝ ਇਲਾਕਿਆਂ ਵਿੱਚ ਹੋਰ ਭਾਰੀ ਮੀਂਹ ਦੀ ਚੇਤਾਵਨੀ ਦਿੱਤੀ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਸੂਬੇ ਦੇ ਕੁਝ ਹਿੱਸਿਆਂ ਵਿੱਚ ਹਲਕੀ ਤੋਂ ਦਰਮਿਆਨੀ ਬਾਰਿਸ਼ ਜਾਰੀ ਰਹੀ। ਸਿਰਮੌਰ ਜ਼ਿਲ੍ਹੇ ਦੇ ਨਾਹਨ ਵਿੱਚ ਵੀਰਵਾਰ ਸ਼ਾਮ ਤੋਂ 67.3 ਮਿਲੀਮੀਟਰ ਮੀਂਹ ਦਰਜ ਕੀਤਾ ਗਿਆ, ਇਸ ਤੋਂ ਬਾਅਦ ਜੋਗਿੰਦਰਨਗਰ (57 ਮਿਲੀਮੀਟਰ), ਨਾਦੌਨ (52.6 ਮਿਲੀਮੀਟਰ) ਅਤੇ ਜੱਟੋਂ ਬੈਰੇਜ ਅਤੇ ਭਰਵਾਈਂ (40-40 ਮਿਲੀਮੀਟਰ), ਧਰਮਸ਼ਾਲਾ (34.4 ਮਿਲੀਮੀਟਰ), ਨੈਨਾ ਦੇਵੀ (34.2 ਮਿਲੀਮੀਟਰ), ਕਟੌਲਾ (26.1 ਮਿਲੀਮੀਟਰ) ਅਤੇ ਨੇਰੀ (20 ਮਿਲੀਮੀਟਰ) ਰਹੇ।ਮੌਸਮ ਦਫ਼ਤਰ ਨੇ ਦੱਸਿਆ ਕਿ ਕਾਂਗੜਾ ਅਤੇ ਸੁੰਦਰਨਗਰ ਵਿੱਚ ਗਰਜ-ਤੂਫ਼ਾਨ ਅਤੇ ਬਿਜਲੀ ਚਮਕਣ ਨਾਲ ਮੀਂਹ ਪਿਆ ਅਤੇ ਸੂਬੇ ਵਿੱਚ 10 ਸਤੰਬਰ ਤੱਕ ਮੀਂਹ ਦਾ ਦੌਰ ਜਾਰੀ ਰਹਿਣ ਦੀ ਭਵਿੱਖਬਾਣੀ ਕੀਤੀ।
ਸਟੇਟ ਐਮਰਜੈਂਸੀ ਆਪਰੇਸ਼ਨ ਸੈਂਟਰ (ਐਸ ਈ ਓ ਸੀ) ਦੇ ਅਨੁਸਾਰ, ਬੰਦ ਹੋਈਆਂ 87 ਸੜਕਾਂ ਵਿੱਚੋਂ ਸਭ ਤੋਂ ਵੱਧ ਸੜਕਾਂ ਮੰਡੀ ਜ਼ਿਲ੍ਹੇ (37) ਵਿੱਚ ਬੰਦ ਹਨ, ਇਸ ਤੋਂ ਬਾਅਦ ਕੁੱਲੂ (22), ਕਾਂਗੜਾ (8), ਚੰਬਾ (5), ਸਿਰਮੌਰ ਅਤੇ ਊਨਾ (4-4), ਸ਼ਿਮਲਾ (3), ਸੋਲਨ (2), ਅਤੇ ਲਾਹੌਲ-ਸਪੀਤੀ ਅਤੇ ਬਿਲਾਸਪੁਰ (1-1) ਹਨ।
ਇਸ ਤੋਂ ਇਲਾਵਾ, 27 ਬਿਜਲੀ ਟਰਾਂਸਫਾਰਮਰ ਅਤੇ 19 ਜਲ ਸਪਲਾਈ ਯੋਜਨਾਵਾਂ ਪ੍ਰਭਾਵਿਤ ਹੋਈਆਂ ਹਨ।ਅਧਿਕਾਰੀਆਂ ਨੇ ਦੱਸਿਆ ਕਿ 30 ਜੂਨ ਨੂੰ ਮਾਨਸੂਨ ਦੀ ਸ਼ੁਰੂਆਤ ਤੋਂ ਲੈ ਕੇ ਹੁਣ ਤੱਕ, ਮੀਂਹ ਨਾਲ ਸਬੰਧਤ ਘਟਨਾਵਾਂ ਵਿੱਚ ਸੂਬੇ ਭਰ ਵਿੱਚ ਘੱਟੋ-ਘੱਟ 108 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ, ਜਦਕਿ ਸੂਬੇ ਨੂੰ 1,237 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ ਹੈ।