ਨਵੀਂ ਦਿੱਲੀ, 4 ਸਤੰਬਰ (ਉਪਮਾ ਡਾਗਾ ਪਾਰਥ)- ਕਾਂਗਰਸੀ ਸੰਸਦੀ ਦਲ ਦੀ ਨੇਤਾ ਸੋਨੀਆ ਗਾਂਧੀ ਦੀ ਆਤਮਕਥਾ ‘ਹਾਰਪਰਕਾਲਿੰਜ਼ ਇੰਡੀਆ’ ਵਲੋਂ ਪ੍ਰਕਾਸ਼ਿਤ ਕੀਤੀ ਜਾਏਗੀ। 28 ਅਗਸਤ ਨੂੰ ‘ਪੇਗੁਈਨ ਰੈਂਡਮ ਹਾਊਸ ਇੰਡੀਆ’ ਵਲੋਂ ਕਿਤਾਬ ਦੇ ਪ੍ਰਕਾਸ਼ਨ ਨੂੰ ਲੈ ਕੇ ‘ਲੇਖਕ ਨਾਲ ਕੁਝ ਗੱਲਾਂ ’ਤੇ ਸਹਿਮਤੀ’ ਨਾ ਬਣਨ ਤੋਂ ਬਾਅਦ ਕਿਤਾਬ ਛਾਪਣ ਤੋਂ ਮਨਾਂ ਕਰਨ ਤੋਂ ਬਾਅਦ ਹੁਣ ਸੋਨੀਆ ਗਾਂਧੀ ਦੀ ਆਤਮ ਕਥਾ ‘ਬਿਲੋਗਿੰਗ ! ਏ ਜਰਨੀ ਆਫ ਲਵ’ 10 ਨਵੰਬਰ ਨੂੰ ‘ਹਾਰਪਰਕਾਲਿੰਜ਼ ਇੰਡੀਆ’ ਵਲੋਂ ਪ੍ਰਕਾਸ਼ਿਤ ਕੀਤਾ ਜਾਏਗਾ। ਇਸ ਕਿਤਾਬ ਨੂੰ ਲੈ ਕੇ ਵਿਵਾਦ ਉਸ ਵੇਲੇ ਸ਼ੁਰੂ ਹੋਇਆ, ਜਦੋਂ ਇਸ ਦਾ ਕਵਰ ਪੇਜ਼ ਵੀ ਜਾਰੀ ਕਰ ਦਿੱਤਾ ਗਿਆ ਸੀ।
ਰਾਹੁਲ ਗਾਂਧੀ ਨੇ ਰਾਜੀਵ ਗਾਂਧੀ ਦੇ ਜਨਮ ਦਿਨ ਮੌਕੇ ਇਕ ਭਾਵੁਕ ਸੰਦੇਸ਼ ਨਾਲ ਕਿਤਾਬ ਦਾ ਕਵਰ ਪੇਜ਼ ਸੋਸ਼ਲ ਮੀਡੀਆ ਮੰਚ ‘ਐਕਸ’ ’ਤੇ ਵੀ ਜਾਰੀ ਕੀਤਾ ਸੀ ਹਲਕਿਆਂ ਮੁਤਾਬਿਕ ਪ੍ਰਕਾਸ਼ਕ ਨੇ ਕਿਤਾਬ ਦੇ ਤਿੰਨ ਅਧਿਆਇਆਂ ’ਤੇ ਇਤਰਾਜ਼ ਪ੍ਰਗਟਾਇਆ ਸੀ, ਜਿਨ੍ਹਾਂ ’ਚ ਇਕ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ’ਤੇ ਆਧਾਰਿਤ ਅਧਿਆਏ ਹੈ। ਕੇਰਲਮ ਦੇ ਮੁਖ ਮੰਤਰੀ ਵੀ.ਡੀ. ਸਤੀਸ਼ਨ ਨੇ ਵਿਵਾਦ ’ਤੇ ਪੈਂਗੁਈਨ ਰੈਡਮ ਹਾਊਸ ਇੰਡੀਆ ਦੀ ਆਲੋਚਨਾ ਕਰਦਿਆਂ ਕਿਹਾ ਸੀ ਕਿ ਜੋ ਪ੍ਰਕਾਸ਼ਕ ਆਪਣੇ ਸਿਧਾਂਤਾਂ ਨਾਲ ਸਮਝੌਤਾ ਕਰਦਾ ਹੈ, ਉਹ ਲੋਕਤੰਤਰ ਨਾਲ ਵੀ ਸਮਝੌਤਾ ਕਰਦਾ ਹੈ।
