ਨਵੀਂ ਦਿੱਲੀ,10 ਨਵੰਬਰ-ਚੀਨੀ ਸੋਸ਼ਲ ਮੀਡੀਆ ਵਲੌਗਰਾਂ ਵੱਲੋਂ ਬੰਗਲਾਦੇਸ਼ ਦੀ ਰਾਜਧਾਨੀ ਢਾਕਾ ਦੇ ਗਰੀਬ ਇਲਾਕਿਆਂ ਦੀਆਂ ਵੀਡੀਓਜ਼ ਬਣਾ ਕੇ ਉਨ੍ਹਾਂ ਨੂੰ ਭਾਰਤ ਦੀ ਰਾਜਧਾਨੀ ਦਿੱਲੀ ਦਾ ਦੱਸਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਮਾਮਲੇ ਨੇ ਨਵਾਂ ਵਿਵਾਦ ਖੜ੍ਹਾ ਕਰ ਦਿੱਤਾ ਹੈ।
ਜਵਾਹਰ ਲਾਲ ਨਹਿਰੂ ਯੂਨੀਵਰਸਿਟੀ (JNU) ਦੇ ਇੱਕ ਪ੍ਰੋਫੈਸਰ ਨੇ ਇਸ ਘਟਨਾ 'ਤੇ ਚਿੰਤਾ ਜ਼ਾਹਰ ਕਰਦਿਆਂ ਕਿਹਾ ਕਿ ਅਜਿਹੀਆਂ ਵੀਡੀਓਜ਼ ਰਾਹੀਂ ਭਾਰਤ ਦੀ ਨਕਾਰਾਤਮਕ ਤਸਵੀਰ ਪੇਸ਼ ਕਰਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
150 ਤੋਂ ਵੱਧ ਚੀਨੀ ਵਲੌਗਰਾਂ ਦੇ ਸ਼ਾਮਲ ਹੋਣ ਦਾ ਦਾਅਵਾ
ਬੰਗਲਾਦੇਸ਼ੀ ਅਖ਼ਬਾਰ 'ਪ੍ਰੋਥਮ ਆਲੋ' ਦੀ ਜਾਂਚ ਮੁਤਾਬਕ, ਲਗਭਗ 150 ਚੀਨੀ ਨਾਗਰਿਕ ਢਾਕਾ ਦੇ ਉੱਤਰਾ ਅਤੇ ਟੇਕਪਾਰਾ ਇਲਾਕਿਆਂ ਵਿੱਚ ਵੀਡੀਓਜ਼ ਬਣਾ ਰਹੇ ਸਨ।
ਇਹ ਲੋਕ ਚੀਨ ਦੇ ਸੋਸ਼ਲ ਮੀਡੀਆ ਪਲੇਟਫਾਰਮਾਂ 'ਤੇ ਲਾਈਵ ਵੀਡੀਓਜ਼ ਦਿਖਾਉਂਦੇ ਸਨ ਅਤੇ ਬੰਗਲਾਦੇਸ਼ ਦੇ ਇਨ੍ਹਾਂ ਇਲਾਕਿਆਂ ਨੂੰ ਨਵੀਂ ਦਿੱਲੀ ਦੱਸਦੇ ਸਨ।
'ਇਹ ਨਵੀਂ ਦਿੱਲੀ ਹੈ' ਕਹਿ ਕੇ ਦਿਖਾਈਆਂ ਢਾਕਾ ਦੀਆਂ ਗਲੀਆਂ
ਰਿਪੋਰਟ ਮੁਤਾਬਕ, ਮਿਆਂਮਿਆਂ ਨਾਂ ਦੀ ਇੱਕ ਚੀਨੀ ਮਹਿਲਾ ਵਲੌਗਰ ਨੇ 1 ਨਵੰਬਰ ਨੂੰ ਢਾਕਾ ਦੇ ਉੱਤਰਾ ਇਲਾਕੇ ਵਿੱਚ ਇੱਕ ਨਹਿਰ ਦੇ ਨੇੜੇ ਲਾਈਵ ਵੀਡੀਓ ਬਣਾਈ।
ਉਸ ਨੇ ਆਪਣੇ ਦਰਸ਼ਕਾਂ ਨੂੰ ਇਹ ਇਲਾਕਾ ਨਵੀਂ ਦਿੱਲੀ ਦੱਸਿਆ ਅਤੇ ਉੱਥੋਂ ਦੇ ਘਰਾਂ ਨੂੰ ਗੰਦੇ ਅਤੇ ਪਛੜੇ ਹੋਏ ਕਿਹਾ।
ਇਸੇ ਤਰ੍ਹਾਂ ਵਾਂਗ ਵੇਈ ਨਾਂ ਦੇ ਇੱਕ ਹੋਰ ਚੀਨੀ ਵਲੌਗਰ ਨੇ ਸਥਾਨਕ ਚਾਹ ਦੀਆਂ ਦੁਕਾਨਾਂ ਦੀ ਵੀਡੀਓ ਬਣਾਉਂਦਿਆਂ ਕਥਿਤ ਤੌਰ 'ਤੇ ਚਾਹ ਬਾਰੇ ਇਤਰਾਜ਼ਯੋਗ ਟਿੱਪਣੀਆਂ ਕੀਤੀਆਂ।
