ਜਗਰਾਉਂ, 31 ਮਈ (ਵਿਨੋਦ ਕੁਮਾਰ)-ਸ਼ਿਵਾਲਿਕ ਮਾਡਲ ਸਕੂਲ ਜਗਰਾਉਂ ਨੇ ਸਮਾਜ ਵਿਚ ਨਸ਼ਿਆਂ ਵਿਰੁੱਧ ਜਾਗਰੂਕਤਾ ਪੈਦਾ ਕਰਨ ਅਤੇ ਵਿਦਿਆਰਥੀਆਂ ਵਿਚ ਸਿਹਤ ਸੰਭਾਲ ਸੰਬੰਧੀ ਜ਼ਿੰਮੇਵਾਰੀ ਜਗਾਉਣ ਲਈ ਇਕ ਜ਼ੋਰਦਾਰ ਕਦਮ ਚੁੱਕਿਆ | ਸਕੂਲ ਵਿਚ ਨਵਾਂ ਥੀਏਟਰ ਕਲੱਬ ਬਣਾਇਆ ਗਿਆ, ਜਿਸ ਅਧੀਨ ਵਿਦਿਆਰਥੀਆਂ ਨੇ ਤੰਬਾਕੂ ਵਿਰੋਧੀ ਦਿਵਸ (31 ਮਈ) ਮੌਕੇ ਨਸ਼ਿਆਂ ਖ਼ਿਲਾਫ਼ ਨੁੱਕੜ ਨਾਟਕ ਪੇਸ਼ ਕੀਤਾ | ਇਸ ਨਾਟਕ ਵਿਚ ਵਿਦਿਆਰਥੀ ਸਹਿਜਪ੍ਰੀਤ ਸਿੰਘ, ਅਰਸ਼ਦੀਪ ਸਿੰਘ, ਏਕਮਪ੍ਰੀਤ ਸਿੰਘ, ਅਰਪਿਤਾ, ਅੰਜਲੀ, ਪ੍ਰਭਜੋਤ, ਦੇਵਨੂਰ, ਕਮਲ ਸਿੰਘ, ਨਿਰਮਲ ਸਿੰਘ, ਕੇਸ਼ਵ ਕਪੂਰ, ਜੋਗਿੰਦਰ ਸਿੰਘ, ਸਵਰਾਜ ਸਿੰਘ ਅਤੇ ਗੁਰਵਿੰਦਰ ਸਿੰਘ ਨੇ ਭਾਗ ਲਿਆ | ਨਾਟਕ ਦੀ ਤਿਆਰੀ ਅਤੇ ਦਿਸ਼ਾ-ਨਿਰਦੇਸ਼ ਮੈਡਮ ਰਸ਼ਮੀ ਧੀਰ ਅਤੇ ਨੈਨਸੀ ਮੈਡਮ ਦੀ ਅਗਵਾਈ ਹੇਠ ਹੋਈ | ਵਿਦਿਆਰਥੀਆਂ ਨੇ ਨਾਟਕ ਰਾਹੀਂ ਦਿਖਾਇਆ ਕਿ ਨਸ਼ਾ ਨਾ ਸਿਰਫ਼ ਸਰੀਰ ਨੂੰ ਸਗੋਂ ਪਰਿਵਾਰ ਅਤੇ ਸਮਾਜ ਨੂੰ ਵੀ ਤਬਾਹ ਕਰਦਾ ਹੈ | ਸਕੂਲ ਦੀ ਪਿ੍ੰਸੀਪਲ ਮੈਡਮ ਨੀਲਮ ਸ਼ਰਮਾ ਨੇ ਸਮੂਹ ਵਿਦਿਆਰਥੀਆਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਨਸ਼ਾ ਸਰੀਰ, ਮਨ, ਆਤਮਾ ਤੱਕ ਅਸਰ ਕਰਦਾ ਹੈ |
