ਖਮਾਣੋਂ, 22 ਸਤੰਬਰ (ਜੋਗਿੰਦਰ ਪਾਲ)-ਨਗਰ ਪੰਚਾਇਤ ਖਮਾਣੋਂ ਦੇ ਪ੍ਰਧਾਨ ਗੁਰਦੀਪ ਸਿੰਘ ਅਤੇ ਕਾਰਜ ਸਾਧਕ ਅਫ਼ਸਰ ਜਸਵੀਰ ਸਿੰਘ ਦੀ ਅਗਵਾਈ ਹੇਠ ਪੀ.ਐਮ. ਸਵਨਿਧੀ ਸਕੀਮ ਤਹਿਤ 17 ਸਤੰਬਰ ਤੋਂ 2 ਅਕਤੂਬਰ ਤੱਕ 'ਲੋਕ ਕਲਿਆਣ ਮੇਲਾ' ਸ਼ੁਰੂ ਕੀਤਾ ਗਿਆ ਹੈ | ਇਸ ਮੇਲੇ ਸਬੰਧੀ ਸਕੀਮ ਇੰਚਾਰਜ ਹਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਗਰੀਬ ਅਤੇ ਛੋਟੇ ਵਪਾਰੀ ਵਰਗ ਨੂੰ ਸਰਕਾਰ ਵਲੋਂ ਸਬਸਿਡੀ ਤਹਿਤ ਪਹਿਲਾ ਕਰਜ਼ਾ 15 ਹਜ਼ਾਰ, ਦੂਜਾ ਕਰਜ਼ਾ 25 ਹਜ਼ਾਰ ਅਤੇ ਤੀਜਾ ਕਰਜ਼ਾ 50 ਹਜ਼ਾਰ ਤੱਕ ਦਿੱਤਾ ਜਾਂਦਾ ਹੈ | ਇਸ ਮੇਲੇ ਵਿਚ ਸ਼ਹਿਰ ਦੀ ਹਦੂਦ ਅੰਦਰ ਫਲਾਂ, ਸਬਜ਼ੀਆਂ, ਚਾਹ, ਜੂਸ, ਪਲੰਬਰ, ਇਲੈਕਟ੍ਰੀਸ਼ਨ, ਕਵਾੜ, ਪਲਾਸਟਿਕ ਦਾ ਸਾਮਾਨ, ਰੇਹੜੀ ਫੜੀ ਲਗਾਉਣ ਵਾਲੇ ਹਿੱਸਾ ਲੈ ਕੇ ਲਾਭ ਲੈ ਸਕਦੇ ਹਨ |
