ਪਟਿਆਲਾ, 3 ਨਵੰਬਰ (ਅ.ਸ. ਆਹਲੂਵਾਲੀਆ)-ਨਗਰ ਨਿਗਮ ਦੇ ਵਾਰਡ ਨੰ. 43 ਵਿਚਲੇ ਰਿਹਾਇਸ਼ੀ ਇਲਾਕੇ ਦੀ ਪੀਲੀ ਸੜਕ ਉਪਰ ਬਣਾਈਆਂ ਜਾ ਰਹੀਆਂ ਵਪਾਰਿਕ ਉਸਾਰੀਆਂ ਕਾਰਨ ਆਵਾਜਾਈ ਸਮੱਸਿਆ ਦਾ ਖ਼ਤਰਾ ਇਲਾਕਾ ਵਾਸੀਆਂ ਨੂੰ ਸਤਾ ਰਿਹਾ ਹੈ | ਕਈਆਂ ਨੇ ਦਸਿਆ ਕਿ ਇਸ ਦੀ ਸ਼ਿਕਾਇਤ ਕਈ ਵਾਰ ਨਗਰ ਨਿਗਮ ਵਿਖੇ ਕੀਤੀ ਗਈ ਪਰੰਤੂ ਕੋਈ ਕਾਰਵਾਈ ਅਮਲ ਵਿਚ ਨਹੀਂ ਲਿਆਂਦੀ ਗਈ | ਮੌਜੂਦਾ ਸਮੇਂ ਵੀ ਦੋ ਦੁਕਾਨਾਂ ਬਿਲਕੁਲ ਮੁਹੱਲੇ ਵਿਚ ਬਣਾ ਦਿੱਤੀਆਂ ਗਈਆਂ ਹਨ | ਲੰਘੇ ਦਿਨੀਂ ਇਨ੍ਹਾਂ 'ਤੇ ਸ਼ਟਰ ਵੀ ਲਗਾਏ ਗਏ | ਹਾਲੇ ਤਕ ਨਗਰ ਨਿਗਮ ਵਾਲਿਆਂ ਦਾ ਇਥੇ ਨਾ ਪਹੁੰਚਣਾ ਰੋਸ ਦਾ ਕਾਰਨ ਬਣ ਰਿਹਾ ਹੈ | ਇਸ ਸੰਬੰਧੀ ਇਲਾਕੇ ਦੇ ਕੌਂਸਲਰ ਰਮਨਪ੍ਰੀਤ ਕੌਰ ਨਾਲ ਗਲ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਮਾਮਲਾ ਉਨ੍ਹਾਂ ਦੇ ਧਿਆਨ 'ਚ ਆਇਆ ਹੈ ਜਿਸ ਤੋਂ ਬਾਅਦ ਇਲਾਕਾ ਇੰਸਪੈਕਟਰ ਨੂੰ ਵੀ ਨਿਯਮ ਕਾਨੂੰਨ ਮੁਤਾਬਿਕ ਕਾਰਵਾਈ ਲਈ ਕਹਿ ਦਿੱਤਾ ਗਿਆ ਹੈ | ਉਨ੍ਹਾਂ ਮੰਨਿਆ ਕਿ ਅਜਿਹੀ ਮਿਲੀਭੁਗਤ ਨਾਲ ਸਰਕਾਰ ਦਾ ਅਕਸ ਖਰਾਬ ਹੁੰਦਾ ਹੈ | ਉਨ੍ਹਾਂ ਸਪਸ਼ਟ ਕੀਤਾ ਕਿ ਅਜਿਹੀ ਕੋਈ ਕਾਰਵਾਈ ਜਿਸ ਨਾਲ ਇਲਾਕਾ ਵਾਸੀ ਖ਼ੁਸ਼ ਨਾ ਹੋਣ ਹਰਗਿਜ਼ ਬਰਦਾਸ਼ਤ ਨਹੀਂ ਕੀਤੀ ਜਾਵੇਗੀ |
