ਸਨੌਰ, 19 ਦਸੰਬਰ (ਸੋਖਲ)-ਸਨੌਰ ਦੇ ਪਿੰਡ ਜਲਾਲਪੁਰ ਦੀ ਰਹਿਣ ਵਾਲੀ ਅਰਜਮੀਤ ਕੌਰ, ਪੁੱਤਰੀ ਹਰਵਿੰਦਰ ਸਿੰਘ ਬਿੱਟੂ, ਨੇ ਬਲਾਕ ਪੱਧਰੀ ਅਤੇ ਪਟਿਆਲਾ ਪੱਧਰੀ ਕਰਾਟੇ ਖੇਡਾਂ ਵਿਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਦੋਵੇਂ ਮੁਕਾਬਲਿਆਂ ਵਿਚ ਪਹਿਲਾ ਸਥਾਨ ਹਾਸਲ ਕਰਕੇ ਆਪਣੇ ਮਾਪਿਆਂ ਤੇ ਪਿੰਡ ਦਾ ਨਾਂ ਰੌਸ਼ਨ ਕੀਤਾ ਹੈ | ਖੇਡਾਂ ਦੌਰਾਨ ਅਰਜਮੀਤ ਕੌਰ ਨੇ ਆਪਣੀ ਤਕਨੀਕ, ਅਨੁਸ਼ਾਸਨ ਅਤੇ ਆਤਮ-ਵਿਸ਼ਵਾਸ ਨਾਲ ਭਰਪੂਰ ਪ੍ਰਦਰਸ਼ਨ ਕਰਕੇ ਦਰਸ਼ਕਾਂ ਦੇ ਨਾਲ-ਨਾਲ ਕੋਚ ਨੂੰ ਵੀ ਖੂਬ ਪ੍ਰਭਾਵਿਤ ਕੀਤਾ | ਕੋਚਾਂ ਨੇ ਉਸ ਦੀ ਮਿਹਨਤ, ਲਗਨ ਅਤੇ ਖੇਡ ਪ੍ਰਤੀ ਸਮਰਪਣ ਦੀ ਖੁੱਲ੍ਹ ਕੇ ਸਰਾਹਣਾ ਕੀਤੀ | ਅਰਜਮੀਤ ਕੌਰ ਦੀ ਇਸ ਕਾਮਯਾਬੀ ਨਾਲ ਖੇਡ ਪ੍ਰੇਮੀ ਵਰਗ ਵਿਚ ਖੁਸ਼ੀ ਦੀ ਲਹਿਰ ਦੌੜ ਗਈ ਹੈ | ਪਿੰਡ ਵਾਸੀਆਂ ਤੇ ਰਿਸ਼ਤੇਦਾਰਾਂ ਵਲੋਂ ਉਸ ਨੂੰ ਮੁਬਾਰਕਾਂ ਦਿੰਦਿਆਂ ਭਵਿੱਖ ਵਿਚ ਰਾਜ ਅਤੇ ਕੌਮੀ ਪੱਧਰ 'ਤੇ ਵੀ ਵੱਡੀਆਂ ਪ੍ਰਾਪਤੀਆਂ ਦੀ ਕਾਮਨਾ ਕੀਤੀ ਗਈ ਹੈ | ਇਸ ਮੌਕੇ ਪੰਜਾਬ ਸਿੰਘ ਖੁੱਡਾ, ਸੁਖਦੇਵ ਸਿੰਘ ਵਿਰਕ ਤੇ ਹੋਰ ਮੌਜੂਦ ਸਨ |