ਰਾਜਪੁਰਾ, 25 ਦਸੰਬਰ (ਰਣਜੀਤ ਸਿੰਘ)-ਸਥਾਨਿਕ ਸ਼ਹਿਰ ਤੇ ਆਲੇ ਦੁਆਲੇ ਦੇ ਖੇਤਰ ਵਿਚ ਭਾਵੇਂ ਕਿ ਬੀਤੇ ਕਈ ਦਿਨਾਂ ਤੋਂ ਧੁੰਦ ਪੈਣੀ ਜਾਰੀ ਹੈ, ਪਰ ਅੱਜ ਆਮ ਨਾਲੋ ਜ਼ਿਆਦਾ ਧੁੰਦ ਪਈ ਹੈ | ਇਸ ਕਾਰਨ ਮੌਸਮ ਵਿਚ ਠੰਢ ਵੀ ਵਧਣੀ ਸ਼ੁਰੂ ਹੋ ਗਈ ਹੈ | ਇਸ ਠੰਢ ਦਾ ਕਣਕ ਦੇ ਝਾੜ ਤੇ ਕਾਫ਼ੀ ਜ਼ਿਆਦਾ ਅਸਰ ਪੈਣ ਦੀ ਸੰਭਾਵਨਾ ਹੈ | ਖੇਤੀ ਮਾਹਿਰਾਂ ਦਾ ਮੰਨਣਾ ਹੈ ਕਿ ਜ਼ਿਆਦਾ ਠੰਢ ਕਣਕ ਦੀ ਫ਼ਸਲ ਨੂੰ ਦੇਸੀ ਘਿਉ ਵਾਗ ਲੱਗਦੀ ਹੈ | ਠੰਢ ਕਾਰਨ ਕਣਕ ਦਾ ਝਾੜ ਕਾਫ਼ੀ ਜ਼ਿਆਦਾ ਵਧਦਾ ਹੈ ਕਣਕ ਦੀ ਫ਼ਸਲ ਨੂੰ ਪੱਕਣ ਅਤੇ ਵਧਣ ਲਈ ਘੱਟ ਤਾਪਮਾਨ ਦੀ ਲੋੜ ਹੁੰਦੀ ਹੈ | ਇਸ ਕਾਰਨ ਕਿਸਾਨਾਂ ਦੇ ਚਿਹਰੇ ਖਿੜੇ ਹੋਏ ਵਿਖਾਈ ਦੇ ਰਹੇ ਹਨ | ਮਾਹਿਰਾਂ ਦਾ ਕਹਿਣਾ ਹੈ ਕਿ ਕਣਕ ਦੀ ਫ਼ਸਲ ਲਈ ਸ਼ੁਰੂਆਤੀ ਦੌਰ ਵਿਚ ਘੱਟ ਤਾਪਮਾਨ ਦੀ ਲੋੜ ਹੁੰਦੀ ਹੈ | ਠੰਢ ਵਧਣ ਕਾਰਨ ਕਣਕ ਦੇ ਬੂਟੇ ਦਾ ਫੁਟਾਰਾ ਵੱਧ ਹੁੰਦਾ ਹੈ | ਇਸ ਸੰਬੰਧੀ ਖੇਤੀ ਮਾਹਿਰਾਂ ਤੇ ਕਿਸਾਨਾਂ ਦਾ ਕਹਿਣਾ ਹੈ ਕਿ ਮੌਜੂਦਾ ਮੌਸਮ ਹਾਲ ਦੀ ਘੜੀ ਕਣਕ ਦੀ ਫਸਲ ਦੇ ਅਨੁਕੂਲ ਹੈ | ਇਸ ਸੰਬੰੰਧੀ ਮੁੱਖ ਖੇਤੀਬਾੜੀ ਅਫ਼ਸਰ ਡਾ. ਜਸਵਿੰਦਰ ਸਿੰਘ ਨੇ ਦੱਸਿਆ ਕਿ ਕਣਕ ਦੀ ਫਸਲ ਲਈ ਦੋ ਸਟੇਜ਼ਾ ਹੁੰਦੀਆਂ ਹਨ ਇਕ ਵੈਜੀਟੇਟਿਵ ਤੇ ਦੂਜਾ ਰੀਪੋਰਡਕਟਿਵ ਹੁੰਦਾ ਹੈ | ਵੈਜੀਟੇਟਿਵ ਕਣਕ ਦੀ ਬੀਜਾਈ ਤੋਂ ਲੈ ਕੇ ਪੱਤੇ ਨਿਕਲਣ ਤੱਕ ਹੁੰਦਾ ਹੈ | ਇਸ ਵਿਚ ਜਿਨੀ ਜਿਆਦਾ ਠੰਡ ਵਧੇਗੀ ਝਾੜ ਵੀ ਉਨ੍ਹਾਂ ਹੀ ਜਿਆਦਾ ਵੱਧ ਨਿਕਲਦਾ ਹੈ ਅਤੇ ਦੂਜੀ ਸਟੇਜ ਵਿਚ ਕਣਕ ਵਿਚ ਦਾਣਾ ਪੈਣਾ ਸ਼ੁਰੂ ਹੋ ਜਾਂਦਾ ਹੈ | ਡਾ. ਜਸਵਿੰਦਰ ਸਿੰਘ ਦਾ ਕਹਿਣਾ ਹੈ ਕਿ ਜਿੰਨੀ ਜਿਆਦਾ ਠੰਡ ਵੱਧ ਹੋਵੇਗੀ ਉਹ ਕਣਕ ਦੀ ਫਸਲ ਲਈ ਲਾਹੇਵੰਦ ਸਾਬਤ ਹੋਵੇਗੀ |
