ਅੰਮਿ੍ਤਸਰ, 19 ਦਸੰਬਰ (ਸੁਰਿੰਦਰ ਕੋਛੜ)-ਅੱਤਵਾਦੀ ਸਮੂਹ ਇਸਲਾਮਿਕ ਸਟੇਟ ਆਫ਼ ਇਰਾਕ ਐਂਡ ਸੀਰੀਆ-ਖੁਰਾਸਾਨ ਪ੍ਰਾਂਤ (ਆਈ. ਐੱਸ. ਆਈ. ਐੱਸ.-ਕੇ. ਪੀ.) ਪਿਛਲੇ ਲਗਭਗ ਦੋ ਸਾਲਾਂ ਤੋਂ ਪਾਕਿਸਤਾਨ ਦੇ ਬਲੋਚਿਸਤਾਨ ਅਤੇ ਖ਼ੈਬਰ ਪਖਤੂਨਖਵਾ ਪ੍ਰਾਂਤਾਂ 'ਚ ਸਰਗਰਮ ਹੈ ਅਤੇ ਸਿੱਧੇ ਤੌਰ 'ਤੇ ਖ਼ੁਫ਼ੀਆ ਏਜੰਸੀ ਇੰਟਰ-ਸਰਵਿਸਿਜ਼ ਇੰਟੈਲੀਜੈਂਸ (ਆਈ. ਐੱਸ. ਆਈ.) ਦੇ ਪ੍ਰਭਾਵ ਹੇਠ ਕੰਮ ਕਰ ਰਿਹਾ ਹੈ | ਹੁਣ ਗਲੋਬਲ ਵਿੱਤ ਸੰਸਥਾ ਆਈ. ਐੱਮ. ਐੱਫ. ਦਾ ਦਬਾਅ ਵਧਣ 'ਤੇ ਆਈ. ਐੱਸ. ਆਈ. ਨੇ ਉਕਤ ਅੱਤਵਾਦੀ ਸਮੂਹ ਦੇ ਸੀਨੀਅਰ ਨੇਤਾ ਸੁਲਤਾਨ ਅਜ਼ੀਜ਼ ਅਜ਼ਮ ਨੂੰ ਗਿ੍ਫ਼ਤਾਰ ਕਰਨ ਦੀ ਨਾਟਕੀ ਪੇਸ਼ਕਸ਼ ਕੀਤੀ ਹੈ | ਅਜ਼ਮ ਨੂੰ ਸਮੂਹ ਦਾ ਸੈਕਿੰਡ-ਇਨ-ਕਮਾਂਡ ਅਤੇ ਅਲ-ਅਜ਼ੈਮ ਮੀਡੀਆ ਦਾ ਸੰਸਥਾਪਕ ਮੰਨਿਆ ਜਾਂਦਾ ਹੈ | ਉਸ ਨੇ 26 ਅਗਸਤ 2021 ਨੂੰ ਕਾਬੁਲ 'ਚ ਹਾਮਿਦ ਕਰਜ਼ਈ ਕੌਮਾਂਤਰੀ ਹਵਾਈ ਅੱਡੇ ਨੇੜੇ ਆਤਮਘਾਤੀ ਹਮਲੇ, 2 ਮਾਰਚ 2021 ਨੂੰ ਤਿੰਨ ਮਹਿਲਾ ਪੱਤਰਕਾਰਾਂ ਦੀ ਹੱਤਿਆ ਅਤੇ 3 ਅਗਸਤ 2020 ਨੂੰ ਜਲਾਲਾਬਾਦ 'ਚ ਜੇਲ੍ਹ ਹਮਲੇ ਦੀ ਜ਼ਿੰਮੇਵਾਰੀ ਲਈ ਸੀ | ਦੂਜੇ ਪਾਸੇ ਅਫ਼ਗਾਨ ਤਾਲਿਬਾਨ ਸ਼ਾਸਕਾਂ ਨੇ ਦਾਅਵਾ ਕੀਤਾ ਹੈ ਕਿ ਆਈ. ਐੱਸ. ਆਈ. ਐੱਸ.-ਕੇ. ਪੀ. ਪਾਕਿਸਤਾਨੀ ਸਰਹੱਦ ਦੇ ਨੇੜੇ ਦੇ ਇਲਾਕਿਆਂ 'ਚ ਮਦਰਸਿਆਂ ਵਿਚ ਬੱਚਿਆਂ ਨੂੰ ਕੱਟੜਪੰਥੀ ਬਣਾਉਣ ਅਤੇ 14 ਸਾਲ ਦੀ ਉਮਰ ਦੇ ਨਾਬਾਲਗਾਂ ਲਈ ਆਤਮਘਾਤੀ ਸਿਖਲਾਈ ਕੋਰਸ ਸਥਾਪਿਤ ਕਰ ਰਿਹਾ ਹੈ |
