ਸੰਗਰੂਰ, 27 ਦਸੰਬਰ (ਧੀਰਜ ਪਸ਼ੋਰੀਆ) - ਡਿਪਟੀ ਕਮਿਸ਼ਨਰ ਸੰਗਰੂਰ ਰਿਹਾਇਸ਼ ਤੋਂ ਬਰਨਾਲਾ ਕੈਂਚੀਆਂ ਤੱਕ ਦਾ ਕੌਮੀ ਮਾਰਗ ਦਾ ਟੋਟਾ ਜੋ ਕਰੀਬ ਇੱਕ ਸਾਲ ਤੋਂ ਵੱਧ ਸਮਾਂ ਪਹਿਲਾਂ ਸੀਵਰੇਜ ਨਿਕਾਸੀ ਦੀ ਮੁੱਖ ਪਾਈਪ ਲਾਈਨ ਪਾਉਣ ਲਈ ਤੋੜਿਆ ਗਿਆ ਸੀ ਦੇ ਹੁਣ ਮੁੜ ਬਣਨ ਦੀ ਆਸ ਬੱਝੀ ਹੈ | ਇਸ ਮੁੱਦੇ ਨੂੰ ਨੇੜਲੀਆਂ ਕਲੋਨੀਆਂ ਦੇ ਲੋਕਾਂ ਦੇ ਨਾਲ ਨਾਲ ਸਮਾਜ ਚਿੰਤਕਾਂ ਵਲੋਂ ਲਗਾਤਾਰ ਉਠਾਇਆ ਜਾ ਰਿਹਾ ਸੀ | ਸਮਾਜ ਚਿੰਤਕ ਐਡਵੋਕੇਟ ਜਤਿੰਦਰ ਕਾਲੜਾ ਅਤੇ ਐਡਵੋਕੇਟ ਕਮਲ ਅਨੰਦ ਨੇ 'ਅਜੀਤ' ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਇਸ ਸੜਕ ਨੂੰ ਬਣਾਉਣ ਲਈ ਨੈਸ਼ਨਲ ਹਾਈਵੇ ਡਿਵੀਜ਼ਨ (ਲੋਕ ਨਿਰਮਾਣ ਵਿਭਾਗ) ਵਲੋਂ 98.55 ਲੱਖ ਰੁਪਏ ਦਾ ਟੈਂਡਰ ਲਗਾਇਆ ਗਿਆ ਹੈ ਜੋ 30 ਦਸੰਬਰ 2025 ਨੂੰ ਖੋਲਿ੍ਹਆ ਜਾਵੇਗਾ ਜਿਸ ਵੀ ਏਜੰਸੀ ਨੂੰ ਇਹ ਨਿਰਮਾਣ ਕਾਰਜ ਅਲਾਟ ਹੋਵੇਗਾ ਉਸ ਤੋਂ ਇਹ ਕੰਮ ਪੂਰੀ ਤਰ੍ਹਾਂ ਤਸੱਲੀਬਖ਼ਸ਼ ਕਰਵਾਇਆ ਜਾਵੇਗਾ | ਕੰਮ ਦੇ ਮੁਕੰਮਲ ਹੋਣ ਨਾਲ ਜਿੱਥੇ ਹਰ ਸਮੇਂ ਉੱਡਦੀ ਧੂੜ ਮਿੱਟੀ ਅਤੇ ਪ੍ਰਦੂਸ਼ਣ ਤੋਂ ਰਾਹਤ ਮਿਲੇਗੀ ਉਥੇ ਟਰੈਫ਼ਿਕ ਦੇ ਵਨ ਵੇ ਹੋਣ ਨਾਲ ਲੱਗਦੇ ਜਾਮ ਤੋਂ ਵੀ ਨਿਜਾਤ ਮਿਲੇਗੀ | ਇਨ੍ਹਾਂ ਸਮਾਜ ਚਿੰਤਕਾਂ ਨੇ ਕਿਹਾ ਕਿ ਲੋਕਾਂ ਨੂੰ ਹਰ ਮੁੱਦੇ ਤੇ ਆਪਣੀ ਆਵਾਜ਼ ਬੁਲੰਦ ਕਰਨੀ ਚਾਹੀਦੀ ਹੈ ਕਦੇ ਵੀ ਝਿਜਕਣਾ ਨਹੀਂ ਚਾਹੀਦਾ ਕਿਉਂਕਿ ਸਰਕਾਰੀ ਖ਼ਜ਼ਾਨਾ ਲੋਕਾਂ ਦਾ ਹੈ | ਅਫ਼ਸਰ ਸ਼ਾਹੀ ਉਸ ਖ਼ਜ਼ਾਨੇ ਨੂੰ ਲੋਕਾਂ ਦੀ ਭਲਾਈ ਤੇ ਖ਼ਰਚਣ ਲਈ ਪਾਬੰਦ ਹੈ | ਸਾਫ਼ ਸੁਥਰਾ ਅਤੇ ਪਾਰਦਰਸ਼ੀ ਪ੍ਰਬੰਧ ਦੇਣਾ ਹੀ ਇਨ੍ਹਾਂ ਅਫ਼ਸਰਾਂ ਦੀ ਡਿਊਟੀ ਹੈ ਨਾ ਕਿ ਲੋਕਾਂ ਤੇ ਹੁਕਮ ਚਲਾਉਣਾ | ਇਸ ਸਬੰਧੀ ਇਸ ਸੜਕ ਦੇ ਨੇੜੇ ਹੋਮਿਉਪੈਥੀ ਕੀਲਿਨਕ ਚਲਾ ਰਹੇ ਡਾ. ਅਮਰਜੀਤ ਸਿੰਘ ਮਾਨ ਨਾਲ ਜਦੋਂ ਗੱਲਬਾਤ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਲੰਬੇ ਸਮੇਂ ਤੋਂ ਉੱਡਦੀ ਧੂੜ ਲੋਕਾਂ ਲਈ ਖਾਂਸੀ ਜ਼ੁਕਾਮ ਅਤੇ ਗਲਾ ਖ਼ਰਾਬ ਵਰਗੀਆਂ ਬਿਮਾਰੀਆਂ ਦਾ ਕਾਰਨ ਬਣ ਰਹੀ ਸੀ, ਹੁਣ ਟੈਂਡਰ ਖੋਲ੍ਹਣ ਤੋਂ ਬਾਅਦ ਇਸ ਕੰਮ ਨੂੰ ਤੇਜ਼ੀ ਨਾਲ ਕਰਵਾਇਆ ਜਾਵੇ ਤਾਂ ਜੋ ਸਮੱਸਿਆਵਾਂ ਦਾ ਸਾਹਮਣਾ ਕਰ ਰਹੇ ਲੋਕਾਂ ਨੂੰ ਸਮੱਸਿਆਵਾਂ ਤੋਂ ਨਿਜਾਤ ਮਿਲ ਸਕੇ |
