ਬਿਜਲੀ ਦੀਆਂ ਤਾਰਾਂ ਨਾਲ ਉਲਝਿਆ ਓਵਰਲੋਡ ਟਰੱਕ

• ਖੰਭਾ ਸਕੂਟੀ 'ਤੇ ਡਿੱਗਣ ਕਰਕੇ ਇੱਕ ਗੰਭੀਰ ਜ਼ਖ਼ਮੀ
ਡੱਬਵਾਲੀ, 4 ਨਵੰਬਰ (ਇਕਬਾਲ ਸਿੰਘ ਸ਼ਾਂਤ)-ਸੁਤੰਤਰਤਾ ਸੈਨਾਨੀ ਪਾਰਕ ਦੇ ਨੇੜੇ ਅੱਜ ਇੱਕ ਝੋਨੇ ਨਾਲ ਲੱਦਿਆ ਓਵਰਲੋਡ ਟਰੱਕ ਬਿਜਲੀ ਤਾਰਾਂ ਨਾਲ ਟਕਰਾ ਗਿਆ | ਤਾਰਾਂ ਦੇ ਖਿਚਾਅ ਕਾਰਨ 220 ਕੇਵੀ ਲਾਈਨ ਸਮੇਤ ਤਿੰਨ ਖੰਭੇ ਡਿੱਗ ਪਏ | ਇੱਕ ਖੰਭਾ ਉਥੋਂ ਲੰਘ ਰਹੇ ਸਕੂਟੀ ਸਵਾਰ 'ਤੇ ਜਾ ਡਿੱਗਿਆ ਅਤੇ ਉਹ ਗੰਭੀਰ ਜ਼ਖਮੀ ਹੋ ਗਿਆ | ਹਾਦਸੇ ਵਿੱਚ ਜਖ਼ਮੀ ਦੀ ਪਛਾਣ 52 ਸਾਲਾ ਗੁਰਪ੍ਰੇਮ ਸਿੰਘ ਵਾਸੀ ਪਿੰਡ ਮਸੀਤਾਂ ਵਜੋਂ ਹੋਈ ਹੈ | ਉਹ ਮੰਡੀ ਕਿੱਲਿਆਂਵਾਲੀ ਦੇ ਪ੍ਰਾਈਵੇਟ ਬੱਸ ਅੱਡੇ 'ਤੇ ਚੌਕੀਦਾਰ ਵਜੋਂ ਕੰਮ ਕਰਦਾ ਹੈ | ਹਾਦਸੇ ਵਿੱਚ ਸਕੂਟੀ ਬੁਰੀ ਤਰ੍ਹਾਂ ਨੁਕਸਾਨੀ ਗਈ | ਸਿਵਲ ਹਸਪਤਾਲ ਲਿਜਾਣ 'ਤੇ ਜਖ਼ਮੀ ਦੀ ਲੱਤ ਵਿੱਚ ਫ੍ਰੈਕਚਰ ਦੀ ਪੁਸ਼ਟੀ ਹੋਈ | ਜ਼ਖ਼ਮੀ ਗੁਰਪ੍ਰੇਮ ਸਿੰਘ ਨੇ ਦੱਸਿਆ ਕਿ ਉਹ ਡਿਊਟੀ ਤੋਂ ਬਾਅਦ ਪਿੰਡ ਵੱਲ ਵਾਪਸ ਜਾ ਰਿਹਾ ਸੀ ਤੇ ਟਰੱਕ ਦੇ ਪਿੱਛੇ ਆਪਣੀ ਇਲੈਕਟਿ੍ਕ ਸਕੂਟੀ 'ਤੇ ਸੀ | ਉਸਨੇ ਕਿਹਾ ਕਿ ਜੇਕਰ ਖੰਭਾ ਉਸਦੇ ਸਿਰ 'ਤੇ ਡਿੱਗਦਾ ਤਾਂ ਸ਼ਾਇਦ ਜਾਨ ਨਾ ਬਚਦੀ | ਸੂਚਨਾ ਮਿਲਣ 'ਤੇ ਬਿਜਲੀ ਨਿਗਮ ਦੇ ਕਰਮਚਾਰੀ ਮੌਕੇ 'ਤੇ ਪੁੱਜ ਗਏ ਅਤੇ ਸਪਲਾਈ ਬੰਦ ਕਰਵਾਈ | ਫੋਰਮੈਨ ਬਲਬੀਰ ਸਿੰਘ ਨੇ ਦੱਸਿਆ ਕਿ ਮੰਡੀ ਸ਼ੇਰਗੜ੍ਹ ਫੀਡਰ ਦੀ ਸੇਵਾ ਪ੍ਰਭਾਵਿਤ ਹੋੲੈ | ਟਰੱਕ ਮਾਲਕ ਖ਼ਿਲਾਫ਼ ਕਾਰਵਾਈ ਕੀਤੀ ਜਾ ਰਹੀ ਹੈ | ਲੋਕਾਂ ਨੇ ਸ਼ਹਿਰ ਵਿੱਚ ਭਾਰੀ ਵਹੀਕਲਾਂ ਦੇ ਦਾਖ਼ਲੇੇ 'ਤੇ ਪਾਬੰਦੀ ਲਗਾਉਣ ਦੀ ਮੰਗ ਕੀਤੀ ਹੈ |