ਜਲੰਧਰ, 3 ਨਵੰਬਰ (ਪਵਨ ਖਰਬੰਦਾ)-ਆਈਵੀ ਵਰਲਡ ਸਕੂਲ ਨੇ ਵਾਸਲ ਐਜੂਕੇਸ਼ਨ ਦੇ ਸਹਿਯੋਗ ਹੇਠ ਇੱਕ ਦਿਲ ਛੂਹਣ ਵਾਲਾ ਅਤੇ ਵਿਚਾਰ ਉਤਪੰਨ ਕਰਨ ਵਾਲਾ ਮੰਚ ਪ੍ਰਦਰਸ਼ਨ 'ਆਫਲਾਈਨ ਐਡਵੈਂਚਰਜ਼' ਸਿਰਲੇਖ ਹੇਠ ਪ੍ਰਦਰਸ਼ਿਤ ਕੀਤਾ, ਜਿਸ ਵਿੱਚ ਉਸ ਮਨਮੋਹਕ ਦੁਨੀਆ ਦੀ ਖੋਜ, ਜਿੱਥੇ ਸਕ੍ਰੀਨਾਂ ਦੀ ਥਾਂ ਕਲਪਨਾ ਦਾ ਰਾਜ ਹੈ ਅਤੇ ਕਿਤਾਬਾਂ ਸੱਚੇ ਦੋਸਤ ਬਣ ਜਾਂਦੀਆਂ ਹਨ, ਨੂੰ ਦਰਸਾਇਆ ਗਿਆ | ਇਸ ਨਾਟਕ ਦਾ ਮੁੱਖ ਉਦੇਸ਼ ਬੱਚਿਆਂ ਦੇ ਜੀਵਨ ਵਿੱਚ ਵੱਧ ਰਹੇ ਸਕ੍ਰੀਨ ਟਾਈਮ ਦੀ ਚੁਣੌਤੀ ਨੂੰ ਦਰਸਾਉਣਾ ਅਤੇ ਇਹ ਦਿਖਾਉਣਾ ਸੀ ਕਿ ਅਸਲੀ ਦੁਨੀਆ ਵਿੱਚ ਪੜ੍ਹਨ ਦੀ ਆਦਤ ਅਤੇ ਮਨੁੱਖੀ ਰਿਸ਼ਤਿਆਂ ਵਿੱਚ ਕਿੰਨੀ ਡੂੰਘਾਈ, ਖੁਸ਼ੀ ਅਤੇ ਤਾਕਤ ਲੁਕੀ ਹੋਈ ਹੈ | ਵਿਦਿਆਰਥੀਆਂ ਨੇ ਇਸ ਕਾਰਜਕ੍ਰਮ ਵਿੱਚ ਬਹੁਤ ਹੀ ਉਤਸ਼ਾਹ ਨਾਲ ਭਾਗ ਲਿਆ | ਉਨ੍ਹਾਂ ਨੇ ਆਪਣੀ ਜੀਵੰਤ ਅਦਾਕਾਰੀ, ਸੰਗੀਤ ਅਤੇ ਨਾਚ ਰਾਹੀਂ ਦਰਸ਼ਕਾਂ ਨੂੰ ਇੱਕ ਰੋਮਾਂਚਕ ਯਾਤਰਾ ਕਰਵਾਈ | ਕਾਰਜਕ੍ਰਮ ਦੀ ਸਮਾਪਤੀ ਸਮੇਂ ਨੰਨੇ ਆਈਵੀਅਨਜ ਨੇ ਇੱਕ ਗੰਭੀਰ ਸੁਨੇਹੇ ਨਾਲ ਕੀਤੀ | ਵਾਸਲ ਐਜੂਕੇਸ਼ਨ ਦੇ ਪ੍ਰਧਾਨ ਕੇ. ਕੇ. ਵਾਸਲ, ਚੇਅਰਮੈਨ ਸੰਜੀਵ ਕੁਮਾਰ ਵਾਸਲ, ਉਪ ਪ੍ਰਧਾਨ ਈਨਾ ਵਾਸਲ, ਸੀ.ਈ.ਓ. ਰਾਘਵ ਵਾਸਲ ਅਤੇ ਡਾਇਰੈਕਟਰ ਅਦਿੱਤੀ ਵਾਸਲ ਨੇ ਆਪਣੀ ਬੇਅੰਤ ਖੁਸ਼ੀ ਪ੍ਰਗਟਾਈ | ਉਨ੍ਹਾਂ ਕਿਹਾ ਕਿ ਇਸ ਤਰ੍ਹਾਂ ਦੇ ਸਮਾਗਮ ਵਿਦਿਆਰਥੀਆਂ ਨੂੰ ਆਪਣੇ ਅੰਦਰ ਲੁਕੀ ਪ੍ਰਤਿਭਾ ਦਰਸਾਉਣ ਦਾ ਮੌਕਾ ਦਿੰਦੇ ਹਨ ਅਤੇ ਉਨ੍ਹਾਂ ਦੇ ਸਰਵਪੱਖੀ ਵਿਕਾਸ ਵਿੱਚ ਮਹੱਤਵਪੂਰਣ ਭੂਮਿਕਾ ਨਿਭਾਉਂਦੇ ਹਨ |
