ਭੁਲੱਥ, 21 ਸਤੰਬਰ (ਮਨਜੀਤ ਸਿੰਘ ਰਤਨ)-ਭੁਲੱਥ ਹਲਕੇ ਦੇ ਵਿਕਾਸ ਦੇ ਕੰਮ ਪਿਛਲੇ ਕਰੀਬ 9 ਸਾਲਾਂ ਤੋਂ ਠੱਪ ਪਏ ਹਨ | ਇਹ ਪ੍ਰਗਟਾਵਾ ਹਲਕਾ ਭੁਲੱਥ ਤੋਂ ਸੀਨੀਅਰ ਅਕਾਲੀ ਆਗੂ ਸੁਖਵੰਤ ਸਿੰਘ ਤੱਖਰ ਨੇ ਇੱਕ ਬਿਆਨ ਰਾਹੀਂ ਕੀਤਾ | ਉਨ੍ਹਾਂ ਕਿਹਾ ਕਿ ਭੁਲੱਥ ਹਲਕਾ ਵਿਕਾਸ ਪੱਖੋਂ ਬਹੁਤ ਹੀ ਪੱਛੜ ਚੁੱਕਾ ਹੈ | ਕਿਉਂਕਿ ਪਿਛਲੇ ਕਰੀਬ ਪੌਣੇ 9 ਸਾਲਾਂ ਤੋਂ ਹਲਕੇ ਵਿਚ ਕੋਈ ਵੀ ਵਿਕਾਸ ਦਾ ਕੰਮ ਨਹੀਂ ਹੋਇਆ | ਨਾ ਕੋਈ ਸਕੂਲ ਅੱਪਡੇਟ ਹੋਇਆ, ਨਾ ਕੋਈ ਨਵਾਂ ਬਿਜ਼ਨਸ, ਨਾ ਕੋਈ ਕਾਰਖ਼ਾਨਾ, ਨਾ ਹੀ ਕੋਈ ਕਾਲਜ ਅਪਗਰੇਡ ਹੋਇਆ ਅਤੇ ਨਾ ਕੋਈ ਹੋਰ ਵਿਕਾਸ ਦੇ ਕੰਮ ਹੋਏ | ਸਿਰਫ਼ ਦੋ ਸੜਕਾਂ ਜਿਹੜੀਆਂ ਹਨ, ਉਹ ਵੀ ਪ੍ਰਧਾਨ ਮੰਤਰੀ ਕੋਟੇ 'ਚ ਹਨ, ਜਿਹੜੀਆਂ ਬੇਗੋਵਾਲ ਤੋਂ ਭੁਲੱਥ ਕਰਤਾਰਪੁਰ ਸੜਕ ਜਾਂ ਭੁਲੱਥ ਤੋਂ ਭੋਗਪੁਰ ਸੜਕ ਇਹਨਾਂ ਦੋਵਾਂ ਸੜਕਾਂ ਦੀ ਰਿਪੇਅਰ ਹੋਈ ਹੈ | ਹੋਰ ਸਾਰੀਆਂ ਦੀ ਸਾਰੀਆਂ ਸੜਕਾਂ ਟੁੱਟੀਆਂ ਪਈਆਂ ਹਨ ਜਦ ਕਿ ਅਕਾਲੀ ਦਲ ਦੇ ਟਾਈਮ ਇਹ ਸੜਕਾਂ ਜਿਹੜੀਆਂ 9 ਤੋਂ 13, 13 ਤੋਂ 18 ਅਤੇ ਫਿਰ 23 ਫੁੱਟ ਤੱਕ ਸੜਕਾਂ ਚੌੜੀਆਂ ਹੋਈਆਂ ਸਨ, ਪਰ ਉਸ ਤੋਂ ਬਾਅਦ ਕਿਸੇ ਨੇ ਕੋਈ ਵੀ ਸਾਰ ਨਹੀਂ ਲਈ | ਉਨ੍ਹਾਂ ਕਿਹਾ ਕਿ ਪਹਿਲਾਂ ਕਾਂਗਰਸ ਨੇ ਪਿਛਲੇ ਪੰਜ ਸਾਲ ਰਾਜ ਕੀਤਾ ਤੇ ਹੁਣ ਆਮ ਆਦਮੀ ਪਾਰਟੀ ਨੇ ਰਾਜ ਕੀਤਾ, ਜਦੋਂ ਕਾਂਗਰਸ ਦਾ ਰਾਜ ਸੀ, ਉਦੋਂ ਵੀ ਹਲਕਾ ਇੰਚਾਰਜ ਉਹੀ ਸੀ ਤੇ ਅੱਜ ਵੀ ਹਲਕਾ ਇੰਚਾਰਜ ਜਦੋਂ ਆਮ ਆਦਮੀ ਪਾਰਟੀ ਸਰਕਾਰ ਹੈ ਉਹੀ ਵਿਅਕਤੀ ਹੈ ਪਰ ਵਿਕਾਸ ਦਾ ਕੰਮ ਕੋਈ ਨਹੀਂ ਹੈ | ਦੂਸਰੇ ਪਾਸੇ ਹਲਕਾ ਵਿਧਾਇਕ ਦੀ ਗੱਲ ਕਰ ਲਈਏ ਤੇ ਐਮ.ਐਲ.ਏ. ਵੀ ਪਿਛਲੇ ਤਕਰੀਬਨ ਪੌਣੇ 9 ਸਾਲਾਂ ਤੋਂ ਇੱਕੋ ਹੀ ਹੈ ਪਰ ਕੋਈ ਵਿਕਾਸ ਦਾ ਇੱਕ ਕੰਮ ਨਹੀਂ ਹੋਇਆ ਅਤੇ ਸਮੁੱਚਾ ਹਲਕਾ ਵਿਕਾਸ ਪੱਖੋਂ ਬੜੀ ਬੁਰੀ ਤਰ੍ਹਾਂ ਪਛੜ ਗਿਆ ਹੈ |
