ਨਡਾਲਾ, 18 ਅਕਤੂਬਰ (ਰਘਬਿੰਦਰ ਸਿੰਘ)-ਸਾਹਿਤਕ ਪਿੜ ਨਡਾਲਾ ਦੀ ਮਾਸਿਕ ਇਕੱਤਰਤਾ ਦੌਰਾਨ ਇਸ ਦੁਨੀਆ ਤੋਂ ਅਚਨਚੇਤ ਹੀ ਤੁਰ ਗਏ ਮਰਹੂਮ ਗਾਇਕ ਰਾਜਵੀਰ ਸਿੰਘ ਜਵੰਦਾ ਤੇ ਸੁਰਿੰਦਰ ਬਾਕਰਪੁਰੀ ਲਈ ਗਹਿਰੇ ਦੁੱਖ ਦਾ ਇਜ਼ਹਾਰ ਕੀਤਾ ਗਿਆ ਤੇ ਸ਼ਰਧਾਂਜਲੀ ਭੇਟ ਕੀਤੀ ਗਈ | ਇਸ ਮੌਕੇ ਚਰਚਾ ਵਿਚ ਭਾਗ ਲੈਣ ਵਾਲਿਆਂ ਵਿਚ ਡਾ. ਕਰਮਜੀਤ ਸਿੰਘ ਨਡਾਲਾ ਤੇ ਡਾ. ਮੱਖਣ ਸਿੰਘ ਸ਼ਾਮਲ ਸਨ | ਰਚਨਾਵਾਂ ਦੇ ਦੌਰ ਦੌਰਾਨ ਲਾਲੀ ਕਰਤਾਰਪੁਰੀ ਨੇ ਗੀਤ ਗਾ ਕੇ ਸ਼ੁਰੂਆਤ ਕੀਤੀ | ਮਨੋਜ ਫਗਵਾੜਵੀ ਨੇ ਗ਼ਜ਼ਲ, ਨਾਨਕ ਚੰਦ ਵਿਰਦੀ ਨੇ ਸ੍ਰੀ ਗੁਰੂ ਤੇਗ ਬਹਾਦਰ ਸਾਹਿਬ ਨੂੰ ਯਾਦ ਕਰਦਿਆਂ ਗੀਤ ਸੁਣਾਇਆ | ਅਸ਼ੋਕ ਟਾਂਡੀ ਨੇ ਕਹਾਣੀ, ਸੋਢੀ ਸੱਤੋਵਾਲੀ ਨੇ ਵਿਅੰਗਮਈ ਕਵਿਤਾ, ਸਰਬਜੀਤ ਸਿੰਘ ਨਾਗਰਾ ਨੇ ਇਕ ਸ਼ਾਨਦਾਰ ਗ਼ਜ਼ਲ ਤੇ ਆਪਣੇ ਕੈਨੇਡਾ ਪਹੰੁਚੇ ਪੁੱਤਰ ਪਾਹੁਲਪ੍ਰੀਤ ਸਿੰਘ ਦੀ ਰਚਨਾ ਆਪ ਪੜ੍ਹ ਕੇ ਸੁਣਾਈ | ਇਸ ਮੌਕੇ ਬਲਦੇਵ ਸਿੰਘ ਪੱਡਾ, ਅਵਤਾਰ ਸਿੰਘ ਖੱਖ ਨੇ ਵੀ ਆਪੋ-ਆਪਣੇ ਵਿਚਾਰ ਰੱਖੇ | ਡਾ. ਮੱਖਣ ਸਿੰਘ ਨੇ ਬੜੀ ਭਾਵਪੂਰਤ ਰਚਨਾ ਸੁਣਾ ਕੇ ਸਭ ਨੂੰ ਕੀਲ ਸੁੱਟਿਆ | ਪ੍ਰਸਿੱਧ ਕਹਾਣੀਕਾਰ ਡਾ. ਕਰਮਜੀਤ ਸਿੰਘ ਨਡਾਲਾ ਨੇ ਡੂੰਘੇ ਭਾਵਾਂ ਨੂੰ ਪ੍ਰਗਟ ਕਰਦੀ ਕਹਾਣੀ 'ਦੀਵੇ' ਪੜ੍ਹੀ | ਅੰਤ ਵਿਚ ਸਭਾ ਦੇ ਪ੍ਰਧਾਨ ਨਿਰਮਲ ਸਿੰਘ ਖੱਖ ਨੇ ਵਿਤਾ 'ਬਾਬਾ ਸਮਾਧੀ ਵਿਚ ਹੈ' ਰਚਨਾ ਸੁਣਾਈ ਤੇ ਪ੍ਰਧਾਨਗੀ ਸ਼ਬਦ ਕਹੇ |
