ਬੁਢਲਾਡਾ ਦੇ ਪਿੰਡ ਕੁਲਾਣਾ 'ਚ ਤੀਜੀ ਵਾਰ ਛਾਪੇਮਾਰੀ
ਅਜੀਤ ਡੈਸਕ
10-06-2026
ਇਸ ਛਾਪੇਮਾਰੀ ਦੌਰਾਨ ਐਨ.ਆਈ.ਏ. ਅਧਿਕਾਰੀਆਂ ਵਲੋਂ ਨੌਜਵਾਨ ਦੇ ਫ਼ੋਨ ਨੂੰ ਖੰਘਾਲਨ ਤੋਂ ਇਲਾਵਾ ਘਰ ਦੇ ਸਾਮਾਨ ਦੀ ਵੀ ਤਲਾਸ਼ੀ ਲਈ ਗਈ | ਯਾਦਵਿੰਦਰ ਸਿੰਘ ਉਰਫ਼ ਪ੍ਰੀਤਾ ਨੇ ਦੱਸਿਆ ਕਿ ਕਰੀਬ ਦੋ ਸਾਲ ਪਹਿਲਾਂ ਮੋਬਾਈਲ ਐਪਲੀਕੇਸ਼ਨ ਸਨੈਪਚੈਟ ਰਾਹੀਂ ਇਕ ਪਾਕਿਸਤਾਨੀ ਵਿਅਕਤੀ ਨਾਲ ਸਿਰਫ਼ ਕੁਝ ਕੁ ਸਕਿੰਟ ਹੀ ਸੰਪਰਕ ਜ਼ਰੂਰ ਹੋਇਆ ਸੀ | ਉਸ ਤੋਂ ਬਾਅਦ ਜਿੰਨੀ ਵਾਰ ਵੀ ਉਸ ਦੀ ਜਾਂਚ ਹੋਈ ਹੈ, ਉਸ ਨੇ ਸਾਰੀ ਗੱਲ ਸਪੱਸ਼ਟ ਰੂਪ ਵਿਚ ਦੱਸ ਦਿੱਤੀ ਹੈ ਕਿ ਉਸ ਤੋਂ ਕਿਸੇ ਵੀ ਪਾਕਿਸਤਾਨੀ ਨੇ ਕੁਝ ਵੀ ਨਹੀਂ, ਪੁੱਛਿਆ ਪ੍ਰੰਤੂ ਅੱਜ ਫਿਰ ਤੜਕਸਾਰ ਸਵੇਰੇ 5 ਵਜੇ ਪਹੁੰਚੀ ਐਨ. ਆਈ. ਏ. ਟੀਮ ਨੇ ਘਰ ਅੰਦਰ ਜਾਂਚ ਕਰਨ ਤੋਂ ਬਾਅਦ ਉਨ੍ਹਾਂ ਨੂੰ 15 ਜੂਨ ਨੂੰ ਚੰਡੀਗੜ੍ਹ ਵਿਖੇ ਜਾਂਚ ਲਈ ਬੁਲਾਇਆ ਹੈ | ਯਾਦਵਿੰਦਰ ਦੀ ਮਾਤਾ ਰਣਜੀਤ ਕੌਰ ਨੇ ਕਿਹਾ ਕਿ ਉਨ੍ਹਾਂ ਦਾ ਪੁੱਤਰ ਮਾਨਸਿਕ ਤੌਰ 'ਤੇ ਠੀਕ ਨਾ ਹੋਣ ਦੇ ਬਾਵਜੂਦ ਉਸ ਨੂੰ ਵਾਰ-ਵਾਰ ਆ ਕੇ ਪ੍ਰੇਸ਼ਾਨ ਕੀਤਾ ਜਾ ਰਿਹਾ ਹੈ |
