ਚਿਦੰਬਰਮ ਨੇ ਬ੍ਰਿਕਸ ਸੰਮੇਲਨ ’ਤੇ ਉਠਾਏ ਸਵਾਲ

ਭਾਜਪਾ ਨੇ ‘ਨਾਰਾਜ਼ ਫੁੱਫੜ’ ਕਹਿ ਕੇ ਕੀਤਾ ਤਨਜ਼
ਨਵੀਂ ਦਿੱਲੀ, 10 ਸਤੰਬਰ (ਉਪਮਾ ਡਾਗਾ ਪਾਰਥ)- ਕਾਂਗਰਸ ਨੇਤਾ ਪੀ. ਚਿੰਦਬਰਮ ਨੇ ਬ੍ਰਿਕਸ ਸੰਮੇਲਨ ’ਚ ਭਾਰਤ ਦੀ ਹਿੱਸੇਦਾਰੀ ਨੂੰ ਲੈ ਕੇ ਸਵਾਲ ਉਠਾਉਂਦਿਆਂ ਕਿਹਾ ਕਿ ਆਖਿਰ ਇਨ੍ਹਾਂ ਮੰਚਾਂ ਤੋਂ ਭਾਰਤ ਨੂੰ ਕੀ ਫਾਇਦਾ ਮਿਲ ਰਿਹਾ ਹੈ। ਚਿੰਦਬਰਮ ਨੇ ਸੋਸ਼ਲ ਮੀਡੀਆ ਮੰਚ ‘ਐਕਸ’ ’ਤੇ ਪਾਏ ਸੰਦੇਸ਼ ’ਚ ਕਿਹਾ ਕਿ ਉਨ੍ਹਾਂ ਨੂੰ ਨਹੀਂ ਲਗਦਾ ਕਿ ਪਿਛਲੇ ਦੋ ਜਾਂ ਤਿੰਨ ਬ੍ਰਿਕਸ ਸੰਮੇਲਨ ਤੋਂ ਕੋਈ ਠੋਸ ਫਾਇਦਾ ਜਾਂ ਠੋਸ ਨਤੀਜਾ ਮਿਲਿਆ ਹੈ। ਕਾਂਗਰਸ ਨੇਤਾ ਨੇ ਬ੍ਰਿਕਸ ਤੋਂ ਇਲਾਵਾ ਹੋਰ ਮੰਚਾਂ ’ਚ ਭਾਰਤ ਦੀ ਹਿੱਸੇਦਾਰੀ ਨੂੰ ਲੈ ਕੇ ਸਵਾਲ ਉਠਾਏ। ਉਨ੍ਹਾਂ ਕਿਹਾ ਕਿ ਅਸੀਂ ਬ੍ਰਿਕਸ ਦਾ ਹਿੱਸਾ ਹਾਂ, ਐਸ.ਐਲ.ਓ. ਦਾ ਹਿੱਸਾ ਹਾਂ, ਜੀ-20 ਦਾ ਹਿੱਸਾ ਹਾਂ ਅਤੇ ਕੁਆਡ ਦਾ ਵੀ ਹਿੱਸਾ ਹਾਂ। ਪਰ ਇਸ ਨਾਲ ਸਾਨੂੰ ਕੀ ਫਾਇਦਾ ਮਿਲ ਰਿਹਾ ਹੈ? ਚਿੰਦਬਰਮ ਨੇ ਇਹ ਵੀ ਕਿਹਾ ਕਿ ਹਾਲਾਂਕਿ ਪਹਿਲੇ ਬ੍ਰਿਕਸ ਸੰਮੇਲਨ ਤੋਂ ਕੁਝ ਠੋਸ ਫਾਇਦੇ ਜ਼ਰੂਰ ਮਿਲੇ ਸਨ। ਭਾਜਪਾ ਨੇ ਚਿੰਦਬਰਮ ਦੇ ਬਿਆਨ ’ਤੇ ਪ੍ਰਤੀਕਰਮ ਕਰਦਿਆਂ ਉਨ੍ਹਾਂ ਨੂੰ ‘ਨਾਰਾਜ਼ ਫੁੱਫੜ’ ਦੱਸਿਆ। ਭਾਜਪਾ ਨੇਤਾ ਪ੍ਰਦੀਪ ਭੰਡਾਰੀ ਨੇ ਸੋਸ਼ਲ ਮੀਡੀਆ ਮੰਚ ‘ਐਕਸ’ ’ਤੇ ਪਾਏ ਸੰਦੇਸ਼ ’ਚ ਕਿਹਾ ਕਿ ਜਦੋਂ ਵੀ ਭਾਰਤ ’ਚ ਕੁਝ ਚੰਗਾ ਹੁੰਦਾ ਹੈ, ‘ਨਾਰਾਜ਼ ਫੁੱਫੜ’ ਕਾਂਗਰਸ ਨੂੰ ਉਸ ’ਤੇ ਪ੍ਰੇਸ਼ਾਨੀ ਹੋਣ ਲਗਦੀ ਹੈ।