ਚੌਂਕੀਮਾਨ, 29 ਜੁਲਾਈ (ਤੇਜਿੰਦਰ ਸਿੰਘ ਚੱਢਾ) ਪਿੰਡ ਪੰਡੋਰੀ ਵਿਖੇ ਹੋਮਿਉਪੈਥੀ ਸਰਕਾਰੀ ਡਿਸਪੈਂਸਰੀ ਵਿਚ ਬੀਤੀ ਰਾਤ ਚੋਰਾਂ ਨੇ ਦੂਜੀ ਵਾਰ ਚੋਰੀ ਕੀਤੀ ਤੇ ਬੈਟਰੀ ਸਮੇਤ ਇਨਵਰਟਰ ਤੇ ਗੱਲੇ ਵਿਚ ਪਈ ਨਗਦੀ ਚੋਰੀ ਕਰਕੇ ਲੈ ਗਏ। ਇਕੱਤਰ ਕੀਤੀ ਜਾਣਕਾਰੀ ਅਨੁਸਾਰ ਬੀਤੀ ਰਾਤ ਚੋਰਾਂ ਨੇ ਜ਼ਿੰਦਰੇ ਭੰਨ੍ਹ ਕੇ ਡਿਸਪੈਂਸਰੀ ਵਿਚ ਪਏ ਇਨਵਰਟਰ ਤੇ ਬੈਟਰੀ ਚੋਰੀ ਕਰ ਲੇ ਤੇ ਅਲਮਾਰੀਆਂ ਦੇ ਜ਼ਿੰਦਰੇ ਭੰਨ੍ਹ ਕੇ ਉਸ ਵਿਚ ਪਏ ਰਿਕਾਰਡ ਦੀ ਫੋਲਾ ਫਰਾਲੀ ਕੀਤੀ। ਇੱਥੇ ਦੱਸਣਯੋਗ ਹੈ ਕਿ ਪਹਿਲਾ ਵੀ ਚੋਰਾਂ ਨੇ ਹੋਮਿਉਪੈਥੀ ਸਰਕਾਰੀ ਡਿਸਪੈਂਸਰੀ ਵਿਚੋਂ ਗੈਸ ਸਿੰਲਡਰ ਚੋਰੀ ਕਰ ਲਿਆ ਸੀ। ਇਸ ਮੌਕੇ ਸਰਪੰਂਚ ਰੁਲਦਾ ਸਿੰਘ ਪੰਡੋਰੀ ਤੇ ਡਾ. ਪ੍ਰਵੀਨ ਕੌਰ ਨੇ ਦੱਸਿਆ ਕਿ ਚੋਰੀ ਦਾ ਪਤਾ ਸਵੇਰੇ ਲੱਗਿਆ ਤੇ ਦੇਖਿਆ ਕਿ ਡਿਸਪੈਂਸਰੀ ਦੇ ਦਰਵਾਜ਼ੇ ਦੇ ਜ਼ਿੰਦਰੇ ਭੰਨ੍ਹੇ ਪਏ ਹਨ ਤੇ ਅੰਦਰ ਵੇਖਿਆ ਤਾਂ ਬੈਟਰੀ ਤੇ ਇਨਵਰਟਰ ਨਹੀਂ ਸਨ ਤੇ ਅਲਮਾਰੀਆਂ ਦੇ ਜ਼ਿੰਦਰੇ ਵੀ ਭੰਨ੍ਹੇ ਪਏ ਹਨ ਤੇ ਗੱਲੇ ਵਿਚ ਪਈ ਨਗਦੀ ਵੀ ਗਾਇਬ ਸੀ। ਇਸ ਮੌਕੇ ਪਿੰਡ ਵਾਸੀਆਂ ਨੇ ਕਿਹਾ ਕਿ ਚੋਰਾਂ ਨੂੰ ਪੁਲਿਸ ਦਾ ਕੋਈ ਡਰ ਨਹੀਂ ਹੈ ਤੇ ਬੇਖੌਫ਼ ਹੋ ਕੇ ਚੋਰੀਆਂ ਕਰ ਰਹੇ ਹਨ, ਜਿਸ ਨਾਲ ਪਿੰਡ ਵਿਚ ਡਰ ਦਾ ਮਾਹੌਲ ਬਣਿਆ ਹੋਇਆ ਹੈ ਤੇ ਉਨ੍ਹਾਂ ਨੇ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਕਿ ਰਾਤ ਨੂੰ ਗਸਤ ਵਧਾਈ ਜਾਵੇ ਤਾਂ ਜੋ ਚੋਰਾਂ ਸਮੇਤ ਸ਼ਰਾਰਤੀ ਅਨਸਰਾਂ ਨੂੰ ਨਕੇਲ ਪਾਈ ਜਾ ਸਕੇ।
