ਬੰਗਾ, 29 ਮਈ (ਧਰਮਵੀਰ ਪਾਲ, ਸੁਰਿੰਦਰ ਸਿੰਘ ਕਰਮ ਲਧਾਣਾ)-ਬੰਗਾ ਦੇ ਮੇਨ ਰੋਡ ਸਿਟੀ ਥਾਣਾ ਦੇ ਬਿਲਕੁਲ ਨਾਲ ਲੱਗਦੇ ਦੁਰਗਾ ਜਿਊਲਰ ਵਿਖੇ ਇਕ ਔਰਤ ਕਰੀਬ 80 ਹਜ਼ਾਰ ਰੁਪਏ ਦੇ ਮੁੱਲ ਵਾਲੀ ਮੁੰਦਰੀ ਲੈ ਕੇ ਫ਼ਰਾਰ ਹੋ ਗਈ | ਇਸ ਸੰਬੰਧੀ ਦੁਕਾਨ ਦੇ ਮਾਲਕ ਨਿਤਿਨ ਦੁੱਗਲ ਨੇ ਦੱਸਿਆ ਕਿ ਇਕ ਔਰਤ ਸਾਡੀ ਦੁਕਾਨ 'ਤੇ ਆਈ ਤੇ ਮੁੰਦਰੀ ਦਿਖਾਉਣ ਲਈ ਕਿਹਾ, ਜਦੋਂ ਉਨ੍ਹਾਂ ਉਸ ਔਰਤ ਨੂੰ ਮੁੰਦਰੀਆਂ ਦੇ ਦੋ ਤਿੰਨ ਬਾਕਸ ਦਿਖਾਏ ਤਾਂ ਉਸ ਨੇ ਇਕ ਮੁੰਦਰੀ ਚੁੱਕ ਕੇ ਉਸ ਦੀ ਜਗ੍ਹਾ 'ਤੇ ਨਕਲੀ ਮੁੰਦਰੀ ਰੱਖ ਦਿੱਤੀ | ਉਨ੍ਹਾਂ ਦੱਸਿਆ ਕਿ ਉਸ ਔਰਤ ਨੇ ਦੋਨਾਂ ਬਾਂਹਾਂ 'ਤੇ ਸਲੀਵ ਪਾਏ ਹੋਏ ਸਨ, ਜਿਸ 'ਚ ਉਸ ਨੇ ਇਕ ਸੋਨੇ ਦੀ ਮੁੰਦਰੀ ਸਲੀਵ ਦੇ ਵਿਚ ਲਕੋ ਲਈ ਅਤੇ ਜਦ ਤੱਕ ਉਨ੍ਹਾਂ ਨੂੰ ਇਸ ਬਾਰੇ ਪਤਾ ਲੱਗਦਾ ਤਾਂ ਉਹ ਉਥੋਂ ਫ਼ਰਾਰ ਹੋ ਗਈ | ਉਨ੍ਹਾਂ ਸੀ. ਸੀ. ਟੀ. ਵੀ. ਕੈਮਰੇ ਦੀ ਮਦਦ ਨਾਲ ਉਸ ਔਰਤ ਦੀ ਤਸਵੀਰ ਕੱਢੀ ਅਤੇ ਨਾਲ ਲੱਗਦੇ ਥਾਣਾ ਸਿਟੀ ਵਿਚ ਰਿਪੋਰਟ ਦਰਜ ਕਰਵਾ ਦਿੱਤੀ | ਉਨ੍ਹਾਂ ਕਿਹਾ ਕਿ ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਮੁੱਖ ਬਾਜ਼ਾਰਾਂ 'ਚ ਹੋਣਾ ਬਹੁਤ ਹੀ ਮਾੜੀ ਗੱਲ ਹੈ |
