ਪੋਜੇਵਾਲ ਸਰਾਂ, 11 ਜੁਲਾਈ (ਨਵਾਂਗਰਾਈਂ) - ਪਿੰਡ ਕਰੀਮਪੁਰ ਚਾਹਵਾਲਾ ਵਿਖੇ ਕੰਢੀ ਨਹਿਰ ਦੇ ਕਿਨਾਰੇ ’ਤੇ ਇੱਕ ਵਿਅਕਤੀ ਦੀ ਲਾਸ਼ ਮਿਲਣ ਦਾ ਸਮਾਚਾਰ ਹੈ। ਜਾਣਕਾਰੀ ਅਨੁਸਾਰ ਅੱਜ ਸਵੇਰੇ ਨਹਿਰੀ ਵਿਭਾਗ ਦਾ ਕਰਮਚਾਰੀ ਨਹਿਰ ਦੀ ਸਫਾਈ ਲਈ ਕਰੀਮਪੁਰ ਚਾਹਵਾਲਾ ਵਿਖੇ ਜਿੱਥੋਂ ਨਹਿਰ ਪਾਈਪਾਂ ’ਚ ਪਾਈ ਗਈ ਹੈ ਉਸ ਸਥਾਨ ’ਤੇ ਗਿਆ ਤਾਂ ਉਸ ਨੇ ਦੇਖਿਆ ਉੱਥੇ ਵਿਅਕਤੀ ਦੀ ਲਾਸ਼ ਪਈ ਹੈ। ਉਸ ਨੇ ਤੁਰੰਤ ਪਿੰਡ ਦੇ ਨੌਜਵਾਨਾਂ ਨੂੰ ਦੱਸਿਆ। ਉਹਨਾਂ ਤੁਰੰਤ ਪੋਜੇਵਾਲ ਪੁਲਿਸ ਨੂੰ ਸੂਚਿਤ ਕੀਤਾ ਤੇ ਪੋਜੇਵਾਲ ਪੁਲਿਸ ਐਸ.ਐਚ.ਓ. ਪੋਜੇਵਾਲ ਕਮਲ ਤਨੇਜਾ ਦੀ ਅਗਵਾਈ ਵਿੱਚ ਮੌਕੇ ’ਤੇ ਪਹੁੰਚ ਗਈ। ਵਿਅਕਤੀ ਦੀ ਪਹਿਚਾਣ ਹਰੀ ਰਾਮ ਪੁੱਤਰ ਸਵ:ਦਰਸ਼ਨ ਲਾਲ ਨੰਬਰਦਾਰ ਉਮਰ ਤਕਰੀਬਨ 55 ਸਾਲ ਪਿੰਡ ਕਰੀਮਪੁਰ ਚਾਹਵਾਲਾ ਵਜੋਂ ਹੋਈ। ਪਰਿਵਾਰਕ ਮੈਂਬਰਾਂ ਅਨੁਸਾਰ ਹਰੀ ਰਾਮ ਬੀਤੇ ਕੱਲ੍ਹ ਸਵੇਰ ਤੋਂ ਆਪਣੇ ਕੰਮ ਲਈ ਬਾਹਰ ਗਿਆ ਹੋਇਆ ਸੀ। ਪੁਲਿਸ ਵਲੋਂ ਲਾਸ਼ ਕਬਜੇ ਵਿੱਚ ਲੈ ਕੇ ਅਗਲੀ ਕਰਵਾਈ ਆਰੰਭ ਕਰ ਦਿੱਤੀ ਹੈ।
