ਐਕਟਿਵਾ ਨੂੰ ਬਚਾਉਂਦੀ ਹੋਈ ਕਰੇਟਾ ਗੱਡੀ ਨੇ ਢਾਹਿਆ ਮਿੰਨੀ ਬੱਸ ਅੱਡਾ

ਉੜਾਪੜ/ਲਸਾੜਾ, 19 ਜੁਲਾਈ (ਲਖਵੀਰ ਸਿੰਘ ਖੁਰਦ)- ਫਿਲੌਰ-ਨਵਾਂਸਹਿਰ ਸੜਕ ‘ਤੇ ਲਸਾੜਾ ਨਜ਼ਦੀਕ ਇੱਕ ਕਰੇਟਾ ਗੱਡੀ ਉਸ ਸਮੇਂ ਹਾਦਸਾ ਗ੍ਰਸਤ ਹੋ ਗਈ, ਜਦੋਂ ਉਹਨਾਂ ਅੱਗੇ ਜਾ ਰਹੀ ਇੱਕ ਐਕਟਿਵਾ ਚਾਲਕ ਵਲੋਂ ਅਚਾਨਕ ਹੀ ਪਿੰਡ ਵੱਲ ਆਪਣੀ ਐਕਟਿਵਾ ਮੋੜ ਦਿੱਤੀ ਗਈ ਅਤੇ ਉਸਨੂੰ ਬਚਾਉਣ ਦੀ ਕੋਸ਼ਿਸ਼ ਕਰਦਿਆਂ ਗੱਡੀ ਮਿੰਨੀ ਬੱਸ ਅੱਡੇ ਵਿੱਚ ਬਣੇ ਇੱਕ ਕਮਰੇ ਨੂੰ ਢਾਹੁੰਦੀ ਹੋਈ ਦਰੱਖਤ ਨਾਲ ਜਾ ਟਕਰਾਈ। ਜਿਸ ਨਾਲ ਗੱਡੀ ਮੂਹਰਿਉਂ ਬੁਰੀ ਤਰਾਂ ਨੁਕਸਾਨੀ ਗਈ ਅਤੇ ਕਾਰ ਚਾਲਕ ਬੁਰੀ ਤਰ੍ਹਾਂ ਜ਼ਖਮੀ ਹੋ ਗਿਆ। ਗੱਡੀ ਤੇ ਐਕਟਿਵਾ ਸਕੂਟਰੀ ਦੋਵੇਂ ਫਿਲੌਰ ਸਾਇਡ ਤੋਂ ਹੀ ਆ ਰਹੇ ਸਨ। ਮੌਕੇ ‘ਤੇ ਖੜੇ ਲਸਾੜਾ ਪਿੰਡ ਦੇ ਹੀ ਕੁੱਝ ਵਿਆਕਤੀਆਂ ਨੇ ਦੱਸਿਆ ਕਿ ਕਰੇਟਾ ਗੱਡੀ ਜੋ ਪਿੰਡ ਸੇਲਕਿਆਣਾ ਦੀ ਹੈ ਤੇ ਇਸਨੂੰ ਮੰਥਨ ਪਾਲ ਪੁੱਤਰ ਰਜਿੰਦਰ ਪਾਲ ਚਲਾ ਰਿਹਾ ਸੀ। ਕਾਰ ਚਾਲਕ ਨੂੰ ਇਲਾਜ ਲਈ ਨਜ਼ਦੀਕੀ ਹਸਪਤਾਲ ਪਹੁੰਚਾਇਆ ਗਿਆ ਪਰ ਐਕਟਿਵਾ ਚਾਲਕਾਂ ਦਾ ਕੋਈ ਪਤਾ ਨਹੀਂ ਲੱਗਾ।