ਬਸੀ ਪਠਾਣਾਂ, 6 ਮਈ (ਪੱਤਰ ਪ੍ਰੇਰਕ)-ਕਾਂਗਰਸ ਪਾਰਟੀ ਦੇ ਰਾਜੀਵ ਗਾਂਧੀ ਪੰਚਾਇਤੀ ਰਾਜ ਸੰਗਠਨ ਦੀ ਕੋ ਕਨਵੀਨਰ ਡਾ. ਅਮਨਦੀਪ ਕੌਰ ਢੋਲੇਵਾਲ ਨੇ ਕਿਹਾ ਕਿ ਪੰਜਾਬ ਸਰਕਾਰ ਦੇ ਵਿਕਾਸ ਦੇ ਦਾਅਵੇ ਪੂਰੀ ਤਰ੍ਹਾਂ ਨਾਲ ਝੂਠੇ ਤੇ ਖੋਖਲੇ ਹਨ, ਜੋ ਜ਼ਮੀਨੀ ਹਕੀਕਤ ਨਾਲ ਮੇਲ ਨਹੀਂ ਖਾਂਦੇ | ਉਨ੍ਹਾਂ ਕਿਹਾ ਕਿ ਬਸੀ ਪਠਾਣਾਂ ਵਿਧਾਨ ਸਭਾ ਹਲਕੇ ਦੀਆਂ ਸੜਕਾਂ ਦਾ ਇਨ੍ਹਾਂ ਜ਼ਿਆਦਾ ਬੁਰਾ ਹਾਲ ਹੈ, ਕਿ ਰੋਜ਼ਾਨਾ ਕਿਸੇ ਨਾ ਕਿਸੇ ਸੜਕ ਤੇ ਹਾਦਸਾ ਵਾਪਰਦਾ ਰਹਿੰਦਾ ਹੈ, ਕਈ ਸੜਕਾਂ ਨੂੰ ਤਾਂ ਲੋਕ ਖ਼ੂਨੀ ਸੜਕ ਕਹਿਣ ਲੱਗੇ ਹਨ, ਪਰ ਅਫ਼ਸੋਸ ਦੀ ਗੱਲ ਹੈ ਕਿ ਸਰਕਾਰ ਨੂੰ ਪਤਾ ਹੋਣ ਦੇ ਬਾਵਜੂਦ ਕੋਈ ਸਾਰ ਨਹੀਂ ਲਈ ਜਾ ਰਹੀ | ਡਾ. ਢੋਲੇਵਾਲ ਨੇ ਦੱਸਿਆ ਕਿ ਚੁੰਨੀ ਇਲਾਕੇ ਦੀਆਂ ਸੜਕਾਂ ਦਾ ਬਹੁਤ ਬੁਰਾ ਹਾਲ ਹੋ ਚੁੱਕਾ ਹੈ | ਜਿਸ ਕਾਰਨ ਰਾਹਗੀਰਾਂ ਨੂੰ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ | ਬਸੀ ਪਠਾਣਾਂ ਤੋਂ ਦੁਫੇੜਾ ਤੱਕ ਜਾਂਦੀ ਸੜਕ ਵਿਚ ਵੱਡੇ ਖੱਡੇ ਪੈ ਚੁੱਕੇ ਹਨ ਜਿਸ ਕਰਕੇ ਉੱਥੇ ਰੋਜ਼ ਹਾਦਸੇ ਵਾਪਰ ਰਹੇ ਹਨ | ਖਮਾਣੋਂ ਬਲਾਕ ਦੀਆਂ ਸੜਕਾਂ ਵੀ ਮੰਦਾ ਹਾਲ ਹਨ | ਉੱਚਾ ਪਿੰਡ ਤੋਂ ਬਸੀ ਪਠਾਣਾਂ ਤੱਕ ਸੜਕ ਵਿਚ ਪਏ ਟੋਇਆਂ ਵੱਲ ਵੀ ਫ਼ੌਰੀ ਧਿਆਨ ਦੇਣ ਦੀ ਲੋੜ ਹੈ | ਪਿੰਡ ਫਰੌਰ ਨੂੰ ਜਾਂਦੀ ਸੜਕ ਤੇ ਰਾਹਗੀਰਾਂ ਨੂੰ ਜੂਝਣਾ ਪੈ ਰਿਹਾ ਹੈ | ਖਮਾਣੋਂ ਤੋ ਬਦੇਸ਼ਾਂ ਵੱਲ ਜਾਂਦੀ ਸੜਕ ਖੱਡਿਆਂ ਨਾਲ ਭਰੀ ਪਈ ਹੈ | ਹਲਕੇ ਦੀਆਂ ਸਾਰੀਆਂ ਸੜਕਾਂ ਵੱਲ ਸਰਕਾਰ ਨੂੰ ਤੁਰੰਤ ਧਿਆਨ ਦੇਣ ਦੀ ਲੋੜ ਹੈ ਤਾਂ ਜੋ ਰਾਹਗੀਰ ਹਾਦਸਿਆਂ ਤੋਂ ਮਹਿਫ਼ੂਜ਼ ਹੋ ਸਕਣ |