ਬਸੀ ਪਠਾਣਾਂ, 8 ਮਈ (ਪੱਤਰ ਪ੍ਰੇਰਕ)-ਸੰਤ ਨਾਮਦੇਵ ਕੰਨਿਆ ਮਹਾਂਵਿਦਿਆਲਿਆ ਬਸੀ ਪਠਾਣਾਂ ਦਾ ਹਿੱਸਾ ਰਾਸ਼ਟਰੀ ਧਰਮਾ ਵਿੱਦਿਆ-ਪੀਠ ਵਿਖੇ ਬਲ਼ੂ ਦਿਵਸ ਮਨਾਇਆ ਗਿਆ | ਜਿਸ ਵਿਚ ਨੰਨੇ੍ਹ ਵਿਦਿਆਰਥੀਆਂ ਨੇ ਬੜੇ ਉਤਸ਼ਾਹ ਨਾਲ ਹਿੱਸਾ ਲਿਆ | ਸਕੂਲ ਨੂੰ ਨੀਲੇ ਰੰਗ ਦੇ ਗ਼ੁਬਾਰਿਆਂ, ਰਿਬਨ ਅਤੇ ਚਾਰਟਾਂ ਨਾਲ ਸਜਾਇਆ ਗਿਆ ਸੀ | ਵਿਦਿਆਰਥੀ ਨੀਲੇ ਰੰਗ ਦੇ ਕੱਪੜੇ ਪਹਿਨ ਕੇ ਆਏ, ਜਿਸ ਨਾਲ ਮਾਹੌਲ ਖ਼ੂਬਸੂਰਤ ਬਣ ਗਿਆ | ਨੰਨੇ ਬੱਚਿਆਂ ਨੇ ਆਸਮਾਨ, ਸਮੁੰਦਰ ਅਤੇ ਫੁੱਲਾਂ ਬਾਰੇ ਕੁਝ ਲਾਈਨਾਂ ਬੋਲੀਆਂ, ਜਿਸ ਨਾਲ ਉਨ੍ਹਾਂ ਦੀ ਸੰਚਾਰ ਕੌਸ਼ਲ ਵਿਚ ਸੁਧਾਰ ਆਇਆ | ਸਕੂਲ ਦੇ ਡਾਇਰੈਕਟਰ ਪਿ੍ੰਸੀਪਲ ਵੀਨੂ ਖੁੱਲਰ, ਐਡਮਿਨਿਸਟ੍ਰੇਟਰ ਸੰਗੀਤਾ ਵਾਧਵਾ, ਅਧਿਆਪਕਾਂ ਨਵਜੋਤ ਕੌਰ ਅਤੇ ਕਵਿਤਾ ਦੀ ਰਹਿਨੁਮਾਈ ਹੇਠ ਕਈ ਮਨੋਰੰਜਕ ਗਤੀਵਿਧੀਆਂ ਕਰਵਾਈਆਂ ਗਈਆਂ | ਬੱਚਿਆਂ ਨੇ ਬੜੇ ਉਤਸ਼ਾਹ ਨਾਲ ਹਿੱਸਾ ਲੈ ਕੇ ਆਪਣੀਆਂ ਪ੍ਰਤਿਭਾਵਾਂ ਦਾ ਪ੍ਰਦਰਸ਼ਨ ਕੀਤਾ | ਅਧਿਆਪਕਾਂ ਨੇ ਨੀਲੇ ਰੰਗ ਦੀ ਮਹੱਤਤਾ ਵੀ ਸਮਝਾਈ, ਜੋ ਸ਼ਾਂਤੀ, ਸੁਖ ਅਤੇ ਸਥਿਰਤਾ ਦਾ ਪ੍ਰਤੀਕ ਹੈ | ਇਸ ਮੌਕੇ 'ਤੇ ਸਕੂਲ ਦੀ ਪਿ੍ੰਸੀਪਲ ਵੀਨੂ ਖੁੱਲਰ ਨੇ ਵਿਦਿਆਰਥੀਆਂ ਨੂੰ ਇਸ ਤਰ੍ਹਾਂ ਦੀਆਂ ਗਤੀਵਿਧੀਆਂ ਵਿਚ ਭਰਪੂਰ ਹਿੱਸਾ ਲੈਣ ਲਈ ਉਤਸ਼ਾਹਿਤ ਕੀਤਾ |
