ਮੰਡੀ ਅਰਨੀਵਾਲਾ,7 ਅਪ੍ਰੈਲ (ਨਿਸ਼ਾਨ ਸਿੰਘ ਮੋਹਲ਼ਾ)-ਕਣਕ ਦੀ ਫ਼ਸਲ ਮੰਡੀਆਂ ਵਿਚ ਪੁੱਜ ਗਈ ਹੈ | ਕਿਸਾਨਾਂ ਦਾ ਕਹਿਣਾ ਹੈ ਇਸ ਵਾਰ ਕਣਕ ਦਾ ਝਾੜ ਘੱਟ ਰਹਿਣ ਦੀ ਸੰਭਾਵਨਾ ਹੈ | ਮਾਰਕੀਟ ਕਮੇਟੀ ਅਰਨੀਵਾਲਾ ਦੀ ਪੇਂਡੂ ਮੰਡੀਆਂ ਵਿਚ ਕਣਕ ਪੁੱਜ ਗਈ ਹੈ | ਪਿੰਡ ਮੁਰਾਦ ਵਾਲਾ ਦਲ ਸਿੰਘ ਦੀ ਦਾਣਾ ਮੰਡੀ ਵਿਚ ਕਣਕ ਲੈ ਕੇ ਪੁੱਜੇ ਕਿਸਾਨ ਯਾਦਵਿੰਦਰ ਸਿੰਘ ਢਿੱਲੋਂ ਨੇ ਕਿਹਾ ਕਿ ਇਸ ਵਾਰ ਕਣਕ ਦਾ ਦਾਣਾ ਬਰੀਕ ਹੈ ਅਤੇ ਝਾੜ ਘੱਟ ਰਹੇਗਾ | ਉਨ੍ਹਾਂ ਕਿਹਾ ਕਿ ਕਣਕ ਦੀ ਫ਼ਸਲ 'ਤੇ ਪਹਿਲਾਂ ਗਰਮੀ ਪੈ ਗਈ ਅਤੇ ਬਾਅਦ ਵਿਚ ਜਦੋਂ ਗਰਮੀ ਦੀ ਲੋੜ ਸੀ, ਉਦੋਂ ਠੰਢ ਪੈ ਗਈ | ਜਿਸ ਕਰਕੇ ਇਸ ਵਾਰ ਮੌਸਮ ਦਾ ਅਸਰ ਕਣਕ ਦੀ ਫ਼ਸਲ 'ਤੇ ਰਿਹਾ ਹੈ | ਜਿਸ ਕਰਕੇ ਕਣਕ ਦਾ ਝਾੜ ਘੱਟ ਹੈ ਅਤੇ ਦਾਣਾ ਬਰੀਕ ਹੈ | ਕਿਸਾਨਾਂ ਨੇ ਇਹ ਵੀ ਕਿਹਾ ਕਿ ਜੇਕਰ ਇਸ ਵਾਰ ਮੌਸਮ ਸਾਫ਼ ਹੁੰਦਾ, ਬਾਰਸ਼ ਨਾ ਪੈਂਦੀ ਅਤੇ ਸਿੱਲ੍ਹ ਨਾ ਆਉਂਦੀ ਤਾਂ ਵਿਸਾਖੀ ਤੋਂ ਪਹਿਲਾਂ ਕਣਕਾਂ ਮੰਡੀ ਵਿਚ ਆ ਜਾਣੀਆਂ ਸੀ ਅਤੇ ਕਿਸਾਨਾਂ ਵਲੋਂ ਕਣਕ ਦੀ ਵੱਡੇ ਪੱਧਰ 'ਤੇ ਕਟਾਈ ਕਰ ਲੈਣੀ ਸੀ ਪਰ ਮੌਸਮ ਦੀ ਖ਼ਰਾਬੀ ਕਰਕੇ ਕਣਕ ਦੀ ਵਾਢੀ ਲੇਟ ਹੋਈ ਹੈ |
