ਮਾਨਾਂਵਾਲਾ, 10 ਜੁਲਾਈ (ਗੁਰਦੀਪ ਸਿੰਘ ਨਾਗੀ)-ਆਈ. ਆਈ. ਐਮ. ਅੰਮ੍ਰਿਤਸਰ ਦੇ ਸੁਰੱਖਿਆ ਕਰਮੀਆਂ ਵਲੋਂ ਇਕ ਟੈਕਸੀ ਡਰਾਈਵਰ ਦੀ ਕੁੱਟਮਾਰ ਕਰਨ ਤੇ ਦਸਤਾਰ ਉਤਾਰਨ ਦੇ ਰੋਸ ਵਜੋਂ ਟੈਕਸੀ ਯੂਨੀਅਨ ਵਲੋਂ ਆਈ. ਆਈ. ਐਮ. ਦੇ ਮੁੱਖ ਗੇਟ ਦੇ ਧਰਨਾ ਲਾ ਕੇ ਰੋਸ ਪ੍ਰਦਰਸ਼ਨ ਕੀਤਾ। ਪੀੜਤ ਅੰਮ੍ਰਿਤਧਾਰੀ ਪ੍ਰਭਬੀਰ ਸਿੰਘ ਪੁੱਤਰ ਸੁਖਦੇਵ ਸਿੰਘ ਵਾਸੀ ਪ੍ਰੀਤਮ ਇਨਕਲੇਵ ਅੰਮ੍ਰਿਤਸਰ ਨੇ ਦੱਸਿਆ ਕਿ ਉਸ ਦੀ ਉਬਰ ਕੈਬ ਕਿਸੇ ਗਾਹਕ ਨੇ ਬੁੱਕ ਕੀਤੀ ਸੀ ਅਤੇ ਮਿਲੀ ਲੋਕੇਸ਼ਨ ਦੇ ਆਧਾਰ ’ਤੇ ਆਈ. ਆਈ. ਏ. ਗੇਟ ਲਾਗੇ ਪਹੁੰਚਿਆ ਅਤੇ ਗੇਟ ਉਪਰ ਡਿਊਟੀ ਕਰ ਰਹੇ ਸੁਰੱਖਿਆ ਕਰਮੀਆਂ ਨੂੰ ਆਪਣਾ ਪਹਿਚਾਣ ਪੱਤਰ ਦੇ ਸਵਾਰੀ ਲੈਣ ਅੰਦਰ ਚਲਾ ਗਿਆ ਅਤੇ ਜਦੋਂ ਉਹ ਸਵਾਰੀ ਲੈ ਕੇ ਵਾਪਸ ਆਇਆ ਤਾਂ ਗੇਟ ਉਪਰ ਨਾਲ ਬੈਠੀ ਸਵਾਰੀ ਨੇ ਕਿਹਾ ਗੱਡੀ ਗੇਟ ਤੋਂ ਬਾਹਰ ਕੱਢੋ ਪਹਿਚਾਣ ਪੱਤਰ ਮੈਂ ਲਿਆਉਣਾ ਤਾਂ ਉਥੇ ਤਾਇਨਾਤ ਸੁਰੱਖਿਆ ਕਰਮੀਆਂ ਨੇ ਇਹ ਡਰਾਈਵਰ ਦੀ ਡਿਊਟੀ ਹੈ, ਤੁਸੀਂ ਜਾਓ ਤੇ ਡਰਾਈਵਰ ਨੂੰ ਭੇਜੋ ਤਾਂ ਇਸ ਤੋਂ ਬਾਅਦ ਜਦੋਂ ਮੈਂ ਗਿਆ ਇਕ ਸੁਰੱਖਿਆ ਗਾਰਡ ਨੇ ਗਾਲ ਕੱਢ ਦਿੱਤੀ ਤੇ ਮੇਰੇ ਵਲੋਂ ਇਤਰਾਜ਼ ਕਰਨ ’ਤੇ ਸਭ ਨੇ ਰਲ ਕੇ ਬਿਨਾ ਵਜ੍ਹਾਂ ਮੇਰੇ ਨਾਲ ਝਗੜਾ ਕੀਤਾ, ਮੇਰੀ ਕੁੱਟਮਾਰ ਕਰਨੀ ਸ਼ੁਰੂ ਕਰ ਦਿੱਤੀ ਅਤੇ ਮੇਰੀ ਦਸਤਾਰ, ਕੇਸਾਂ ਤੇ ਕੰਘੇ ਦੀ ਬੇਅਦਬੀ ਕੀਤੀ। ਇਸ ਮੌਕੇ ਹੋਰ ਟੈਕਸੀ ਡਰਾਈਵਰ ਉਥੇ ਮੌਜੂਦ ਸਨ। ਇਸ ਸੰਬੰਧੀ ਥਾਣਾ ਚਾਟੀਵਿੰਡ ਦੀ ਪੁਲਿਸ ਬਣਦੀ ਕਾਰਵਾਈ ਕਰਨ ਦਾ ਭਰੋਸਾ ਦੇਣ ਉਪਰੰਤ ਧਰਨਾ ਸਮਾਪਤ ਹੋ ਗਿਆ ਜਦਕਿ ਆਈ. ਆਈ. ਐਮ. ਦੇ ਸੁਰੱਖਿਆ ਕਰਮੀਆਂ ਨੇ ਝਗੜੇ ਵਿਚ ਸ਼ਾਮਿਲ ਸਾਥੀਆਂ ਸਮੇਤ ਪੁਲਿਸ ਕੋਲ ਪਹੁੰਚਣ ਦੀ ਗੱਲ ਆਖੀ।
