ਅੰਮ੍ਰਿਤਸਰ, 10 ਜੁਲਾਈ (ਸੁਰਿੰਦਰਪਾਲ ਸਿੰਘ ਵਰਪਾਲ)-ਹਲਕਾ ਕੇਂਦਰੀ ਤੋਂ ਵਿਧਾਇਕ ਡਾ. ਅਜੇ ਗੁਪਤਾ ਨੇ ਅੱਜ ਲਾਹੌਰੀ ਗੇਟ ਗਊਸ਼ਾਲਾ ਦੇ ਨਵੀਨੀਕਰਨ ਦਾ ਉਦਘਾਟਨ ਕੀਤਾ। ਇਸ ਮੌਕੇ ਡਾ. ਗੁਪਤਾ ਨੇ ਕਿਹਾ ਕਿ ਇਸ ਪ੍ਰਾਚੀਨ ਗਊਸ਼ਾਲਾ ਨੂੰ ਉੱਪਰੋਂ ਪੂਰੀ ਤਰ੍ਹਾਂ ਢੱਕਿਆ ਅਤੇ ਇਕ ਵੱਡਾ ਸੀਵਰ ਚੈਂਬਰ ਬਣਾਇਆ ਜਾਵੇਗਾ। ਉਨ੍ਹਾਂ ਅੱਗੇ ਕਿਹਾ ਕਿ ਕਮਰਿਆਂ ਦੇ ਨਿਰਮਾਣ ਦੇ ਨਾਲ-ਨਾਲ ਇਕ ਨਵੀਂ ਪਾਣੀ ਦੀ ਮੋਟਰ ਵੀ ਲਗਾਈ ਜਾਵੇਗੀ। ਗਊਸ਼ਾਲਾ ਦੇ ਅੰਦਰ ਅਤੇ ਬਾਹਰ ਹਾਈ-ਵੋਲਟੇਜ ਸਟ੍ਰੀਟ ਲਾਈਟਾਂ ਲਗਾਈਆਂ ਜਾਣਗੀਆਂ। ਵਿਧਾਇਕ ਡਾ. ਅਜੇ ਗੁਪਤਾ ਨੇ ਦੱਸਿਆ ਕਿ ਝਬਾਲ ਰੋਡ ‘ਤੇ ਇਕ ਨਵੇਂ ਪਸ਼ੂ ਹਸਪਤਾਲ ਦੀ ਉਸਾਰੀ ਪੂਰੀ ਹੋ ਗਈ ਹੈ। ਉਨ੍ਹਾਂ ਕਿਹਾ ਕਿ ਇਹ ਹਸਪਤਾਲ ਆਉਣ ਵਾਲੇ ਦਿਨਾਂ ਵਿਚ ਕਾਰਜਸ਼ੀਲ ਹੋ ਜਾਵੇਗਾ। ਇਹ ਹਸਪਤਾਲ ਲਗਭਗ 350 ਲਾਵਾਰਸ ਗਾਵਾਂ ਦੀ ਦੇਖਭਾਲ ਕਰ ਸਕਦਾ ਹੈ। ਵਿਧਾਇਕ ਡਾ. ਅਜੇ ਗੁਪਤਾ ਨੇ ਦੱਸਿਆ ਕਿ ਨਗਰ ਨਿਗਮ, ਇਕ ਗ਼ੈਰ-ਸਰਕਾਰੀ ਸੰਸਥਾ ਰਾਹੀਂ, ਨਰਾਇਣਗੜ੍ਹ ਛੇਹਰਟਾ ਵਿਚ ਲਾਵਾਰਸ ਗਾਵਾਂ ਦੀ ਦੇਖਭਾਲ ਲਈ ਇਕ ਵੱਡਾ ਕੇਂਦਰ ਚਲਾ ਰਿਹਾ ਹੈ। ਇਸ ਤੋਂ ਇਲਾਵਾ, ਨਗਰ ਨਿਗਮ ਨੇ ਪੁਰਾਣੇ ਫੋਕਲ ਪੁਆਇੰਟ ਖੇਤਰ ਵਿਚ ਇਕ ਗਊਸ਼ਾਲਾ ਬਣਾਈ ਹੈ। ਇਸ ਮੌਕੇ ਕਾਮਧੇਨੂ ਗਊ ਧਾਮ ਟਰੱਸਟ ਦੇ ਸੁਖ ਅੰਮ੍ਰਿਤ ਸਿੰਘ, ਰਾਜੇਸ਼ ਕੁਮਾਰ, ਸੁਖਵਿੰਦਰ ਸਿੰਘ, ਸਹਿਬ ਸਿੰਘ, ਚਿਰਾਗ ਮਹਿਰਾ ਆਦਿ ਹਾਜ਼ਰ ਸਨ।
