ਲੁਧਿਆਣਾ, 25 ਜਨਵਰੀ (ਭੁਪਿੰਦਰ ਸਿੰਘ ਬੈਂਸ)-ਚੰਡੀਗੜ੍ਹ ਰੋਡ ਸਥਿਤ ਪਰਮਜੀਤ ਕਾਲੋਨੀ ਫੋਰਟਿਸ ਹਸਪਤਾਲ ਦੇ ਨੇੜੇ ਐਤਵਾਰ ਸਵੇਰੇ ਸਿਲੰਡਰ ਗੈਸ ਲੀਕ ਹੋਣ ਕਾਰਨ ਇਕ ਦਰਦਨਾਕ ਹਾਦਸਾ ਵਾਪਰ ਗਿਆ, ਜਿਸ ਵਿਚ 3 ਬੱਚੇ ਅੱਗ ਦੀ ਲਪੇਟ ਵਿਚ ਆ ਕੇ ਗੰਭੀਰ ਰੂਪ ਵਿਚ ਝੁਲਸ ਗਏ | ਜ਼ਖਮੀ ਬੱਚਿਆਂ ਨੰੂ ਤੁਰੰਤ ਸਿਵਲ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਉਨ੍ਹਾਂ ਦਾ ਇਲਾਜ ਜਾਰੀ ਹੈ | ਜਾਣਕਾਰੀ ਮੁਤਾਬਿਕ ਇਹ ਘਟਨਾ ਉਸ ਵਕਤ ਵਾਪਰੀ, ਜਦੋਂ ਪਰਮਜੀਤ ਕਾਲੋਨੀ ਵਿਚ ਕਿਰਾਏ 'ਤੇ ਰਹਿਣ ਵਾਲੇ ਕਾਮੇਸ਼ਵਰ ਦੇ ਚਾਰ ਬੱਚੇ ਸਵੇਰੇ ਘਰ ਦੇ ਬਾਹਰ ਅੱਗ ਸੇਕ ਰਹੇ ਸਨ | ਇਸ ਦੌਰਾਨ ਅਚਾਨਕ ਨੇੜੇ ਗੈਸ ਸਿਲੰਡਰ ਤੋਂ ਗੈਸ ਲੀਕ ਹੋਣ ਲੱਗੀ, ਜਿਸ ਨਾਲ ਅੱਗ ਭੜਕ ਗਈ | ਅੱਗ ਦੀ ਲਪੇਟ ਵਿਚ ਆਉਂਦੇ ਹੀ ਕਾਮੇਸ਼ਵਰ ਨੇ ਆਪਣੇ 3 ਬੱਚਿਆਂ ਨੰੂ ਬਚਾਉਣ ਦੀ ਕੋਸ਼ਿਸ਼ ਕਰਦੇ, ਉਨ੍ਹਾਂ ਨੰੂ ਆਪਣੀ ਗੋਦ ਵਿਚ ਲੈ ਲਿਆ, ਪਰ ਤਿੰਨ ਬੱਚੇ ਅੱਗ ਨਾਲ ਝੁਲਸ ਗਏ, ਜਦਕਿ ਇਕ ਦੋ ਸਾਲਾ ਬੱਚਾ ਬਚ ਗਿਆ | ਪੀੜਤ ਕਾਮੇਸ਼ਵਰ ਨੇ ਦੋਸ਼ ਲਗਾਇਆ ਕਿ ਉਸ ਦੇ ਘਰ ਦੇ ਨੇੜੇ ਇਕ ਵਿਅਕਤੀ ਨਾਜਾਇਜ਼ ਤੌਰ 'ਤੇ ਗੈਰ ਸਿਲੰਡਰਾਂ ਵਿਚ ਗੈਸ ਭਰਨ ਦਾ ਕੰਮ ਕਰਦਾ ਹੈ | ਐਤਵਾਰ ਨੰੂ ਜਦੋਂ ਉਹ ਵਿਅਕਤੀ ਸਿਲੰਡਰ ਵਿਚ ਗੈਸ ਭਰ ਰਿਹਾ ਸੀ ਤਾਂ ਅਚਾਨਕ ਗੈਸ ਲੀਕ ਹੋ ਗਈ ਅਤੇ ਘਰ ਦੇ ਬਾਹਰ ਅੱਗ ਸੇਕ ਰਹੇ ਬੱਚੇ ਅੱਗ ਦੀ ਲਪੇਟ ਵਿਚ ਆ ਗਏ | ਕਾਮੇਸ਼ਵਰ ਮੁਤਾਬਿਕ ਅੱਗ ਨਾਲ ਉਸ ਦਾ 6 ਸਾਲਾ ਪੁੱਤਰ ਅਤੇ 8 ਅਤੇ 10 ਸਾਲ ਦੀਆਂ ਦੋ ਧੀਆਂ ਝੁਲਸ ਗਈਆਂ ਹਨ, ਜਦਕਿ ਉਸ ਦਾ 2 ਸਾਲਾ ਪੱੁਤਰ ਸੁਰੱਖਿਅਤ ਹੈ | ਘਟਨਾ ਦੀ ਸੂਚਨਾ ਪੁਲਿਸ ਨੰੂ ਦੇ ਦਿੱਤੀ ਗਈ ਹੈ ਅਤੇ ਪੁਲਿਸ ਵਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ |
