ਲੁਧਿਆਣਾ

ਅਪਰਾਧਿਕ ਮਾਮਲੇ ’ ਚ ਲੋੜੀਂਦੇ ਨਾਮਜ਼ਦ ਦੋਸ਼ੀ ਨੂੰ ਫੜਨ ਗਈ ਪੁਲਿਸ ਨਾਲ ਪਰਿਵਾਰਕ ਮੈਂਬਰਾਂ ਦੀ ਝੜਪ

ਅ

ਅਜੀਤ ਡੈਸਕ 10-09-2026

ਲੁਧਿਆਣਾ, 9 ਸਤੰਬਰ (ਪਰਮਿੰਦਰ ਸਿੰਘ ਆਹੂਜਾ)-ਜੱਸੀਆਂ ਰੋਡ ’ਤੇ ਗੁਰਨਾਮ ਨਗਰ ਵਿਚ ਇਕ ਲੋੜੀਂਦੇ ਦੋਸ਼ੀ ਨੂੰ ਫੜਨ ਲਈ ਪੁਲਿਸ ਦੀ ਛਾਪੇਮਾਰੀ ਦੌਰਾਨ ਹਫੜਾ-ਦਫੜੀ ਮੱਚ ਗਈ, ਜਦੋਂ ਸ਼ੱਕੀ ਨੂੰ ਉਸਦੇ ਰਿਸ਼ਤੇਦਾਰਾਂ ਨੇ ਕਥਿਤ ਤੌਰ ’ਤੇ ਪੁਲਿਸ ਗੱਡੀ ਵਿਚੋਂ ਬਾਹਰ ਕੱਢ ਲਿਆ, ਜੋ ਬਾਅਦ ਵਿਚ ਫਰਾਰ ਹੋ ਗਏ। ਇਹ ਵੀ ਦੋਸ਼ ਹੈ ਕਿ ਪੁਲਿਸ ਮੁਲਾਜ਼ਮਾਂ ਨਾਲ ਧੱਕਾ-ਮੁੱਕੀ ਕੀਤੀ ਗਈ, ਜਿਨ੍ਹਾਂ ਨੇ ਉਸਨੂੰ ਫੜਨ ਦੀ ਕੋਸ਼ਿਸ਼ ਕੀਤੀ। ਬਾਅਦ ਵਿਚ ਪੁਲਿਸ ਨੇ ਦੇਰ ਰਾਤ ਇਸ ਮਾਮਲੇ ਵਿਚ ਕੇਸ ਦਰਜ ਕਰ ਲਿਆ ਹੈ। ਜਾਣਕਾਰੀ ਅਨੁਸਾਰ ਡਿਵੀਜ਼ਨ ਨੰਬਰ 4 ਪੁਲਿਸ ਸਟੇਸ਼ਨ ਦੀ ਇਕ ਪੁਲਿਸ ਟੀਮ ਇਕ ਹਮਲੇ ਦੇ ਮਾਮਲੇ ਵਿਚ ਸ਼ੁਭਮ ਉਰਫ਼ ਗੋਰੂ ਨਾਮਕ ਇਕ ਦੋਸ਼ੀ ਦੀ ਭਾਲ ਕਰ ਰਹੀ ਸੀ। ਪੁਲਿਸ ਨੂੰ ਸੂਚਨਾ ਮਿਲੀ ਕਿ ਸ਼ੁਭਮ ਨੇ ਜੱਸੀਆਂ ਰੋਡ ਦੇ ਗੁਰਨਾਮ ਨਗਰ ਵਿਚ ਆਪਣੇ ਸਹੁਰੇ ਵਿੱਕੀ ਦੇ ਘਰ ਪਨਾਹ ਲਈ ਹੈ। ਇਸ ਤੋਂ ਬਾਅਦ ਪੁਲਿਸ ਟੀਮ ਛਾਪੇਮਾਰੀ ਲਈ ਉਥੇ ਗਈ। ਪੁਲਿਸ ਟੀਮ ਨੇ ਘਰ ਨੂੰ ਘੇਰ ਲਿਆ ਅਤੇ ਗੇਟ ਖੜਕਾਇਆ। ਹਾਲਾਂਕਿ, ਅੰਦਰ ਔਰਤਾਂ ਨੇ ਕਥਿਤ ਤੌਰ ‘ਤੇ ਕਰਮਚਾਰੀਆਂ ਨੂੰ ਦੱਸਿਆ ਕਿ ਘਰ ਵਿਚ ਕੋਈ ਮੌਜੂਦ ਨਹੀਂ ਹੈ। ਇਸ ਦੌਰਾਨ ਵਿੱਕੀ ਵੀ ਉਥੇ ਆ ਗਿਆ। ਕੁਝ ਮਿੰਟ ਬਾਅਦ ਹੀ ਤਿੰਨ ਨੌਜਵਾਨਾਂ ਨੇ ਉਥੇ ਦੀਵਾਰ ਤੋਂ ਛਲਾਂਗ ਮਾਰ ਕੇ ਭੱਜਣ ਦੀ ਕੋਸ਼ਿਸ਼ ਕੀਤੀ, ਪਰ ਪੁਲਿਸ ਨੇ ਇਹਨਾਂ ਨੂੰ ਕਾਬੂ ਕਰ ਲਿਆ। ਤਿੰਨਾਂ ਸ਼ੱਕੀਆਂ ਨੂੰ ਪੁਲਿਸ ਗੱਡੀ ਦੇ ਅੰਦਰ ਬਿਠਾਇਆ ਗਿਆ ਸੀ। ਹਾਲਾਂਕਿ, ਵਿੱਕੀ ਉਸ ਦੀਆਂ ਦੋ ਧੀਆਂ, ਸ਼ੁਭਮ ਦੀ ਪਤਨੀ ਸਮੇਤ ਹੋਰਾਂ ਨੇ ਗੱਡੀ ਨੂੰ ਘੇਰ ਲਿਆ। ਪੁਲਿਸ ਦੀ ਕਾਰ ਦੇ ਸਾਹਮਣੇ ਇਕ ਸਕੂਟਰ ਰੱਖ ਦਿੱਤਾ ਤਾਂ ਜੋ ਪੁਲਿਸ ਉਥੋਂ ਜਾ ਨਾ ਸਕੇ। ਪੁਲਿਸ ਮੁਤਾਬਕ ਸ਼ੁਭਮ ਦੀ ਪਤਨੀ ਨੇ ਆਪਣੀ ਬਾਂਹ ਨੂੰ ਬਲੇਡ ਵਰਗੀ ਚੀਜ਼ ਨਾਲ ਜ਼ਖਮੀ ਕਰ ਦਿੱਤਾ ਅਤੇ ਪੁਲਿਸ ਕਰਮਚਾਰੀਆਂ ਨੂੰ ਝੂਠੇ ਮਾਮਲੇ ਵਿਚ ਫਸਾਉਣ ਦੀ ਧਮਕੀ ਦਿੱਤੀ। ਇਸ ਦੌਰਾਨ ਉਥੇ ਹੋਰ ਲੋਕ ਇਕੱਠੇ ਹੋ ਗਏ, ਜਿਨ੍ਹਾਂ ਨੇ ਸ਼ੁਭਮ ਨੂੰ ਪੁਲਿਸ ਦੀ ਕਾਰ ਤੋਂ ਬਾਹਰ ਕੱਢ ਲਿਆ ਅਤੇ ਫ਼ਰਾਰ ਹੋ ਗਏ। ਪੁਲਿਸ ਵਲੋਂ ਹੁਣ ਉਸ ਦੀ ਭਾਲ ਕੀਤੀ ਜਾ ਰਹੀ ਹੈ।

ਪਿਛਲੀ ਖ਼ਬਰ ਗਰਚਾ ਗੋਤ ਦੇ ਜਠੇਰਿਆਂ ਦਾ ਮੇਲਾ ਅੱਜ ਅਗਲੀ ਖ਼ਬਰ ਵਿਧਾਇਕ ਸੰਗੋਵਾਲ ਵਲੋਂ 50 ਲੱਖ ਦੀ ਲਾਗਤ ਨਾਲ ਬਣਨ ਵਾਲੀ ਸੜਕ ਦਾ ਉਦਘਾਟਨ

ਅਪਰਾਧਿਕ ਮਾਮਲੇ ’ ਚ ਲੋੜੀਂਦੇ ਨਾਮਜ਼ਦ ਦੋਸ਼ੀ ਨੂੰ ਫੜਨ ਗਈ ਪੁਲਿਸ ਨਾਲ ਪਰਿਵਾਰਕ ਮੈਂਬਰਾਂ ਦੀ ਝੜਪ

ਸੰਬੰਧਿਤ ਖ਼ਬਰਾਂ