ਚੰਡੀਗੜ੍ਹ, 20 ਜੁਲਾਈ (ਅ. ਬ.)– ਜੇ. ਸੀ. ਬੀ. ਐੱਲ. ਗਰੁੱਪ ਦੀ ਕੰਪਨੀ ਗਲੋਬ ਟੋਯੋਟਾ, ਜੋ ਉੱਤਰੀ ਭਾਰਤ ਦੇ ਸਭ ਤੋਂ ਵੱਡੇ ਟੋਯੋਟਾ ਡੀਲਰਸ਼ਿਪ ਨੈੱਟਵਰਕਾਂ ਵਿਚੋਂ ਇੱਕ ਹੈ, ਨੇ ਬਾਇਓਟ੍ਰੇਡਐਕਸ ਨਾਲ ਸਾਂਝੇਦਾਰੀ ਕੀਤੀ ਹੈ। ਬਾਇਓਟ੍ਰੇਡਐਕਸ ਇਕ ਡਿਜੀਟਲ ਮਾਰਕੀਟਪਲੇਸ ਹੈ, ਜੋ ਭਾਰਤੀ ਕਾਰੋਬਾਰਾਂ ਨੂੰ ਪਾਰਦਰਸ਼ੀ ਤੇ ਨਿਯਮਾਂ ਅਨੁਸਾਰ ਰੀਸਾਈਕਲ ਹੋਣ ਵਾਲੀਆਂ ਤੇ ਮੁੜ ਵਰਤੋਂ ਯੋਗ ਸਮੱਗਰੀਆਂ ਦੇ ਵਪਾਰ ਦੀ ਸੁਵਿਧਾ ਪ੍ਰਦਾਨ ਕਰਦਾ ਹੈ। ਗਲੋਬ ਟੋਯੋਟਾ ਨੇ ਆਪਣੀਆਂ ਡੀਲਰਸ਼ਿਪਾਂ ਵਿਚੋਂ ਨਿਕਲਣ ਵਾਲੇ ਵਰਤੇ ਹੋਏ ਇੰਜਣ ਆਇਲ, ਰੀਸਾਈਕਲ ਹੋਣ ਵਾਲੀ ਸਮੱਗਰੀ ਤੇ ਹੋਰ ਮੁੜ ਪ੍ਰਾਪਤ ਕੀਤੇ ਜਾ ਸਕਣ ਵਾਲੇ ਸਰੋਤਾਂ ਦੇ ਪ੍ਰਬੰਧਨ ਅਤੇ ਉਨ੍ਹਾਂ ਤੋਂ ਆਮਦਨ ਪ੍ਰਾਪਤ ਕਰਨ ਲਈ ਇਸ ਪਲੇਟਫਾਰਮ ਨੂੰ ਆਪਣੇ ਸਿਸਟਮ ਨਾਲ ਜੋੜਿਆ ਹੈ। ਬਾਇਓਟ੍ਰੇਡਐਕਸ ਨਾਲ ਇਸ ਸਾਂਝੇਦਾਰੀ ਰਾਹੀਂ ਗਲੋਬ ਟੋਯੋਟਾ ਆਪਣੇ ਡੀਲਰਸ਼ਿਪ ਨੈੱਟਵਰਕ ਵਿਚ ਰੀਸਾਈਕਲਿੰਗ ਅਤੇ ਸਰਕੂਲਰ ਸਰੋਤ ਪ੍ਰਬੰਧਨ ਨਾਲ ਜੁੜੀਆਂ ਪਹਿਲਾਂ ਨੂੰ ਹੋਰ ਮਜ਼ਬੂਤ ਕਰੇਗੀ। ਇਸ ਸਾਂਝੇਦਾਰੀ ਬਾਰੇ ਗੱਲ ਕਰਦਿਆਂ ਜੇ.ਸੀ.ਬੀ.ਐੱਲ. ਗਰੁੱਪ ਦੀ ਕੰਪਨੀ ਗਲੋਬ ਟੋਯੋਟਾ ਦੇ ਮੈਨੇਜਿੰਗ ਡਾਇਰੈਕਟਰ ਤੇ ਸੀ.ਈ.ਓ. ਵਿਵੇਕ ਦੱਤਾ ਨੇ ਕਿਹਾ ਕਿ ਸਸਟੇਨੇਬਿਲਿਟੀ ਸਾਡੇ ਲਈ ਕਦੇ ਵੀ ਕੋਈ ਵਾਧੂ ਜਾਂ ਵਿਕਲਪਕ ਪਹਿਲ ਨਹੀਂ ਰਹੀ। ਇਸ ਨੇ ਸਾਡੀਆਂ ਡੀਲਰਸ਼ਿਪਾਂ ਦੇ ਕੰਮ ਕਰਨ ਦੇ ਢੰਗ ਨੂੰ ਹਮੇਸ਼ਾ ਪ੍ਰਭਾਵਿਤ ਕੀਤਾ ਹੈ, ਭਾਵੇਂ ਉਹ ਊਰਜਾ ਦੀ ਵਰਤੋਂ ਹੋਵੇ ਜਾਂ ਪਾਣੀ ਦੀ ਰੀਸਾਈਕਲਿੰਗ। ਬਾਇਓਟ੍ਰੇਡਐਕਸ ਨਾਲ ਸਾਂਝੇਦਾਰੀ ਸਾਨੂੰ ਆਪਣੇ ਕਚਰਾ ਪ੍ਰਬੰਧਨ, ਖ਼ਾਸ ਕਰਕੇ ਸਰਵਿਸ ਓਪਰੇਸ਼ਨਾਂ ਤੋਂ ਨਿਕਲਣ ਵਾਲੇ ਵਰਤੇ ਹੋਏ ਇੰਜਣ ਆਇਲ ਤੇ ਰੀਸਾਈਕਲ ਹੋਣ ਵਾਲੀ ਸਮੱਗਰੀ ਦੇ ਪ੍ਰਬੰਧਨ ਵਿਚ ਹੋਰ ਅਨੁਸ਼ਾਸਨ ਲਿਆਉਣ ਦਾ ਮੌਕਾ ਦਿੰਦੀ ਹੈ।
