ਨਿਪੌਨ ਪੇਂਟ ਇੰਡੀਆ ਵਲੋਂ ਨਿਵੇਸ਼ ਵਧਾਉਣ ਅਤੇ ਕਾਰੋਬਾਰ ਦੇ ਵਿਸਥਾਰ ’ਤੇ ਜ਼ੋਰ
ਚੰਡੀਗੜ੍ਹ, 16 ਅਕਤੂਬਰ (ਅ. ਬ.)
ਚੰਡੀਗੜ੍ਹ, 16 ਅਕਤੂਬਰ (ਅ.ਬ.) - ਭਾਰਤ ਦੇ ਤੇਜ਼ੀ ਨਾਲ ਵਧ ਰਹੇ ਪੇਂਟ ਅਤੇ ਕੋਟਿੰਗਜ਼ ਬਾਜ਼ਾਰ ਵਿਚ ਆਪਣੀ ਸਥਿਤੀ ਮਜ਼ਬੂਤ ਕਰਨ ਲਈ ਨਿਪੌਨ ਪੇਂਟ ਇੰਡੀਆ ਵਲੋਂ ਨਿਰਮਾਣ ਸਮਰੱਥਾ, ਰਿਟੇਲ ਨੈੱਟਵਰਕ ਅਤੇ ਮਨੁੱਖੀ ਸਰੋਤਾਂ ਵਿਚ ਨਿਵੇਸ਼ ਵਧਾਉਣ ’ਤੇ ਧਿਆਨ ਕੇਂਦਰਿਤ ਕੀਤਾ ਜਾ ਰਿਹਾ ਹੈ। ਕੰਪਨੀ ਦਾ ਉਦੇਸ਼ ਭਾਰਤੀ ਖਪਤਕਾਰਾਂ ਦੀਆਂ ਲੋੜਾਂ ਅਨੁਸਾਰ ਉਤਪਾਦ ਵਿਕਸਤ ਕਰਨ ਦੇ ਨਾਲ-ਨਾਲ ਦੇਸ਼ ਭਰ ਵਿਚ ਆਪਣੀ ਪਹੁੰਚ ਅਤੇ ਗਾਹਕ ਸੇਵਾਵਾਂ ਨੂੰ ਹੋਰ ਮਜ਼ਬੂਤ ਕਰਨਾ ਹੈ। ਨਿਪੌਨ ਪੇਂਟ ਇੰਡੀਆ ਦੇ ਮੈਨੇਜਿੰਗ ਡਾਇਰੈਕਟਰ ਸ਼ਰਦ ਮਲਹੋਤਰਾ ਨੇ ਕਿਹਾ ਕਿ ਭਾਰਤ ਵਿਸ਼ਵ ਦੇ ਸਭ ਤੋਂ ਆਕਰਸ਼ਕ ਪੇਂਟ ਅਤੇ ਕੋਟਿੰਗਜ਼ ਬਾਜ਼ਾਰਾਂ ਵਿਚੋਂ ਇਕ ਹੈ। ਕੰਪਨੀ ਭਾਰਤੀ ਮੌਸਮ, ਕੰਧਾਂ ਦੀਆਂ ਵਿਸ਼ੇਸ਼ਤਾਵਾਂ ਅਤੇ ਖਪਤਕਾਰਾਂ ਦੀ ਪਸੰਦ ਨੂੰ ਧਿਆਨ ਵਿਚ ਰੱਖਦਿਆਂ ਰੰਗਾਂ, ਫਿਨਿਸ਼ ਅਤੇ ਉਤਪਾਦਾਂ ਦੇ ਵਿਕਾਸ ’ਤੇ ਵਿਸ਼ੇਸ਼ ਧਿਆਨ ਦੇ ਰਹੀ ਹੈ। ਇਸ ਦੇ ਨਾਲ ਹੀ, ਨਿਪੌਨ ਪੇਂਟ ਗਰੁੱਪ ਦੀ ਵਿਸ਼ਵ ਪੱਧਰੀ ਤਕਨਾਲੋਜੀ, ਖੋਜ ਤੇ ਵਿਕਾਸ ਅਤੇ ਗੁਣਵੱਤਾ ਪ੍ਰਣਾਲੀਆਂ ਦਾ ਲਾਭ ਵੀ ਭਾਰਤ ਵਿਚ ਕੰਪਨੀ ਦੇ ਕਾਰਜਾਂ ਨੂੰ ਮਿਲ ਰਿਹਾ ਹੈ। ਕੰਪਨੀ ਆਪਣੇ ਡੈਕੋਰੇਟਿਵ ਪੇਂਟਸ, ਉਦਯੋਗਿਕ ਕੋਟਿੰਗਜ਼ ਅਤੇ ਆਟੋਮੋਟਿਵ ਰਿਫਿਨਿਸ਼ ਸਮੇਤ ਵੱਖ-ਵੱਖ ਕਾਰੋਬਾਰੀ ਖੇਤਰਾਂ ਨੂੰ ਇਕ ਏਕੀਕ੍ਰਿਤ ਕਾਰਜ ਪ੍ਰਣਾਲੀ ਅਧੀਨ ਲਿਆ ਰਹੀ ਹੈ। ਇਸ ਪਹਿਲ ਦਾ ਉਦੇਸ਼ ਵੱਖ-ਵੱਖ ਇਕਾਈਆਂ ਦੀ ਮੁਹਾਰਤ ਦਾ ਬਿਹਤਰ ਇਸਤੇਮਾਲ ਕਰਨਾ, ਕਾਰਜਾਂ ਵਿਚ ਤਾਲਮੇਲ ਵਧਾਉਣਾ ਅਤੇ ਗਾਹਕਾਂ ਤੇ ਡੀਲਰਾਂ ਨੂੰ ਹੋਰ ਬਿਹਤਰ ਸੇਵਾਵਾਂ ਪ੍ਰਦਾਨ ਕਰਨਾ ਹੈ। ਨਿਪੌਨ ਪੇਂਟ ਇੰਡੀਆ ਦੀ ਨਿਵੇਸ਼ ਰਣਨੀਤੀ ਵਿਚ ਨਿਰਮਾਣ ਸਮਰੱਥਾ ਦਾ ਵਿਸਥਾਰ, ਐਨ.ਈ.ਓ. ਹੋਮਜ਼ ਰਾਹੀਂ ਰਿਟੇਲ ਨੈੱਟਵਰਕ ਅਤੇ ਗਾਹਕਾਂ ਦੇ ਤਜਰਬੇ ਨੂੰ ਬਿਹਤਰ ਬਣਾਉਣਾ ਅਤੇ ਪੇਂਟਰਾਂ ਤੇ ਐਪਲੀਕੇਟਰਾਂ ਦੇ ਵਿਕਾਸ ’ਤੇ ਵਿਸ਼ੇਸ਼ ਜ਼ੋਰ ਸ਼ਾਮਿਲ ਹੈ।
