ਨੰਗਲ, 25 ਜਨਵਰੀ (ਪ੍ਰੀਤਮ ਸਿੰਘ ਬਰਾਰੀ) - ਐਸ.ਐਮ.ਆਰ.ਵੀ.ਐਮ.ਸੀਨੀਅਰ ਸੈਕੰਡਰੀ ਸਕੂਲ, ਨਯਾ ਨੰਗਲ ਵੱਲੋਂ 'ਸਾਈਬਰ ਸੁਰੱਖਿਆ' ਵਿਸ਼ੇ 'ਤੇ ਇੱਕ ਸੈਮੀਨਾਰ ਦਾ ਆਯੋਜਨ ਕਰਵਾਇਆ ਗਿਆ | ਮੁੱਖ ਬੁਲਾਰੇ ਵੱਜੋ ਸ੍ਰੀਮਤੀ ਪੂਨਮ ਡੋਗਰਾ (ਪਿ੍ੰਸੀਪਲ, ਸੇਂਟ ਕਾਰਮੇਲ ਸਕੂਲ, ਕਟਲੀ) ਅਤੇ ਸ੍ਰੀਮਤੀ ਸਨੇਹ ਲਤਾ (ਸੇਂਟ ਐਨਜ਼ਲ ਕਾਨਵੈਂਟ ਸਕੂਲ, ਚੰਡੀਗੜ੍ਹ) ਦੀ ਟੀਮ ਪਹੁੰਚੀ ਹੋਈ ਸੀ, ਜੋ ਸੀ.ਬੀ.ਐਸ.ਈ. ਦੁਆਰਾ ਅਧਿਕਾਰਤ ਸੀ | ਅੱਜ ਦੇ ਮੋਬਾਈਲ ਫੋਨਾਂ ਅਤੇ ਆਨਲਾਈਨ ਲੈਣ-ਦੇਣ ਦੇ ਯੁੱਗ ਵਿਚ, ਇਹ ਸੈਮੀਨਾਰ ਬਹੁਤ ਮਹੱਤਵਪੂਰਨ ਅਤੇ ਜਾਣਕਾਰੀ ਭਰਪੂਰ ਸੀ | ਇਸ ਸੈਮੀਨਾਰ ਦਾ ਮੁੱਖ ਉਦੇਸ਼ ਅਧਿਆਪਕਾਂ ਅਤੇ ਵਿਦਿਆਰਥੀਆਂ ਵਿਚ ਸਾਈਬਰ ਸੁਰੱਖਿਆ ਬਾਰੇ ਜਾਗਰੂਕਤਾ ਪੈਦਾ ਕਰਨਾ ਸੀ, ਤਾਂ ਜੋ ਕੋਈ ਵੀ ਸਾਈਬਰ ਧੋਖਾਧੜੀ ਦਾ ਸ਼ਿਕਾਰ ਨਾ ਹੋਵੇ | ਸੈਮੀਨਾਰ ਨੇ ਸਾਈਬਰ ਅਪਰਾਧ ਦੇ ਵਧ ਰਹੇ ਪ੍ਰਚਲਣ ਅਤੇ ਕਿਵੇਂ ਸਾਈਬਰ ਅਪਰਾਧੀ ਲੋਕਾਂ ਨੂੰ ਗੁਮਰਾਹ ਕਰਦੇ ਹਨ ਅਤੇ ਆਪਣੇ ਜਾਲ ਵਿਚ ਫਸਾਉਂਦੇ ਹਨ, ਉਨ੍ਹਾਂ ਨੂੰ ਮਾਨਸਿਕ ਤੇ ਸਰੀਰਕ ਪਰੇਸ਼ਾਨੀ ਦਾ ਸ਼ਿਕਾਰ ਬਣਾਉਂਦੇ ਹਨ ਤੇ ਮਾਸੂਮ ਲੋਕਾਂ ਨੂੰ ਡਰਾਉਂਦੇ ਹਨ, ਇਸ ਬਾਰੇ ਚਾਨਣਾ ਪਾਇਆ | ਸੈਮੀਨਾਰ ਵਿਚ ਇਹ ਵੀ ਦੱਸਿਆ ਗਿਆ ਕਿ ਸਾਈਬਰ ਅਪਰਾਧ ਤੋਂ ਕਿਵੇਂ ਬਚਣਾ ਹੈ, ਜੇਕਰ ਕੋਈ ਗ਼ਲਤੀ ਨਾਲ ਇਸ ਵਿਚ ਫਸ ਜਾਂਦਾ ਹੈ ਤਾਂ ਕਿਵੇਂ ਬਾਹਰ ਨਿਕਲਣਾ ਹੈ, ਅਤੇ ਪੁਲਿਸ ਅਤੇ ਪ੍ਰਸ਼ਾਸਨ ਇਸ ਵਿਚ ਸਾਡੀ ਕਿਵੇਂ ਮਦਦ ਕਰਦੇ ਹਨ | ਇਸ ਮੌਕੇ ਸਕੂਲ ਦੇ ਜਨਰਲ ਮੈਨੇਜਰ ਸੋਮੇਸ਼ ਸ਼ਰਮਾ, ਪਿ੍ੰਸੀਪਲ ਮਦਨ ਲਾਲ ਸ਼ਰਮਾ, ਵਾਈਸ ਪਿ੍ੰਸੀਪਲ, ਸ੍ਰੀਮਤੀ ਸ਼ਿਵਾਨੀ ਸ਼ਰਮਾ, ਸਕੂਲ ਕੋਆਰਡੀਨੇਟਰ, ਸੁਰੇਂਦਰ ਰਾਤਰਾ, ਰਣਜੀਤ ਕੌਰ, ਅਤੇ ਨਾਲ ਹੀ ਊਨਾ ਨੰਗਲ ਸਕੂਲ ਦੇ ਸਾਰੇ ਅਧਿਆਪਕਾਂ ਨੇ ਮਹੱਤਵਪੂਰਨ ਜਾਣਕਾਰੀ ਪ੍ਰਾਪਤ ਕੀਤੀ ਅਤੇ ਆਉਣ ਵਾਲੀ ਟੀਮ ਦਾ ਧੰਨਵਾਦ ਕੀਤਾ |
