ਪੁਰਖਾਲੀ, 16 ਜੁਲਾਈ (ਅੰਮ੍ਰਿਤਪਾਲ ਸਿੰਘ ਬੰਟੀ)-ਪਿਛਲੇ ਦਿਨੀਂ ਆਈ. ਆਈ. ਟੀ. ਰੋਪੜ ਟੈਕਨਾਲੋਜੀ ਬਿਜ਼ਨਸ ਇਨਕਿਊਬੇਟਰ ਫਾਊਂਡੇਸ਼ਨ (ਟੀ.ਬੀ.ਆਈ.ਐੱਫ.) ਅਤੇ ਆਈ. ਈ. ਟੀ. ਭੱਦਲ ਟੈਕਨੀਕਲ ਕੈਂਪਸ ਵਿਚਕਾਰ ਨਵੀਨਤਾ, ਖੋਜ ਅਤੇ ਉਦਯਮਤਾ ਨੂੰ ਉਤਸ਼ਾਹਿਤ ਕਰਨ ਲਈ ਇੱਕ ਮਹੱਤਵਪੂਰਨ ਸਮਝੌਤਾ ਸਹੀ ਬੱਧ ਕੀਤਾ ਗਿਆ ਸੀ। ਇਸ ਸਮਝੌਤੇ ਦੇ ਸਿੱਟੇ ਵਜੋਂ ਕਾਲਜ ਦੇ ਵਿਦਿਆਰਥੀ ਓਮ ਆਂਦਰੀ ਵਲੋਂ ਡਾ. ਤਰਨਜੀਤ ਕੌਰ, ਡੀਨ–ਰਿਸਰਚ ਦੇ ਮਾਰਗ ਦਰਸ਼ਨ ਹੇਠ ਐਂਡ੍ਰਿਨੋਵਾ ਪ੍ਰਾਈਵੇਟ ਲਿਮਟਿਡ ਨਾਮਕ ਇੱਕ ਸਟਾਰਟਅੱਪ ਕੰਪਨੀ ਦੀ ਸਥਾਪਨਾ ਕੀਤੀ ਗਈ ਹੈ, ਜਿਸ ਨੂੰ ਹੁਣ ਆਈ. ਆਈ. ਟੀ. ਰੋਪੜ ਟੀ.ਬੀ. ਆਈ. ਐੱਫ. ਅਤੇ ਆਈ. ਈ. ਟੀ. ਭੱਦਲ ਟੈਕਨੀਕਲ ਕੈਂਪਸ ਦੇ ਸਾਂਝੇ ਇਨਕਿਊਬੇਸ਼ਨ ਪ੍ਰੋਗਰਾਮ ਅਧੀਨ ਇਨਕਿਊਬੇਟ ਕੀਤਾ ਜਾਵੇਗਾ। ਐਂਡ੍ਰਿਨੋਵਾ ਪ੍ਰਾਈਵੇਟ ਲਿਮਟਿਡ ਇੱਕ ਉਭਰਦੀ ਹੋਈ ਤਕਨਾਲੋਜੀ ਆਧਾਰਿਤ ਕੰਪਨੀ ਹੈ, ਜੋ ਆਰਟੀਫ਼ੀਸ਼ੀਅਲ ਇੰਟੈਲੀਜੈਂਸ, ਮਸ਼ੀਨ ਲਰਨਿੰਗ, ਸਾਈਬਰ ਸੁਰੱਖਿਆ, ਇੰਟਰਨੈੱਟ ਆਫ਼ ਥਿੰਗਜ਼ (ਆਈ.ਓ.ਟੀ.), ਬਾਇਓਟੈਕਨਾਲੋਜੀ, ਡਿਫੈਂਸ ਟੈਕਨਾਲੋਜੀ, ਪਬਲਿਕ ਸੇਫ਼ਟੀ ਸਲਿਊਸ਼ਨਜ਼ ਅਤੇ ਐਡਵਾਂਸਡ ਡਿਜੀਟਲ ਸਿਸਟਮਜ਼ ਵਰਗੇ ਅਤਿ-ਆਧੁਨਿਕ ਖੇਤਰਾਂ ਵਿਚ ਖੋਜ ਅਤੇ ਵਿਕਾਸ ਕਾਰਜਾਂ ਨਾਲ ਜੁੜੀ ਹੋਈ ਹੈ। ਕੰਪਨੀ ਦਾ ਉਦੇਸ਼ ਸਮਾਜ ਅਤੇ ਉਦਯੋਗ ਦੀਆਂ ਮੌਜੂਦਾ ਚੁਣੌਤੀਆਂ ਲਈ ਤਕਨਾਲੋਜੀ ਆਧਾਰਿਤ ਨਵੀਨ ਹੱਲ ਵਿਕਸਿਤ ਕਰਨਾ ਹੈ। ਇਸ ਮੌਕੇ ਡਾ. ਐੱਸ. ਐੱਸ. ਬਿੰਦਰਾ, ਡਾਇਰੈਕਟਰ ਕੈਂਪਸ ਨੇ ਕਿਹਾ ਕਿ ਇਹ ਪ੍ਰਾਪਤੀ ਨਾ ਸਿਰਫ਼ ਕਾਲਜ ਦੇ ਵਿਦਿਆਰਥੀ ਦੀ ਪ੍ਰਤਿਭਾ, ਮਿਹਨਤ ਅਤੇ ਨਵੀਨ ਸੋਚ ਦਾ ਪ੍ਰਤੀਕ ਹੈ, ਸਗੋਂ ਇਹ ਆਈ. ਈ. ਟੀ. ਭੱਦਲ ਟੈਕਨੀਕਲ ਕੈਂਪਸ ਵਿਚ ਵਿਕਸਤ ਹੋ ਰਹੇ ਸਟਾਰਟ ਅੱਪ ਅਤੇ ਇਨੋਵੇਸ਼ਨ ਇਕੋਸਿਸਟਮ ਦੀ ਵੀ ਵੱਡੀ ਸਫ਼ਲਤਾ ਹੈ। ਡਾ. ਗੁਰਪ੍ਰੀਤ ਸਿੰਘ ਡਾਇਰੈਕਟਰ ਅਕਾਦਮਿਕ ਨੇ ਕਿਹਾ ਕਿ ਆਈ. ਈ. ਟੀ. ਭੱਦਲ ਟੈਕਨੀਕਲ ਕੈਂਪਸ ਲਗਾਤਾਰ ਉਦਯੋਗਿਕ ਸਹਿਯੋਗ, ਖੋਜ ਤੇ ਨਵੀਨਤਾ ਕਰਨ ਲਈ ਵਚਨਬੱਧ ਹੈ।
