ਉਪ ਮੁੱਖ ਮੰਤਰੀ ਮੁਕੇਸ਼ ਅਗਨੀਹੋਤਰੀ ਨੇ ਈ-ਬੱਸ ਡਿਪੂ ਤੇ ਐਚ. ਆਰ. ਟੀ. ਸੀ. ਖੇਤਰੀ ਦਫ਼ਤਰ ਦਾ ਕੀਤਾ ਉਦਘਾਟਨ
ਸੰਤੋਖਗੜ੍ਹ , 2 ਅਗਸਤ (ਧਰਮ ਪਾਲ)- ਉਪ ਮੁੱਖ ਮੰਤਰੀ ਮੁਕੇਸ਼ ਅਗਨੀਹੋਤਰੀ ਨੇ ਅੱਜ ਹਰੋਲੀ ਵਿਚ ਹਿਮਾਚਲ ਰੋਡ ਟਰਾਂਸਪੋਰਟ ਕਾਰਪੋਰੇਸ਼ਨ ਦੇ ਹਿਮਾਚਲ ਪ੍ਰਦੇਸ਼ ਦੇ ਪਹਿਲੇ ਈ-ਬੱਸ ਡਿਪੂ ਅਤੇ ਐਚ. ਆਰ.
ਹ
ਹਰੌਲੀ ਵਿਖੇ ਈ ਬੱਸਾਂ ਨੂੰ ਹਰੀ ਝੰਡੀ ਵਿਖਾ ਕੇ ਰਵਾਨਾ ਕਰਦੇ ਹੋਏ ਉਪ ਮੁੱਖ ਮੰਤਰੀ ਹਿਮਾਚਲ ਪ੍ਰਦੇਸ਼ ਮੁਕੇਸ਼ ਅਗਨੀਹੋਤਰੀ ਅਤੇ ਹਾਜ਼ਰ ਹੋਰ। ਤਸਵੀਰ: ਚੌਧਰੀ ਧਰਮ ਪਾਲ
03-08-2026
ਸੰਤੋਖਗੜ੍ਹ , 2 ਅਗਸਤ (ਧਰਮ ਪਾਲ)- ਉਪ ਮੁੱਖ ਮੰਤਰੀ ਮੁਕੇਸ਼ ਅਗਨੀਹੋਤਰੀ ਨੇ ਅੱਜ ਹਰੋਲੀ ਵਿਚ ਹਿਮਾਚਲ ਰੋਡ ਟਰਾਂਸਪੋਰਟ ਕਾਰਪੋਰੇਸ਼ਨ ਦੇ ਹਿਮਾਚਲ ਪ੍ਰਦੇਸ਼ ਦੇ ਪਹਿਲੇ ਈ-ਬੱਸ ਡਿਪੂ ਅਤੇ ਐਚ.ਆਰ.ਟੀ.ਸੀ. ਖੇਤਰੀ ਦਫ਼ਤਰ ਦਾ ਉਦਘਾਟਨ ਕੀਤਾ। ਇਸ ਮੌਕੇ ਉਨ੍ਹਾਂ ਨੇ ਇੱਕ ਈ-ਚਾਰਜਿੰਗ ਸਟੇਸ਼ਨ ਲਾਂਚ ਕੀਤਾ ਚਾਰ ਨਵੀਆਂ ਬੱਸ ਸੇਵਾਵਾਂ ਨੂੰ ਹਰੀ ਝੰਡੀ ਦਿਖਾਈ ਅਤੇ ਹਰੋਲੀ ਸ਼੍ਰੀ ਚਿੰਤਪੁਰਨੀ ਬੱਸ ਸੇਵਾ ਸ਼ੁਰੂ ਕਰਨ ਦਾ ਐਲਾਨ ਕੀਤਾ। ਇਸ ਮੌਕੇ ਹਰੋਲੀ ਬੱਸ ਸਟੈਂਡ ਕੰਪਲੈਕਸ ਵਿਖੇ ਇੱਕ ਜਨਤਕ ਮੀਟਿੰਗ ਨੂੰ ਸੰਬੋਧਨ ਕਰਦੇ ਹੋਏ ਉਪ ਮੁੱਖ ਮੰਤਰੀ ਨੇ ਕਿਹਾ ਕਿ ਰਾਜ ਦੇ ਬੇੜੇ ਵਿਚ ਸ਼ਾਮਲ ਕੀਤੀਆਂ ਜਾ ਰਹੀਆਂ 297 ਇਲੈਕਟ੍ਰਿਕ ਬੱਸਾਂ ਵਿਚੋਂ 115 ਹਮੀਰਪੁਰ ਸੰਸਦੀ ਹਲਕੇ ਨੂੰ ਅਲਾਟ ਕੀਤੀਆਂ ਗਈਆਂ ਹਨ। ਉਨ੍ਹਾਂ ਦੱਸਿਆ ਕਿ ਹਰੋਲੀ ਵਿਚ ਸੂਬੇ ਦੇ ਪਹਿਲੇ ਈ-ਬੱਸ ਡਿਪੂ ਤੋਂ 20 ਇਲੈਕਟ੍ਰਿਕ ਬੱਸਾਂ ਚੱਲਣਗੀਆਂ ਜਦੋਂ ਕਿ ਊਨਾ ਜ਼ਿਲ੍ਹੇ ਵਿਚ ਕੁੱਲ 50 ਇਲੈਕਟ੍ਰਿਕ ਬੱਸਾਂ ਚੱਲਣਗੀਆਂ। ਉਨ੍ਹਾਂ ਕਿਹਾ ਕਿ ਆਧੁਨਿਕ ਆਵਾਜਾਈ ਸਹੂਲਤਾਂ ਦੇ ਵਿਸਥਾਰ ਨਾਲ ਹਰੋਲੀ ਰਾਜ ਵਿਚ ਜਨਤਕ ਆਵਾਜਾਈ ਲਈ ਇੱਕ ਮੁੱਖ ਹੱਬ ਵਜੋਂ ਉੱਭਰ ਰਿਹਾ ਹੈ। ਇਸ ਮੌਕੇ ਉਨ੍ਹਾਂ ਚਿੰਤਪੁਰਨੀ ਦੇ ਵਿਧਾਇਕ ਸੁਦਰਸ਼ਨ ਬਬਲੂ ਦੀ ਬੇਨਤੀ ‘ਤੇ ਉਪ ਮੁੱਖ ਮੰਤਰੀ ਨੇ ਐਲਾਨ ਕੀਤਾ ਕਿ ਅੰਬ ਬੱਸ ਸਟੈਂਡ ਦੀ ਉਸਾਰੀ ਇੱਕ ਸਾਲ ਦੇ ਅੰਦਰ ਪੂਰੀ ਕਰ ਲਈ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਮਾਤਾ ਸ਼੍ਰੀ ਚਿੰਤਪੁਰਨੀ ਮੰਦਰ ਦੀ ਮੁਰੰਮਤ ਜਿਸਦੀ ਲਾਗਤ ਲਗਭਗ 250 ਕਰੋੜ ਹੋਣ ਦਾ ਅਨੁਮਾਨ ਹੈ ਜਲਦੀ ਹੀ ਸ਼ੁਰੂ ਹੋ ਜਾਵੇਗੀ। ਉਪ ਮੁੱਖ ਮੰਤਰੀ ਨੇ ਕਿਹਾ ਕਿ ਰਾਜ ਸਰਕਾਰ ਹਰੋਲੀ ਵਿਚ ਵਿਕਸਤ ਕੀਤੇ ਜਾ ਰਹੇ ਬਲਕਿ ਡਰੱਗ ਪਾਰਕ ਲਈ 1,000 ਕਰੋੜ ਪ੍ਰਦਾਨ ਕਰੇਗੀ। ਇਸ ਤੋਂ ਇਲਾਵਾ ਜ਼ਿਲ੍ਹੇ ਵਿਚ ਇੱਕ ਟਾਇਰ ਰੀਟਰੇਡਿੰਗ ਪਲਾਂਟ ਸਥਾਪਤ ਕੀਤਾ ਜਾਵੇਗਾ। ਇਸ ਮੌਕੇ ‘ਤੇ ਬੋਲਦਿਆਂ ਚਿੰਤਪੁਰਨੀ ਦੇ ਵਿਧਾਇਕ ਸੁਦਰਸ਼ਨ ਬਬਲੂ ਨੇ ਹਰੋਲੀ ਵਿਚ ਰਾਜ ਦੇ ਪਹਿਲੇ ਈ-ਬੱਸ ਡਿਪੂ ਅਤੇ ਖੇਤਰੀ ਦਫ਼ਤਰ ਦੀ ਸਥਾਪਨਾ ਨੂੰ ਸਥਾਨਕ ਖੇਤਰ ਅਤੇ ਪੂਰੇ ਰਾਜ ਦੋਵਾਂ ਲਈ ਇੱਕ ਮਹੱਤਵਪੂਰਨ ਪ੍ਰਾਪਤੀ ਦੱਸਿਆ। ਇਸ ਮੌਕੇ ਡੇਰਾ ਬਾਬਾ ਸੋਮਨਾਥ ਦੇ ਮਹੰਤ ਬਾਬਾ ਸ਼ਿਵਨਾਥ, ਸੂਬਾ ਕਾਂਗਰਸ ਕਮੇਟੀ ਦੇ ਜਨਰਲ ਸਕੱਤਰ ਰਣਜੀਤ ਸਿੰਘ ਰਾਣਾ, ਜ਼ਿਲ੍ਹਾ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਦੇਸਰਾਜ ਗੌਤਮ, ਸੰਦੀਪ ਅਗਨੀਹੋਤਰੀ, ਜ਼ਿਲ੍ਹਾ ਪ੍ਰੀਸ਼ਦ ਮੈਂਬਰ ਕੇਵਲ ਸਿੰਘ ਔਜਲਾ, ਸੁਲਿੰਦਰ ਪਾਲ ਕੌਰ ਅਤੇ ਜੋਤੀ ਬਾਲਾ, ਮਹਿਲਾ ਕਾਂਗਰਸ ਜ਼ਿਲ੍ਹਾ ਪ੍ਰਧਾਨ ਸੁਮਨ ਠਾਕੁਰ, ਅਸ਼ੋਕ ਠਾਕੁਰ, ਸਤੀਸ਼ ਬਿੱਟੂ, ਡੀ.ਸੀ. ਜਤਿਨ ਲਾਲ, ਹਰੋਲੀ ਦੇ ਐਸ.ਡੀ.ਐਮ. ਵਿਸ਼ਾਲ ਸ਼ਰਮਾ, ਡੀ.ਐਸ.ਪੀ. ਮੋਹਨ ਰਾਵਤ, ਐਚ.ਆਰ.ਟੀ.ਸੀ. ਦੇ ਚੀਫ਼ ਜਨਰਲ ਮੈਨੇਜਰ ਪੰਕਜ ਸਿੰਘ, ਜਨਰਲ ਮੈਨੇਜਰ ਪਵਨ ਮਹਾਜਨ ਅਤੇ ਡੀਐਮ ਰਾਜਕੁਮਾਰ ਪਾਠਕ ਤੋਂ ਇਲਾਵਾ ਵੱਡੀ ਗਿਣਤੀ ਪਤਵੰਤੇ ਤੇ ਅਧਿਕਾਰੀ ਹਾਜ਼ਰ ਸਨ।
