ਨਵੀਂ ਦਿੱਲੀ, 24 ਜਨਵਰੀ (ਉਪਮਾ ਡਾਗਾ ਪਾਰਥ)-ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸਨਿਚਰਵਾਰ ਨੂੰ ਵੀਡਿਓ ਕਾਨਫਰੰਸਿੰਗ ਰਾਹੀਂ 18ਵੇਂ ਰੁਜ਼ਗਾਰ ਮੇਲੇ 'ਚ 61 ਹਜ਼ਾਰ ਨਿਯੁਕਤੀ ਪੱਤਰ ਵੰਡੇ | ਇਹ ਨਿਯੁਕਤੀਆਂ ਗ੍ਰਹਿ ਮੰਤਰਾਲੇ, ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ, ਵਿੱਤ ਸੇਵਾ ਵਿਭਾਗ ਸਮੇਤ ਵੱਖ-ਵੱਖ ਮੰਤਰਾਲਿਆਂ ਅਤੇ ਵਿਭਾਗਾਂ 'ਚ ਕੀਤੀਆਂ ਜਾਣਗੀਆਂ | ਪ੍ਰਧਾਨ ਮੰਤਰੀ ਨੇ ਇਸ ਦੌਰਾਨ ਨੌਜਵਾਨਾਂ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਅੱਜ ਤੁਹਾਨੂੰ ਸਾਰਿਆਂ ਨੂੰ ਸਰਕਾਰੀ ਸੇਵਾਵਾਂ ਦੇ ਜੋ ਨਿਯੁਕਤੀ ਪੱਤਰ ਮਿਲ ਰਹੇ ਹਨ, ਇਹ ਇਕ ਤਰ੍ਹਾਂ ਨਾਲ ਰਾਸ਼ਟਰ ਨਿਰਮਾਣ ਦਾ ਸੱਦਾ ਪੱਤਰ ਹੈ | ਇਹ ~'ਵਿਕਸਿਤ ਭਾਰਤ' ਦੇ ਨਿਰਮਾਣ ਨੂੰ ਗਤੀ ਦੇਣ ਦਾ ਸੰਕਲਪ ਪੱਤਰ ਹੈ | ਮੋਦੀ ਨੇ ਕਿਹਾ ਕਿ ਤੇਜ਼ੀ ਨਾਲ ਬਦਲਦੀ ਤਕਨੋਲੋਜੀ ਦੇ ਇਸ ਦੌਰ 'ਚ ਦੇਸ਼ ਦੀਆਂ ਜ਼ਰੂਰਤਾਂ ਅਤੇ ਤਰਜੀਹਾਂ ਵੀ ਤੇਜ਼ੀ ਨਾਲ ਬਦਲ ਰਹੀਆਂ ਰਹੀਆਂ ਹਨ | ਇਸ ਤੇਜ਼ ਬਦਲਾਅ ਨਾਲ ਤੁਸੀਂ ਖ਼ੁਦ ਨੂੰ ਅਪਗ੍ਰੇਡ ਕਰਦੇ ਰਹਿਣਾ | ਉਨ੍ਹਾਂ ਕਿਹਾ ਕਿ ਅੱਜ ਦੇਸ਼ ਰਿਫਾਰਮ ਐਕਸਪ੍ਰੈੱਸ 'ਤੇ ਚੱਲ ਪਿਆ ਹੈ | ਇਸਦਾ ਉਦੇਸ਼ ਦੇਸ਼ 'ਚ ਜੀਵਨ ਅਤੇ ਕਾਰੋਬਾਰ ਦੋਹਾਂ ਨੂੰ ਸੁਖਾਲਾ ਬਣਾਉਣ ਦਾ ਹੈ | ਪ੍ਰਧਾਨ ਮੰਤਰੀ ਨੇ ਸਟਾਰਟਅੱਪ ਅਤੇ ਉਨ੍ਹਾਂ 'ਚ ਵਧ ਰਹੀ ਔਰਤਾਂ ਦੀ ਭਾਗੀਦਾਰੀ ਦਾ ਵੀ ਜ਼ਿਕਰ ਕਰਦਿਆਂ ਕਿਹਾ ਕਿ ਭਾਰਤ 'ਚ ਸਟਾਰਟ ਅੱਪ ਈਕੋਸਿਸਟਮ ਦਾ ਦਾਇਰਾ ਵੱਧ ਰਿਹਾ ਹੈ | ਦੇਸ਼ 'ਚ ਦੋ ਲੱਖ ਰਜਿਸਟਰਡ ਸਟਾਰਟਅੱਪ 'ਚ 21 ਲੱਖ ਨੌਜਵਾਨ ਕੰਮ ਕਰ ਰਹੇ ਹਨ | ਕਈ ਔਰਤਾਂ ਵੀ ਸਟਾਰਟ ਅੱਪ 'ਚ ਡਾਇਰੈਕਟਰ ਹਨ | ਔਰਤਾਂ ਦੇ ਸਵੈਰੁਜ਼ਗਾਰ ਦੀ ਦਰ 'ਚ 15 ਫ਼ੀਸਦੀ ਦਾ ਵਾਧਾ ਹੋਇਆ ਹੈ |
