ਚੰਡੀਗੜ੍ਹ, 11 ਅਪ੍ਰੈਲ (ਪ੍ਰੋ. ਅਵਤਾਰ ਸਿੰਘ)-ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਨੇ 'ਡਿਜੀਟਲ ਗਿ੍ਫ਼ਤਾਰੀ' ਸਾਈਬਰ ਠੱਗੀ ਮਾਮਲੇ 'ਚ ਅਹਿਮ ਟਿੱਪਣੀਆਂ ਕਰਦਿਆਂ ਦੋਸ਼ੀ ਨੂੰ ਨਿਯਮਤ ਜ਼ਮਾਨਤ ਦੇ ਦਿੱਤੀ ਹੈ | ਅਦਾਲਤ ਨੇ ਸਪਸ਼ਟ ਕੀਤਾ ਕਿ ਦੋਸ਼ਾਂ ਦੀ ਗੰਭੀਰਤਾ ਦੇ ਬਾਵਜੂਦ ਦੋਸ਼ੀਆਂ ਦੀ ਭੂਮਿਕਾ ਸੀਮਤ ਤੇ ਜਾਂਚ ਪੂਰੀ ਹੋਣ ਦੇ ਮੱਦੇਨਜ਼ਰ ਉਸ ਦੀ ਲਗਾਤਾਰ ਹਿਰਾਸਤ ਉਚਿੱਤ ਨਹੀਂ ਹੈ | ਜਸਟਿਸ ਮਨੀਸ਼ਾ ਬੱਤਰਾ ਦੀ ਸਿੰਗਲ ਬੈਂਚ ਦੋਸ਼ੀ ਵਿਕਰਮ ਸਿੰਘ ਦੀ ਪਟੀਸ਼ਨ 'ਤੇ ਸੁਣਵਾਈ ਕਰ ਰਹੀ ਸੀ | ਇਹ ਮਾਮਲਾ ਇਕ ਸਾਈਬਰ ਠੱਗੀ ਨਾਲ ਸਬੰਧਿਤ ਹੈ ਜਿਸ 'ਚ ਇੱਕ ਸੇਵਾਮੁਕਤ ਪਿ੍ੰਸੀਪਲ ਨੂੰ ਵੀਡੀਓ ਕਾਲਾਂ ਤੇ ਫੋਨ ਕਾਲਾਂ ਰਾਹੀਂ 'ਡਿਜੀਟਲ ਗਿ੍ਫ਼ਤਾਰੀ' ਦੇ ਅਧੀਨ ਰੱਖ ਕੇ ਲਗਭਗ 3.03 ਕਰੋੜ ਦੀ ਠੱਗੀ ਮਾਰੀ ਗਈ ਸੀ | ਅਦਾਲਤ ਨੇ ਸਵੀਕਾਰ ਕੀਤਾ ਕਿ ਦੋਸ਼ੀ ਦੀ ਪੀੜਤ ਨਾਲ ਸੰਪਰਕ ਕਰਨ ਜਾਂ ਧਮਕੀ ਦੇਣ 'ਚ ਕੋਈ ਸਿੱਧੀ ਭੂਮਿਕਾ ਨਹੀਂ ਪਾਈ ਗਈ |
