ਸਮਾਣਾ, 21 ਅਪ੍ਰੈਲ (ਸਾਹਿਬ ਸਿੰਘ)-ਬੀਤੇ ਦਿਨ ਗੁਰਦੁਆਰਾ ਯਾਦਗਾਰ ਅਨਾਮ ਸਿੱਖ ਸ਼ਹੀਦਾਂ ਢੈਂਠਲ ਵਿਖੇ ਸਾਬਕਾ ਜਥੇਦਾਰ ਸ੍ਰੀ ਦਮਦਮਾ ਸਾਹਿਬ ਗਿਆਨੀ ਕੇਵਲ ਸਿੰਘ ਅਤੇ ਸਾਬਕਾ ਗ੍ਰੰਥੀ ਸ੍ਰੀ ਦਰਬਾਰ ਸਾਹਿਬ ਗਿਆਨੀ ਜਗਤਾਰ ਸਿੰਘ ਦੀ ਅਗਵਾਈ ਵਿਚ ਨਾਨਕਸ਼ਾਹੀ ਕੈਲੰਡਰ 'ਤੇ ਦੇਰ ਸ਼ਾਮ ਤੱਕ ਚੱਲੀ ਚਰਚਾ ਰਾਹੀਂ ਸਿੱਖ ਵਿਦਵਾਨ ਇਕ ਵਾਰ ਫੇਰ ਮੂਲ ਨਾਨਕਸ਼ਾਹੀ ਕੈਲੰਡਰ ਦੇ ਮੁੱਦੇ ਨੂੰ ਭਾਰੀ ਗਿਣਤੀ ਵਿਚ ਪਹੁੰਚੇ ਵਿਦਵਾਨਾਂ ਦੀ ਸਹਿਮਤੀ ਨਾਲ ਪੰਥ ਵਿਚ ਉਭਾਰਨ ਵਿਚ ਕਾਮਯਾਬ ਰਹੇ ਹਨ | ਪੂਰੇ ਭਾਰਤ ਤੋਂ ਹੁੰਮ ਹੁੰਮਾਂ ਕੇ ਪਹੁੰਚੇ ਵਿਦਵਾਨਾਂ ਨੇ ਸਰਬ-ਸੰਮਤੀ ਨਾਲ 6 ਮਤੇ ਪਾਸ ਕੀਤੇ | ਗਿ. ਕੇਵਲ ਸਿੰਘ ਨੇ ਦੱਸਿਆ ਕਿ ਨਾਨਕਸ਼ਾਹੀ ਕੈਲੰਡਰ ਦਮਦਮਾ ਸਾਹਿਬ ਤੇ ਦੂਜੀ ਵਾਰ ਸ੍ਰੀ ਅਕਾਲ ਤਖਤ ਸਾਹਿਬ ਤੋਂ ਲਾਗੂ ਹੋ ਚੁੱਕਾ ਹੈ ਪਰ ਲਾਗੂ ਕਰਨ ਵਾਲੀਆਂ ਸੰਸਥਾਵਾਂ ਹੀ ਇਸ 'ਤੇ ਕਾਇਮ ਨਹੀਂ ਰਹਿ ਸਕੀਆਂ, ਜਿਸ ਪਿੱਛੇ ਸਿੱਖ ਵਿਰੋਧੀ ਤਾਕਤਾਂ ਦਾ ਵੱਡਾ ਹੱਥ ਸਾਹਮਣੇ ਆਇਆ ਸੀ | ਸੰਵਾਦ ਤੋਂ ਬਾਅਦ ਸਰਬ ਸੰਮਤੀ ਨਾਲ ਜੈਕਾਰਿਆਂ ਦੀ ਗੂੰਜ ਵਿਚ 6 ਮਤੇ ਪਾਸ ਕੀਤੇ ਗਏ | ਪਹਿਲੇ ਮਤੇ ਵਿਚ ਸੰਵਾਦ ਕਰਵਾਉਣ ਲਈ ਭਾਈ ਅਤਿੰਦਰਪਾਲ ਦਾ ਧੰਨਵਾਦ ਕੀਤਾ ਗਿਆ ਹੈ | ਦੂਸਰੇ ਮਤੇ ਵਿਚ ਕਿ ਸ. ਪਾਲ ਸਿੰਘ ਪੁਰੇਵਾਲ ਵਲੋਂ ਪੇਸ਼ ਕੀਤਾ ਗਿਆ ਮੂਲ ਨਾਨਕਸ਼ਾਹੀ ਕੈਲੰਡਰ ਹੀ ਇਕੋ-ਇਕ ਇਤਿਹਾਸਕ ਤੇ ਵਿਗਿਆਨਕ ਰੂਪ ਵਿਚ ਸਹੀ ਸਿੱਖ ਕੈਲੰਡਰ ਹੈ, ਸਾਰੇ ਦਿਹਾੜੇ ਇਸ ਅਨੁਸਾਰ ਹੀ ਮਨਾਏ ਜਾਣ | ਚੌਥੇ ਮਤੇ ਵਿਚ ਅਪੀਲ ਕੀਤੀ ਜੇਕਰ ਸ਼੍ਰੋਮਣੀ ਕਮੇਟੀ ਸਮਝਦੀ ਹੈ ਕਿ ਉਨ੍ਹਾਂ ਵਲੋਂ ਜਾਰੀ ਕੀਤਾ ਜਾ ਰਿਹਾ ਮੌਜੂਦਾ ਕੈਲੰਡਰ ਹਰ ਪੱਖ ਤੋਂ ਠੀਕ ਹੈ ਤਾਂ ਸੈਮੀਨਾਰ ਵਾਲੀ ਧਿਰ ਨੂੰ ਮਿਲਣ ਦਾ ਸਮਾਂ ਦੇਵੇ | ਪੰਜਵੇਂ ਮਤੇ ਵਿਚ ਮੂਲ ਨਾਨਕਸ਼ਾਹੀ ਕੈਲੰਡਰ ਨੂੰ ਛਪਦਾ ਜਾਰੀ ਰੱਖਣ ਦੀ ਮੰਗ ਕੀਤੀ ਗਈ ਹੈ | ਛੇਵੇਂ ਮਤੇ ਵਿਚ ਕਿਹਾ ਗਿਆ ਹੈ ਕਿ ਨਾਨਕਸ਼ਾਹੀ ਕੈਲੰਡਰ ਨਾਲ ਅਸਹਿਮਤ ਧਿਰ ਨੂੰ ਅੱਜ ਦਾ ਇਹ ਇਕੱਠ ਅਪੀਲ ਕਰਦਾ ਹੈ ਕਿ ਜੇ ਉਹ ਨਾਨਕਸ਼ਾਹੀ ਕੈਲੰਡਰ ਤੋਂ ਵਧੀਆ ਕੈਲੰਡਰ ਬਣਾਉਣ ਦੇ ਸਮਰੱਥ ਹਨ ਤਾਂ ਉਹ ਨਵਾਂ ਕੈਲੰਡਰ ਕੌਮ ਦੇ ਸਾਹਮਣੇ ਰੱਖਣ |