ਨੌਜਵਾਨ ਨੇ ਐਲੀਵੇਟਿਡ ਰੋਡ ਤੋਂ ਛਾਲ ਮਾਰ ਕੇ ਕੀਤੀ ਖੁਦਕੁਸ਼ੀ

ਕੁਝ ਸਮਾਂ ਪਹਿਲਾਂ ਭਰਾ ਨੇ ਵੀ ਕਰ ਲਈ ਸੀ ਖੁਦਕੁਸ਼ੀ
ਅੰਮਿ੍ਤਸਰ, 8 ਮਈ (ਰੇਸ਼ਮ ਸਿੰਘ)-ਬੀਤੀ ਦੇਰ ਰਾਤ ਇਥੇ ਐਲੀਵੇਟਿਡ ਰੋਡ ਜੀ. ਟੀ. ਰੋਡ ਦੇ ਪੁੱਲ ਤੋਂ ਹੇਠਾਂ ਛਾਲ ਮਾਰ ਕੇ ਮਾਨਸਿਕ ਪ੍ਰੇਸ਼ਾਨੀ ਕਾਰਨ ਇਕ ਨੌਜਵਾਨ ਵਲੋਂ ਖੁਦਕੁਸ਼ੀ ਕਰ ਲਈ ਗਈ | ਪਰਿਵਾਰ ਦੀ ਤ੍ਰਾਸਦੀ ਇਹ ਹੈ ਕਿ ਮਿ੍ਤਕ ਦੇ ਸਕੇ ਭਰਾ ਵਲੋਂ ਵੀ ਕੁਝ ਸਮਾਂ ਪਹਿਲਾਂ ਖੁਦਕੁਸ਼ੀ ਕਰ ਲਈ ਗਈ ਸੀ | ਮਿ੍ਤਕ ਦੀ ਸ਼ਨਾਖਤ ਸ਼ੁਭ ਕੁਮਾਰ (20) ਪੱੁਤਰ ਦਲਜੀਤ ਸਿੰਘ ਵਾਸੀ ਮਕਬੂਲਪੁਰਾ ਮਹਿਤਾ ਰੋਡ ਵਜੋਂ ਹੋਈ ਹੈ | ਇਹ ਘਟਨਾ ਇਥੇ 100 ਫੁੱਟੀ ਰੋਡ ਨੇੜੇ ਜੇ.ਸੀ. ਮੋਟਰਜ਼ ਉਪਰੋਂ ਲੰਘਦੇ ਪੁੱਲ 'ਤੇ ਵਾਪਰੀ | ਵੇਰਵਿਆਂ ਅਨੁਸਾਰ ਮਿ੍ਤਕ ਨੌਜਵਾਨ ਜੋ ਈ. ਰਿਕਸ਼ਾ ਚਾਲਕ ਸੀ ਤੇ ਰਾਤ ਵੇਲੇ ਘਰੋਂ ਮੋਟਰਸਾਇਕਲ 'ਤੇ ਬਾਜ਼ਾਰ ਜਾਣ ਲਈ ਨਿਕਲਿਆ ਸੀ | ਉਪਰੰਤ ਇਸ ਨੇ ਮੋਟਸਾਇਕਲ ਪੁੱਲ ਉਪਰ ਖੜਾ ਕਰ ਦਿੱਤਾ ਤੇ ਹੇਠਾਂ ਛਾਲ ਮਾਰ ਦਿੱਤੀ | ਪਿੁਲਸ ਵਲੋਂ ਤੁਰੰਤ ਕਾਰਵਾਈ ਕਰਦਿਆਂ ਲਾਸ਼ ਦੀ ਸ਼ਨਾਖਤ ਕਰਵਾਈ ਗਈ | ਹਾਲਾਂਕਿ ਖੁਦਕੁਸ਼ੀ ਦੇ ਕਾਰਨਾਂ ਦਾ ਪਤਾ ਲਗਾਇਆ ਜਾ ਰਿਹਾ ਹੈ | ਥਾਣਾ ਬੀ. ਡਵੀਜ਼ਨ ਦੇ ਮੁਖੀ ਇੰਸ: ਬਲਜਿੰਦਰ ਸਿੰਘ ਨੇ ਦੱਸਿਆ ਕਿ ਮਿ੍ਤਕਾ ਦੀ ਭੈਣ ਨੀਤੂ ਦੇ ਬਿਆਨਾਂ 'ਤੇ ਕਾਰਵਾਈ ਕਰਦਿਆਂ ਪੁਲਿਸ ਵਲੋਂ ਪੋਸਟਮਾਰਟਮ ਕਰਵਾ ਕੇ ਲਾਸ਼ ਵਾਰਸਾਂ ਨੂੰ ਸੌਂਪ ਦਿੱਤੀ ਹੈ |