ਭਾਰਤ-ਅਫ਼ਗ਼ਾਨਿਸਤਾਨ ਸੀਰੀਜ਼ ਦੇ ਪ੍ਰੋਮੋ ਵੀਡੀਓ ’ਤੇ ਵਿਵਾਦ

ਅੰਮ੍ਰਿਤਸਰ, 8 ਸਤੰਬਰ (ਸੁਰਿੰਦਰ ਕੋਛੜ)-ਅਫ਼ਗ਼ਾਨਿਸਤਾਨ ਕ੍ਰਿਕਟ ਬੋਰਡ (ਏ. ਸੀ. ਬੀ.) ਵਲੋਂ ਭਾਰਤ ਖ਼ਿਲਾਫ਼ ਆਗਾਮੀ ਕ੍ਰਿਕਟ ਸੀਰੀਜ਼ ਲਈ ਜਾਰੀ ਕੀਤੇ ਗਏ ਇਕ ਪ੍ਰੋਮੋਸ਼ਨਲ ਵੀਡੀਓ ਨੇ ਪਾਕਿਸਤਾਨ ’ਚ ਨਾਰਾਜ਼ਗੀ ਪੈਦਾ ਕਰ ਦਿੱਤੀ ਹੈ। ਵੀਡੀਓ ’ਚ ਪਾਕਿ ਦੇ ਕਬਜ਼ੇ ਵਾਲੇ ਕਸ਼ਮੀਰ (ਪੀ. ਓ. ਕੇ.) ਅਤੇ ਗਿਲਗਿਤ-ਬਾਲਟਿਸਤਾਨ ਨੂੰ ਭਾਰਤ ਦੇ ਨਕਸ਼ੇ ’ਚ ਦਰਸਾਇਆ ਗਿਆ ਹੈ। ਇਸ ਤੋਂ ਬਾਅਦ ਪਾਕਿਸਤਾਨ ਕ੍ਰਿਕਟ ਬੋਰਡ (ਪੀ. ਸੀ. ਬੀ.) ਨੇ ਇਹ ਮਾਮਲਾ ਪਾਕਿ ਦੇ ਵਿਦੇਸ਼ ਮੰਤਰਾਲੇ ਕੋਲ ਉਠਾਇਆ ਹੈ। ਹਾਲਾਂਕਿ, ਪੀ. ਸੀ. ਬੀ. ਵਲੋਂ ਅਜੇ ਤੱਕ ਕਿਸੇ ਤਰ੍ਹਾਂ ਦਾ ਇਤਰਾਜ਼ ਦਰਜ ਨਹੀਂ ਕਰਵਾਇਆ ਗਿਆ ਹੈ। ਰਿਪੋਰਟਾਂ ਅਨੁਸਾਰ ਪਾਕਿ ਇਸ ਮੁੱਦੇ ਨੂੰ ਕੌਮਾਂਤਰੀ ਪੱਧਰ ’ਤੇ ਚੁੱਕਣ ’ਤੇ ਵਿਚਾਰ ਕਰ ਰਿਹਾ ਹੈ, ਪਰ ਅਜੇ ਤੱਕ ਉਸ ਨੇ ਕੋਈ ਰਸਮੀ ਕਦਮ ਨਹੀਂ ਚੁੱਕਿਆ ਹੈ। ਇਹ ਵਿਵਾਦ ਅਜਿਹੇ ਸਮੇਂ ਸਾਹਮਣੇ ਆਇਆ ਹੈ ਜਦੋਂ ਅਫ਼ਗ਼ਾਨਿਸਤਾਨ ਤੇ ਪਾਕਿ ਵਿਚਾਲੇ ਸੰਬੰਧ ਪਹਿਲਾਂ ਹੀ ਕਾਫ਼ੀ ਤਣਾਅਪੂਰਨ ਬਣੇ ਹੋਏ ਹਨ। ਦੋਵੇਂ ਦੇਸ਼ ਸਰਹੱਦ ਅਤੇ ਸੁਰੱਖਿਆ ਨਾਲ ਜੁੜੇ ਮੁੱਦਿਆਂ ਨੂੰ ਲੈ ਕੇ ਵਿਵਾਦ ’ਚ ਹਨ।