ਟੀ. ਟੀ. ਪੀ. ਦੇ ਡਰੋਨ ਹਮਲਿਆਂ ਤੋਂ ਬਚਣ ਲਈ ਪਾਕਿਸਤਾਨੀ ਪੁਲਿਸ ਦਾ ਅਨੋਖਾ ਜੁਗਾੜ
ਅੰਮ੍ਰਿਤਸਰ, 7 ਅਕਤੂਬਰ (ਸੁਰਿੰਦਰ ਕੋਛੜ)-ਉੱਤਰ-ਪੱਛਮੀ ਪਾਕਿਸਤਾਨ ਦੇ ਖ਼ੈਬਰ ਪਖ਼ਤੂਨਖ਼ਵਾ ਸੂਬੇ ’ਚ ਅੱਤਵਾਦੀ ਸਮੂਹਾਂ ਅਤੇ ਵਿਦਰੋਹੀ ਹਥਿਆਰਬੰਦ ਸਮੂਹ ਤਹਿਰੀਕ-ਏ-ਤਾਲਿਬਾਨ ਪਾਕਿਸਤਾਨ (ਟੀ. ਟੀ.
ਅੰਮ੍ਰਿਤਸਰ, 7 ਅਕਤੂਬਰ (ਸੁਰਿੰਦਰ ਕੋਛੜ)-ਉੱਤਰ-ਪੱਛਮੀ ਪਾਕਿਸਤਾਨ ਦੇ ਖ਼ੈਬਰ ਪਖ਼ਤੂਨਖ਼ਵਾ ਸੂਬੇ ’ਚ ਅੱਤਵਾਦੀ ਸਮੂਹਾਂ ਅਤੇ ਵਿਦਰੋਹੀ ਹਥਿਆਰਬੰਦ ਸਮੂਹ ਤਹਿਰੀਕ-ਏ-ਤਾਲਿਬਾਨ ਪਾਕਿਸਤਾਨ (ਟੀ. ਟੀ. ਪੀ.) ਵਲੋਂ ਕੀਤੇ ਜਾ ਰਹੇ ਘਾਤਕ ਡਰੋਨ ਹਮਲਿਆਂ ਦਾ ਮੁਕਾਬਲਾ ਕਰਨ ਲਈ ਪੁਲਿਸ ਨੇ ਇਕ ਸਸਤਾ ਤੇ ਦੇਸੀ ਤਰੀਕਾ ਅਪਣਾਇਆ ਹੈ। ਸੁਰੱਖਿਆ ਚੌਕੀਆਂ ਨੂੰ ਹਵਾਈ ਹਮਲਿਆਂ ਤੋਂ ਬਚਾਉਣ ਲਈ ਪੁਲਿਸ ਇਮਾਰਤਾਂ ਦੀਆਂ ਛੱਤਾਂ ਅਤੇ ਚਾਰਦੀਵਾਰੀ ਦੇ ਉੱਪਰ ਮੱਛੀ ਫੜਨ ਵਾਲੇ ਮਜ਼ਬੂਤ ਜਾਲ ਤਾਣ ਰਹੀ ਹੈ । ਦੱਸਿਆ ਜਾ ਰਿਹਾ ਹੈ ਕਿ ਅਫ਼ਗਾਨਿਸਤਾਨ ਸਰਹੱਦ ਤੋਂ ਕਰੀਬ 30 ਕਿਲੋਮੀਟਰ ਦੂਰ ਸਥਿਤ ਹੰਗੂ ਜ਼ਿਲ੍ਹੇ ਦੀ ਸਰਕੀ ਪਿਆਲਾ ਚੌਕੀ ’ਤੇ 3-4 ਮਹੀਨੇ ਪਹਿਲਾਂ ਤਹਿਰੀਕ-ਏ-ਤਾਲਿਬਾਨ ਪਾਕਿਸਤਾਨ ਨੇ ਵਿਸਫੋਟਕ ਲੱਦੇ ਡਰੋਨਾਂ ਨਾਲ ਹਮਲਾ ਕੀਤਾ ਸੀ, ਜਿਸ ਤੋਂ ਬਾਅਦ ਦੋਵੇਂ ਪਾਸਿਓਂ ਭਾਰੀ ਗੋਲੀਬਾਰੀ ਹੋਈ । ਇਸ ਖ਼ਤਰੇ ਨਾਲ ਨਜਿੱਠਣ ਲਈ ਪੁਲਿਸ ਨੇ ਚੌਕੀਆਂ ਦੇ ਉੱਪਰ ਰੱਸੀਆਂ ਅਤੇ ਤਾਰਾਂ ਦੇ ਸਹਾਰੇ ਕਾਲੇ ਜਾਲ ਦੀ ਇਕ ਹਵਾਈ ਛੱਤ ਬਣਾਈ ਹੈ। ਅਧਿਕਾਰੀਆਂ ਮੁਤਾਬਿਕ ਇਕ ਚੌਕੀ ’ਤੇ ਇਹ ਜਾਲ ਲਗਾਉਣ ਦਾ ਖ਼ਰਚਾ ਲਗਭਗ 4 ਲੱਖ ਪਾਕਿਸਤਾਨੀ ਰੁਪਏ ਆਉਂਦਾ ਹੈ।
