ਸਮਾਲਸਰ, 4 ਜੁਲਾਈ (ਗੁਰਜੰਟ ਕਲਸੀ ਲੰਡੇ)-ਬੀਤੇ ਕੱਲ੍ਹ ਥਾਣਾ ਸਮਾਲਸਰ ਅਧੀਨ ਪੈਂਦੇ ਪਿੰਡ ਰੋਡੇ ਦੀ ਵਸਨੀਕ ਇਕ ਲੜਕੀ ਹਰਲੀਨ ਕੌਰ (24 ਸਾਲ) ਵਲੋਂ ਖੁਦਕੁਸ਼ੀ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਲੜਕੀ ਦਾ ਮ੍ਰਿਤਕ ਸਰੀਰ ਰਾਤ ਨੂੰ ਤਕਰੀਬਨ 9.30 ਵਜੇ ਦੇ ਕਰੀਬ ਪਿੰਡ ਭਲੂਰ ਤੋਂ ਮਾਹਲਾ ਕਲਾਂ ਨੂੰ ਜਾਣ ਵਾਲੀ ਸੜਕ ’ਤੇ ਪੈਂਦੇ ਰਜਵਾਹੇ ਵਿਚੋਂ ਮਿਲੀ ਹੈ। ਇਸ ਸਬੰਧੀ ਸੁਖਮੰਦਰ ਸਿੰਘ ਪੁੱਤਰ ਭਾਗ ਸਿੰਘ ਦੇ ਬਿਆਨਾ ਉੱਪਰ ਯਾਦਵੀਰ ਸਿੰਘ ਉਰਫ ਜੋਗਾ ਪੁੱਤਰ ਸਤਨਾਮ ਸਿੰਘ ਪਿੰਡ ਰੋਡੇ ਦੇ ਖਿਲਾਫ ਧਾਰਾ 108 (306 ਆਈ. ਪੀ. ਸੀ.) ਅਧੀਨ ਥਾਣਾ ਸਮਾਲਸਰ ਵਿਖੇ ਮਾਮਲਾ ਦਰਜ ਕੀਤਾ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਦੀ ਲੜਕੀ ਹਰਲੀਨ ਕੌਰ ਐਡੀਸ਼ਨ ਆਇਲਟਸ ਸੈਂਟਰ ਬਾਘਾ ਪੁਰਾਣਾ ਵਿਖੇ ਪੜ੍ਹਨ ਲਈ ਗਈ ਸੀ ਪਰ ਉੱਥੇ ਨਹੀਂ ਪਹੁੰਚੀ। ਇਸ ਸਬੰਧੀ ਉਦੋਂ ਪਤਾ ਲੱਗਿਆ ਜਦ ਲੜਕੀ ਹਰਲੀਨ ਕੌਰ ਨੇ ਸੁਖਮਿੰਦਰ ਸਿੰਘ ਦੇ ਭਤੀਜੇ ਬੇਅੰਤ ਸਿੰਘ ਪੁੱਤਰ ਕੁਲਦੀਪ ਸਿੰਘ ਨੂੰ ਫੋਨ ਕਰਕੇ ਦੱਸਿਆ ਕਿ ਅੱਜ ਉਹ ਆਇਲਟਸ ਸੈਂਟਰ ਨਹੀਂ ਗਈ। ਉਸ ਨੇ ਡਰਦੇ ਮਾਰੇ ਰਜਵਾਹੇ ਵਿਚ ਛਾਲ ਮਾਰ ਕੇ ਆਤਮਹੱਤਿਆ ਕਰ ਲਈ ਹੈ।
