ਸੰਗਰੂਰ, 8 ਮਈ (ਅਮਨਦੀਪ ਸਿੰਘ ਬਿੱਟਾ) - ਜ਼ਿਲ੍ਹਾ ਕਾਂਗਰਸ ਐਸ.ਸੀ., ਐਸ.ਟੀ. ਵਿਭਾਗ ਦੇ ਚੇਅਰਮੈਨ ਚਮਕੌਰ ਸਿੰਘ ਜੱਸੀ ਕਰਤਾਰਪੁਰਾ ਦੀ ਅਗਵਾਈ ਹੇਠ ਜ਼ਿਲ੍ਹਾ ਅਧਿਕਾਰੀ ਰਾਹੀ ਮੁੱਖ ਮੰਤਰੀ ਪੰਜਾਬ ਨੂੰ ਮੰਗ ਪੱਤਰ ਦਿੱਤਾ ਗਿਆ | ਜੱਸੀ ਕਰਤਾਰਪੁਰਾ ਨੇ ਕਿਹਾ ਕਿ ਮਰਦਮਸ਼ੁਮਾਰੀ ਵਿੱਚ ਅਨੁਸੂਚਿਤ ਜਾਤੀਆਂ ਪ੍ਰਤੀ ਜਾਤੀ ਸੂਚਕ ਸ਼ਬਦ ਲਿਖਣ ਵਾਲੇ ਅਧਿਕਾਰੀਆਂ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਦੀ ਮੰਗ ਕਰਦਿਆਂ ਕਿਹਾ ਕਿ ਸਰਕਾਰ ਜਾਤੀ ਮਰਦਮਸ਼ੁਮਾਰੀ 2026 ਕਰਵਾ ਰਹੀ ਹੈ ਪਰ ਉਸ ਵਿੱਚ ਅਨੁਸੂਚਿਤ ਜਾਤੀ ਪ੍ਰਤੀ ਜਾਤੀ ਸੂਚਕ ਸ਼ਬਦਾਂ ਦੀ ਵਰਤੋਂ ਕੀਤੀ ਗਈ ਹੈ | ਆਗੂਆਂ ਅਨੁਸਾਰ ਇਸ ਨਾਲ ਅਨੁਸੂਚਿਤ ਜਾਤੀ ਵਰਗ ਵਿੱਚ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ | ਰੋਸ ਪ੍ਰਗਟ ਕਰਦਿਆਂ ਜੱਸੀ ਕਰਤਾਰਪੁਰਾ ਨੇ ਕਿਹਾ ਕਿ ਇਹ ਅਣਜਾਣੇ ਵਿੱਚ ਨਹੀਂ ਸਗੋਂ ਜਾਤੀਵਾਦ ਦਾ ਭੇਦਭਾਵ ਕਰਨ ਵਾਲੇ ਅਧਿਕਾਰੀ ਵੱਲੋਂ ਜਾਣਬੁੱਝ ਕੇ ਲਿਖਿਆ ਗਿਆ ਹੈ | ਅੱਜ ਦੇ ਸਮੇਂ ਵਿੱਚ ਜਦ ਹਰ ਵਿਅਕਤੀ ਇਸ ਗੱਲ ਤੋਂ ਭਲੀ-ਭਾਂਤ ਜਾਣੂ ਹੈ ਕਿ ਅਜਿਹੇ ਸ਼ਬਦ ਲਿਖਣ ਅਤੇ ਬੋਲਣਾ ਕਾਨੂੰਨੀ ਅਪਰਾਧ ਹੈ ਪਰੰਤੂ ਫਿਰ ਵੀ ਜਾਣਬੁੱਝ ਕੇ ਅਜਿਹਾ ਕੀਤਾ ਗਿਆ ਹੈ | ਉਨ੍ਹਾਂ ਮੰਗ ਕੀਤੀ ਕਿ ਸਬੰਧਿਤ ਅਧਿਕਾਰੀ ਖ਼ਿਲਾਫ਼ ਐਸ.ਸੀ., ਐਸ.ਟੀ. ਐਕਟ ਅਧੀਨ ਮੁਕੱਦਮਾ ਦਰਜ ਕੀਤਾ ਜਾਵੇ | ਇਸ ਦੇ ਨਾਲ ਹੀ ਸਬੰਧਿਤ ਅਧਿਕਾਰੀ ਨੂੰ ਮੁਅੱਤਲ ਕਰਨ ਦੀ ਵੀ ਮੰਗ ਕੀਤੀ ਗਈ ਹੈ | ਇਸ ਮੌਕੇ ਸੀਨੀਅਰ ਆਗੂ ਦਰਸ਼ਨ ਸਿੰਘ ਕਾਂਗੜਾ, ਡਾ. ਨਰੇਸ਼ ਰੰਗਾ, ਰਵੀ ਚਾਵਲਾ ਐਮ.ਸੀ., ਰਣਜੀਤ ਸਿੰਘ ਹੈਪੀ, ਰਣਬੀਰ ਸਿੰਘ, ਹਾਕਮ ਸਿੰਘ, ਸਕਤੀਜੀਤ ਸਿੰਘ, ਸਸੀ ਚਾਵਰੀਆ, ਭੀਮ ਸਿੰਘ ਧੂਰੀ, ਜਸਵੀਰ ਸਿੰਘ ਦਿੜ੍ਹਬਾ, ਬਾਬੂ ਲਾਲ ਰੰਗਾ, ਰਾਜੇਸ਼ ਕਾਲੀ, ਸੁਖਚੈਨ ਸਿੰਘ ਸੁਨਾਮ ਹਾਜ਼ਰ ਸਨ |
