ਸੰਗਰੂਰ, 14 ਮਈ (ਅਮਨਦੀਪ ਸਿੰਘ ਬਿੱਟਾ)- ਸ਼ੋ੍ਰਮਣੀ ਅਕਾਲੀ ਦਲ (ਅ) ਦੇ ਜ਼ਿਲ੍ਹਾ ਪ੍ਰਧਾਨ ਜਥੇਦਾਰ ਗੁਰਨੈਬ ਸਿੰਘ ਰਾਮਪੁਰਾ ਦੀ ਅਗਵਾਈ ਹੇਠ ਭਾਰਤ ਦੇ ਰਾਸ਼ਟਰਪਤੀ ਬੀਬੀ ਦ੍ਰੋਪਦੀ ਮੁਰਮੂ ਦੇ ਨਾਮ ਸੰਗਰੂਰ ਦੇ ਜੀ.ਏ.ਟੂ.ਡੀ.ਸੀ ਰਾਹੀਂ ਮੰਗ ਪੱਤਰ ਭੇਜਿਆ ਗਿਆ | ਜ਼ਿਲ੍ਹਾ ਭਰ ਤੋਂ ਪਾਰਟੀ ਦੇ ਆਗੂ ਅਤੇ ਕਾਰਕੁਨ ਗੁਰਦੁਆਰਾ ਸ੍ਰੀ ਮਹਿਲ ਮੁਬਾਰਕ ਵਿਖੇ ਤੜਕਸਾਰ ਤੋਂ ਹੀ ਇਕੱਤਰ ਹੋਣੇ ਸ਼ੁਰੂ ਹੋਏ, ਜਿੱਥੋਂ ਉਹ ਰੋਸ ਮਾਰਚ ਕਰਦੇ ਡੀ.ਸੀ ਦਫ਼ਤਰ ਪੁੱਜੇ ਅਤੇ ਇੱਥੇ ਰੋਸ ਧਰਨਾ ਦੇਣ ਉਪਰੰਤ ਜ਼ਿਲ੍ਹਾ ਅਧਿਕਾਰੀ ਨੂੰ ਮੰਗ ਪੱਤਰ ਦਿੱਤਾ ਗਿਆ | ਗੱਲਬਾਤ ਕਰਦਿਆਂ ਜਥੇਦਾਰ ਗੁਰਨੈਲ ਸਿੰਘ ਰਾਮਪੁਰਾ, ਬਹਾਦਰ ਸਿੰਘ ਭਸੌੜ, ਹਰਜੀਤ ਸਿੰਘ ਸੰਜੂਮਾ ਨੇ ਕਿਹਾ ਕਿ ਗਲਫ 'ਚ ਚੱਲ ਰਹੀ ਲੜਾਈ ਦੇ ਵਧਦੇ ਤਣਾਅ ਦੀ ਬਦੌਲਤ ਤੇਲ-ਡੀਜਲ, ਗੈਸ, ਖਾਣ ਪੀਣ ਦੀਆਂ ਵਸਤੂਆਂ 'ਚ ਵਧਦੀਆਂ ਕੀਮਤਾਂ ਕਾਲਾਬਾਜ਼ਾਰੀ, ਚੋਰ ਬਾਜ਼ਾਰੀ ਦੇ ਪ੍ਰਫੁਲਿਤ ਹੋ ਰਹੇ ਧੰਦੇ 'ਤੇ ਕਾਬੂ ਕਰਨ ਦੀ ਮੰਗ ਉਨ੍ਹਾਂ ਨੇ ਕੀਤੀ ਹੈ | ਇਸ ਤੋਂ ਇਲਾਵਾ ਗੁਰੂ ਸਾਹਿਬਾਨ ਦੀ ਸੋਚ ਅਨੁਸਾਰ ਬਰਾਬਰਤਾ ਦਾ ਰਾਜ ਪ੍ਰਬੰਧ ਵਾਲਾ ਹਲੀਮੀ ਰਾਜ ਕਾਇਮ ਕਰਨ ਦੀ ਮੰਗ ਵੀ ਪਾਰਟੀ ਨੇ ਉਠਾਉਂਦਿਆਂ ਕਿਹਾ ਕਿ ਵਧਦੀਆਂ ਕੀਮਤਾਂ ਨੇ ਮੱਧਵਰਗੀ ਅਤੇ ਗਰੀਬ ਵਰਗ ਦੀ ਹਾਲਤ ਨੂੰ ਕਾਫੀ ਪ੍ਰਭਾਵਿਤ ਕਰ ਦਿੱਤਾ ਹੈ | ਵਧਦੀ ਮਹਿੰਗਾਈ, ਕਾਨੂੰਨੀ ਵਿਵਸਥਾ ਦੀ ਵਿਗੜਦੀ ਹਾਲਤ ਪੰਜਾਬ ਦੇ ਛੋਟੇ, ਵੱਡੇ ਉਦਯੋਗਾਂ ਦੇ ਹੋ ਰਹੇ ਨੁਕਸਾਨ ਨੂੰ ਖ਼ਤਮ ਹੋਣ 'ਤੇ ਵੀ ਚਿੰਤਾ ਦਾ ਪ੍ਰਗਟਾਵਾ ਕੀਤਾ ਗਿਆ ਹੈ | ਡੀ.ਸੀ ਦਫ਼ਤਰ ਬਾਹਰ ਇਸ ਪ੍ਰਦਰਸ਼ਨ ਮੌਕੇ ਬਹਾਦਰ ਸਿੰਘ ਭਸੌੜ, ਬੀਬੀ ਹਰਪਾਲ ਕੌਰ ਕਰਤਾਰਪੁਰਾ, ਜਥੇਦਾਰ ਹਰਜੀਤ ਸਿੰਘ ਸੰਜੂਮਾ, ਸਤਨਾਮ ਸਿੰਘ ਰੱਤੋਕੇ, ਗੁਰਮੀਤ ਸਿੰਘ ਡਸਕਾ, ਗੁਰਚਰਨ ਸਿੰਘ ਭਸੌੜ, ਜਗਰੂਪ ਸਿੰਘ ਭਸੌੜ, ਸੁਖਵਿੰਦਰ ਸਿੰਘ ਸ਼ਹਿਰੀ ਪ੍ਰਧਾਨ, ਡਾ. ਹਰਵਿੰਦਰ ਸਿੰਘ, ਚੰਦ ਸਿੰਘ ਬੀਰ ਕਲਾਂ, ਜਥੇਦਾਰ ਨਰਿੰਦਰ ਸਿੰਘ ਕਾਲਾਬੂਲਾ, ਹਰਸਿਮਰਨ ਸਿੰਘ ਕਾਂਝਲਾ, ਸਾਧੂ ਸਿੰਘ ਧੇਧਨੀ, ਰਾਮ ਸਿੰਘ ਚੰਗਾਲ, ਹਰਭਾਗ ਸਿੰਘ , ਗੁਰਚਰਨ ਸਿੰਘ, ਕਾਕੂ ਸਿੰਘ ਖਿੱਲਰੀਆਂ, ਸੁਖਚੈਨ ਸਿੰਘ ਡਸਕਾ, ਸੁਖਮਨਪ੍ਰੀਤ ਸਿੰਘ, ਜਗਦੀਪ ਸਿੰਘ, ਮਾਸਟਰ ਹਰਬਖਸ ਸਿੰਘ ਸੁਨਾਮ ਮੌਜੂਦ ਸਨ |
