ਜ਼ੀਰਾ, 6 ਜੂਨ (ਰਜਨੀਸ਼ ਕਥੂਰੀਆ)-ਪਿੰਡ ਮਹੀਆਂਵਾਲਾ ਕਲਾਂ ਵਿਖੇ ਜਾਂਦੀ ਸੜਕ 'ਤੇ ਸਥਿਤ ਪਿੰਡ ਦੇ ਐਂਟਰੀ ਗੇਟ ਦੇ ਨਾਲ ਨੈਸ਼ਨਲ ਹਾਈਵੇ ਨੰਬਰ-54 ਤੇ ਭਗਤ ਦੁਨੀ ਚੰਦ ਸਮਾਧੀ ਕਮੇਟੀ ਵਲੋਂ ਉਸਾਰੇ ਗਏ ਆਰਜ਼ੀ ਬੱਸ ਸਟੈਂਡ ਨੂੰ ਢਾਹੁਣ ਪਿੱਛੇ ਪਿੰਡ ਦੇ ਸਰਪੰਚ, ਭਗਤ ਦੁਨੀ ਚੰਦ ਸਮਾਧੀ ਕਮੇਟੀ ਮਹੀਆਂਵਾਲਾ ਕਲਾਂ ਦੇ ਆਗੂਆਂ, ਰਾਜਨੀਤਿਕ ਪਾਰਟੀਆਂ ਅਤੇ ਕੁਝ ਹੋਰ ਜਥੇਬੰਦੀਆਂ ਦੇ ਨੁਮਾਇੰਦਿਆਂ ਵਲੋਂ ਭਾਰਤੀ ਜਨਤਾ ਪਾਰਟੀ ਦੇ ਹਲਕਾ ਜ਼ੀਰਾ ਦੇ ਇੰਚਾਰਜ ਅਵਤਾਰ ਸਿੰਘ ਜ਼ੀਰਾ ਦਾ ਹੱਥ ਹੋਣ ਸਬੰਧੀ ਲਗਾਏ ਗਏ ਦੋਸ਼ਾਂ ਦੇ ਸਬੰਧ ਵਿਚ ਆਪਣੇ ਸੋਸ਼ਲ ਮੀਡੀਆ ਪੇਜ 'ਤੇ ਲਾਈਵ ਹੋ ਕੇ ਕਿਹਾ ਹੈ ਕਿ ਜਿਸ ਦਿਨ ਇਹ ਪ੍ਰੋਗਰਾਮ ਸ਼ੁਰੂ ਹੋਇਆ ਸਾਡਾ ਵਾਰਡ ਨੰਬਰ 17 ਜੋ ਕਿ ਬੀ.ਸੀ.ਵਰਗ ਨਾਲ ਸੰਬੰਧਿਤ ਵਾਰਡ ਹੈ,ਵਿਚ ਚੋਣਾਂ ਦੀ ਪ੍ਰਕਿਰਿਆ ਚੱਲ ਰਹੀ ਸੀ | ਉਹਨਾਂ ਨੇ ਦੱਸਿਆ ਕਿ ਸਾਡਾ ਚੋਣ ਦਫਤਰ ਕਾਕਾ ਜੇ.ਸੀ.ਬੀ.ਵਾਲੇ ਦੇ ਦਫਤਰ ਵਿਚ ਸੀ ਅਤੇ ਮੈਨੂੰ ਕਾਕੇ ਦਾ ਫੋਨ ਆਇਆ ਕਿ ਸਾਡੀ ਪਿੰਡ ਮਹੀਆਂਵਾਲਾ ਕਲਾਂ ਵਿਖੇ ਸਥਿਤ ਜ਼ਮੀਨ ਦੇ ਅੱਗੇ ਪਿੰਡ ਵਾਸੀ ਬੱਸ ਸਟੈਂਡ ਦਾ ਕਮਰਾ ਬਣਾ ਰਹੇ ਹਨ | ਉਹਨਾਂ ਦੱਸਿਆ ਕਿ ਮੈਂ ਪਿੰਡ ਮਹੀਆਂਵਾਲਾ ਕਲਾਂ ਦੇ ਸਰਪੰਚ ਗੁਰਪ੍ਰੀਤ ਸਿੰਘ ਗੋਰੀ ਨੂੰ ਫੋਨ ਕੀਤਾ , ਨੇ ਦੱਸਿਆ ਕਿ ਅਸੀਂ ਬੱਸ ਸਟੈਂਡ ਬਣਾਉਣ ਲਈ ਕਮਰਾ ਬਣਾਉਣ ਲੱਗੇ ਹਾਂ ਤਾਂ ਮੈਂ ਉਹਨਾਂ ਨੂੰ ਕਿਹਾ ਕਿ ਚੋਣਾਂ ਵਿਚ 2 ਦਿਨ ਬਾਕੀ ਰਹਿ ਗਏ ਹਨ ਤੁਸੀਂ ਰੁਕ ਜਾਵੋ | ਉਸ ਤੋਂ ਬਾਅਦ ਤੁਸੀਂ ਬੈਠ ਕੇ ਮਸਲਾ ਹੱਲ ਕਰ ਲੈਣਾ | ਉਨ੍ਹਾਂ ਕਿਹਾ ਕਿ ਇਸ ਤੋਂ ਬਾਅਦ ਬੱਸ ਸਟੈਂਡ ਬਣਾਉਣ ਦੇ ਮਾਮਲੇ ਵਿੱਚ ਨਾ ਤਾਂ ਮੈਨੂੰ ਕਾਕੇ ਜੇ. ਸੀ.ਬੀ.ਵਾਲੇ ਦਾ ਕੋਈ ਫੋਨ ਆਇਆ,ਨਾ ਹੀ ਸਰਪੰਚ ਦਾ ਕੋਈ ਫੋਨ ਆਇਆ ਅਤੇ ਨਾ ਹੀ ਮੈਂ ਇਸ ਸਬੰਧ ਵਿਚ ਕਿਸੇ ਅਫਸਰ ਨੂੰ ਕੋਈ ਫੋਨ ਕੀਤਾ | ਉਹਨਾਂ ਕਿਹਾ ਕਿ ਪਿੰਡ ਵਾਸੀਆਂ,ਕੁਝ ਰਾਜਨੀਤਿਕ ਪਾਰਟੀਆਂ ਅਤੇ ਕੁਝ ਹੋਰ ਜਥੇਬੰਦੀਆਂ ਦੇ ਨੁਮਾਇੰਦਿਆਂ ਵਲੋਂ ਉਕਤ ਮਾਮਲੇ ਨੂੰ ਲੈ ਕੇ ਮੈਨੂੰ ਨਾਜਾਇਜ਼ ਬਦਨਾਮ ਕੀਤਾ ਜਾ ਰਿਹਾ ਹੈ |
