ਜਗਰਾਉਂ, 27 ਮਾਰਚ (ਸ਼ਮਸ਼ੇਰ ਸਿੰਘ ਗਾਲਿਬ)-ਜਗਰਾਉਂ ਬੱਸ ਅੱਡਾ ਚੌਕ 'ਚ ਦਹਾਕਿਆਂ ਤੋਂ ਰੇਹੜੀ ਫੜ੍ਹੀ ਲਾ ਕੇ ਰੋਟੀ ਦਾ ਜੁਗਾੜ ਕਰ ਰਹੇ ਗਰੀਬ ਮਜ਼ਦੂਰ ਕਿਸੇ ਅਣਕਿਆਸੀ ਸੰਭਾਵਿਤ ਉਜਾੜਾ ਕਾਰਵਾਈ ਤੋਂ ਡਾਢੇ ਪ੍ਰੇਸ਼ਾਨ ਚੱਲ ਰਹੇ ਸਨ | ਬੀਤੇ ਦਿਨੀਂ ਨੈਸ਼ਨਲ ਹਾਈਵੇ ਅਥਾਰਟੀ ਦੇ ਲੁਧਿਆਣਾ ਦਫ਼ਤਰ ਵਲੋਂ ਭੇਜੇ ਨੋਟਿਸ ਰਾਹੀਂ ਉਨਾਂ ਨੂੰ ਸੜਕ ਤੋਂ ਹਟਣ ਲਈ ਹੁਕਮ ਦਿੱਤਾ ਗਿਆ ਹੈ | ਇਸ ਸਬੰਧੀ ਅੱਜ ਇੱਥੇ ਰੇਹੜੀ ਫੜ੍ਹੀ ਮਜ਼ਦੂਰ ਯੂਨੀਅਨ ਦਾ ਵਫ਼ਦ ਇਨਕਲਾਬੀ ਕੇਂਦਰ ਪੰਜਾਬ ਦੇ ਆਗੂ ਕੰਵਲਜੀਤ ਖੰਨਾ ਦੀ ਅਗਵਾਈ 'ਚ ਸਥਾਨਕ ਐੱਸ. ਡੀ. ਐੱਮ. ਮੈਡਮ ਉਪਿੰਦਰਜੀਤ ਕੌਰ ਨੂੰ ਮਿਲਿਆ | ਵਫ਼ਦ ਨੇ ਦੱਸਿਆ ਕਿ ਉਨਾਂ ਵਲੋਂ ਸੜਕ 'ਤੇ ਕੋਈ ਕਬਜ਼ਾ ਨਹੀਂ ਕੀਤਾ ਹੋਇਆ ਸਗੋਂ ਉਹ ਤਾਂ ਇਸ ਸਰਵਿਸ ਲੇਨ 'ਤੇ ਬਣੇ ਨਿਕਾਸੀ ਨਾਲੇ ਤੋਂ ਪਿੱਛੇ ਬੈਠ ਕੇ ਕਿੱਤਾ ਕਰਦੇ ਹਨ | ਇਸ ਨਾਲ ਟ੍ਰੈਫ਼ਿਕ 'ਚ ਬਿਲਕੁਲ ਕੋਈ ਵਿਘਨ ਨਹੀਂ ਪੈਂਦਾ | ਉਨ੍ਹਾਂ ਸਿਵਲ ਅਧਿਕਾਰੀ ਤੋਂ ਸਬੰਧਤ ਵਿਭਾਗ ਨੂੰ ਕਿਸੇ ਵੀ ਤਰਾਂ ਦੀ ਉਜਾੜਾ ਕਾਰਵਾਈ ਨੂੰ ਰੋਕਣ ਦੀ ਮੰਗ ਕੀਤੀ | ਸਿਵਲ ਅਧਿਕਾਰੀ ਨੇ ਅਪਣੇ ਪੱਧਰ 'ਤੇ ਮਸਲਾ ਹੱਲ ਕਰਨ ਦਾ ਵਿਸ਼ਵਾਸ ਦਿਵਾਇਆ | ਇਸ ਸਮੇਂ ਪੇਂਡੂ ਮਜ਼ਦੂਰ ਯੂਨੀਅਨ ਦੇ ਆਗੂ ਸੁਖਦੇਵ ਸਿੰਘ ਮਾਣੂੰਕੇ, ਮਲਕੀਤ ਸਿੰਘ ਪ੍ਰਧਾਨ, ਸੁਖਦੇਵ ਰਾਜ ਸਕੱਤਰ ਆਦਿ ਵੱਡੀ ਗਿਣਤੀ 'ਚ ਮਜ਼ਦੂਰ ਹਾਜ਼ਰ ਸਨ |
