ਹਰਲੇਮ ਬਾਸਕਟਬਾਲ ਟੂਰਨਾਮੈਂਟ ’ਚ ਗੋਲੀਬਾਰੀ, ਸਾਬਕਾ ਕਾਲਜ ਸਟਾਰ ਕਿਨੂ ਰੌਚਫੋਰਡ ਦੀ ਮੌਤ

ਨਿਊਯਾਰਕ, 12 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਹਰਲੇਮ ਵਿਚ ਚੱਲ ਰਹੇ ਇੱਕ ਭੀੜਭਾੜ ਵਾਲੇ ਬਾਸਕਟਬਾਲ ਟੂਰਨਾਮੈਂਟ ਦੌਰਾਨ ਹੋਈ ਗੋਲੀਬਾਰੀ ’ਚ ਸਾਬਕਾ ਕਾਲਜ ਤੇ ਯੂਰਪੀ ਪੇਸ਼ੇਵਰ ਖਿਡਾਰੀ ਕਿਨੂ ਰੌਚਫੋਰਡ ਦੀ ਮੌਤ ਹੋ ਗਈ, ਜਦਕਿ ਇਕ ਮਰਦ ਤੇ ਇਕ ਔਰਤ ਜ਼ਖ਼ਮੀ ਹੋਏ ਹਨ। ਪੁਲਿਸ ਮੁਤਾਬਕ ਘਟਨਾ ਸ਼ੁੱਕਰਵਾਰ ਰਾਤ ਲਗਭਗ ਸਾਢੇ 10 ਵਜੇ ਲੈਨਾਕਸ ਐਵੇਨਿਊ ਸਥਿਤ ਮਾਰਟਿਨ ਲੂਥਰ ਕਿੰਗ ਜੂਨੀਅਰ ਟਾਵਰਜ਼ ਦੇ ਬਾਸਕਟਬਾਲ ਕੋਰਟ ਨੇੜੇ ਵਾਪਰੀ। ਉਸ ਵੇਲੇ ਉੱਥੇ ਕਿੰਗਡੋਮ ਬਾਸਕਟਬਾਲ ਟੂਰਨਾਮੈਂਟ ਦੇ ਮੈਚ ਚੱਲ ਰਹੇ ਸਨ ਅਤੇ ਲਗਭਗ 500 ਲੋਕ ਮੌਜੂਦ ਸਨ। 35 ਸਾਲਾ ਰੌਚਫੋਰਡ ਦੇ ਸਿਰ ’ਚ ਗੋਲੀ ਲੱਗੀ। ਐਮਰਜੈਂਸੀ ਕਰਮਚਾਰੀਆਂ ਨੇ ਮੌਕੇ ’ਤੇ ਉਨ੍ਹਾਂ ਨੂੰ ਬਚਾਉਣ ਦੀ ਕੋਸ਼ਿਸ਼ ਕੀਤੀ ਅਤੇ ਹਸਪਤਾਲ ਲਿਜਾਇਆ ਗਿਆ, ਪਰ ਡਾਕਟਰ ਉਨ੍ਹਾਂ ਦੀ ਜਾਨ ਨਹੀਂ ਬਚਾ ਸਕੇ। ਇਸ ਗੋਲੀਬਾਰੀ ਵਿੱਚ 28 ਸਾਲਾ ਵਿਅਕਤੀ ਦੀ ਲੱਤ ’ਚ ਤੇ 22 ਸਾਲਾ ਔਰਤ ਦੀ ਬਾਂਹ ਵਿਚ ਗੋਲੀ ਲੱਗੀ। ਦੋਵਾਂ ਨੂੰ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ ਹੈ, ਜਿੱਥੇ ਉਨ੍ਹਾਂ ਦੀ ਹਾਲਤ ਸਥਿਰ ਦੱਸੀ ਜਾ ਰਹੀ ਹੈ। ਪੁਲਿਸ ਸਰੋਤਾਂ ਅਨੁਸਾਰ, ਸ਼ੁਰੂਆਤੀ ਜਾਂਚ ਵਿੱਚ ਇਹ ਮਾਮਲਾ ਨਿਸ਼ਾਨਾ ਬਣਾ ਕੇ ਕੀਤੇ ਹਮਲੇ ਵਜੋਂ ਵੇਖਿਆ ਜਾ ਰਿਹਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਰੌਚਫੋਰਡ ਦਾ ਕਿਸੇ ਹੋਰ ਵਿਅਕਤੀ ਨਾਲ ਝਗੜਾ ਚੱਲ ਰਿਹਾ ਸੀ, ਹਾਲਾਂਕਿ ਉਸ ਵਿਵਾਦ ਦਾ ਕਾਰਨ ਅਜੇ ਸਪਸ਼ਟ ਨਹੀਂ ਹੋਇਆ। ਕੁਝ ਗਵਾਹਾਂ ਨੇ ਦਾਅਵਾ ਕੀਤਾ ਕਿ ਰੌਚਫੋਰਡ ਨੂੰ ਜ਼ਮੀਨ ’ਤੇ ਡਿੱਗਣ ਤੋਂ ਬਾਅਦ ਵੀ ਦੁਬਾਰਾ ਗੋਲੀ ਮਾਰੀ ਗਈ, ਪਰ ਪੁਲਿਸ ਨੇ ਇਸ ਗੱਲ ਦੀ ਅਧਿਕਾਰਕ ਪੁਸ਼ਟੀ ਨਹੀਂ ਕੀਤੀ।
ਫਿਲਹਾਲ ਕੋਈ ਗ੍ਰਿਫ਼ਤਾਰੀ ਨਹੀਂ ਹੋਈ ਤੇ ਹਮਲਾਵਰ ਦੀ ਭਾਲ ਜਾਰੀ ਹੈ। ਪੁਲਿਸ ਮਾਮਲੇ ਦੇ ਮਕਸਦ ਤੇ ਘਟਨਾ ਤੋਂ ਪਹਿਲਾਂ ਹੋਏ ਸੰਭਾਵਿਤ ਵਿਵਾਦ ਦੀ ਜਾਂਚ ਕਰ ਰਹੀ ਹੈ।