ਦੁਬਈ, 25 ਜਨਵਰੀ (ਏਜੰਸੀ)-ਸਾਊਦੀ ਅਰਬ ਉਲੰਪਿਕ ਕਮੇਟੀ ਤੇ ਉਲੰਪਿਕ ਕੌਂਸਲ ਆਫ਼ ਏਸ਼ੀਆ 2029 ਏਸ਼ੀਆਈ ਸਰਦੀਆਂ ਦੀਆਂ ਖੇਡਾਂ ਨੂੰ ਅਣਮਿੱਥੇ ਸਮੇਂ ਲਈ ਮੁਲਤਵੀ ਕਰਨ 'ਤੇ ਸਹਿਮਤ ਹੋ ਗਏ ਹਨ | ਖੇਡਾਂ ਸਾਊਦੀ ਅਰਬ ਦੇ ਭਵਿੱਖਵਾਦੀ ਸ਼ਹਿਰ ਪ੍ਰੋਜੈਕਟ 'ਨਿਓਮ' ਦੇ ਇਕ ਪਹਾੜੀ ਰਿਜ਼ੋਰਟ 'ਚ ਹੋਣੀਆਂ ਸਨ | ਉਲੰਪਿਕ ਕੌਂਸਲ ਆਫ਼ ਏਸ਼ੀਆ ਨੇ ਇਕ ਬਿਆਨ 'ਚ ਕਿਹਾ ਕਿ ਦੋਵੇਂ ਸੰਗਠਨ ਖੇਡਾਂ ਦੀ ਮੇਜ਼ਬਾਨੀ ਲਈ ਭਵਿੱਖ ਲਈ ਅੱਪਡੇਟ ਕੀਤੇ ਢਾਂਚੇ 'ਤੇ ਸਹਿਮਤ ਹੋਏ ਹਨ ਤੇ ਖੇਡਾਂ ਨੂੰ ਮੁਲਤਵੀ ਕਰ ਦਿੱਤਾ ਜਾਵੇਗਾ ਤੇ ਬਾਅਦ 'ਚ ਐਲਾਨ ਕੀਤੇ ਜਾਣ ਦੀ ਮਿਤੀ 'ਤੇ ਕਰਵਾਈਆਂ ਜਾਣਗੀਆਂ | ਜ਼ਿਕਰਯੋਗ ਹੈ ਕਿ ਬਿਆਨ 'ਚ ਮੁਲਤਵੀ ਕਰਨ ਦਾ ਕੋਈ ਕਾਰਨ ਨਹੀਂ ਦੱਸਿਆ ਗਿਆ | ਇਸ ਦੀ ਬਜਾਏ, ਸਾਊਦੀ ਅਰਬ ਆਉਣ ਵਾਲੇ ਸਾਲਾਂ 'ਚ ਵੱਖ-ਵੱਖ ਸਰਦੀਆਂ ਦੀਆਂ ਖੇਡਾਂ ਦੇ ਟੂਰਨਾਮੈਂਟਾਂ ਦੀ ਇਕ ਲੜੀ ਦੀ ਮੇਜ਼ਬਾਨੀ ਕਰੇਗਾ |
