ਮਿਲਾਨ, 11 ਜੁਲਾਈ (ਹਰਦੀਪ ਸਿੰਘ ਕੰਗ)-ਇਟਲੀ ਵਿੱਚ ਵੱਸਦੇ ਇੱਕ ਪੰਜਾਬੀ ਨੌਜਵਾਨ ਗਗਨਦੀਪ ਸਿੰਘ ਨੇ ਇੱਕ ਵੱਡੀ ਪ੍ਰਾਪਤੀ ਕਰਦਿਆਂ ‘ਮੈਡੀਸਨ ਅਤੇ ਸਰਜਰੀ’ ਅਤੇ ‘ਬਾਇਓਮੈਡੀਕਲ ਇੰਜੀਨੀਅਰਿੰਗ’ ਵਿੱਚ ਡਬਲ ਡਿਗਰੀ ਹਾਸਲ ਕੀਤੀ ਹੈ ਗਗਨਦੀਪ ਨੇ ਹਿਊਮੈਨਿਟਾਸ ਯੂਨੀਵਰਸਿਟੀ ਮਿਲਾਨ ਅਤੇ ਪੌਲੀਟੈਕਨੀਕੋ ਡੀ ਮਿਲਾਨੋ ਦੇ ਸਾਂਝੇ ਮੈੱਡ ਟੈੱਕ ਪ੍ਰੋਗਰਾਮ ਤਹਿਤ ਆਪਣੀ ਪੜ੍ਹਾਈ ਪੂਰੀ ਕੀਤੀ ਹੈ। 6 ਸਾਲਾਂ ਦੇ ਇਸ ਸਫਰ ਦੌਰਾਨ, ਗਗਨਦੀਪ ਨੇ 40 ਪ੍ਰੀਖਿਆਵਾਂ ਪਾਸ ਕੀਤੀਆਂ, ਵੱਖ-ਵੱਖ ਹਸਪਤਾਲਾਂ ਵਿੱਚ ਇੰਟਰਨਸ਼ਿਪ ਕੀਤੀ ਅਤੇ ਆਪਣਾ ਥੀਸਿਸ ਮੁਕੰਮਲ ਕਰਕੇ ਕੁੱਲ 390 ਕ੍ਰੈਡਿਟ ਹਾਸਲ ਕੀਤੇ। ਮੂਲ ਰੂਪ ਵਿੱਚ ਸ਼੍ਰੀ ਹਰਗੋਬਿੰਦਪੁਰ (ਪੰਜਾਬ) ਦੇ ਰਹਿਣ ਵਾਲੇ ਗਗਨਦੀਪ ਨੇ 2019 ਵਿੱਚ ਭਾਰਤ ਤੋਂ 12ਵੀਂ ਜਮਾਤ ਪਾਸ ਕੀਤੀ ਸੀ। ਹੁਣ ਉਹ ਇਟਲੀ ਦੇ ਮੈਡੀਲੀਆ (ਮਿਲਾਨ) ਵਿਖੇ ਆਪਣੇ ਪਿਤਾ ਜਸਪਾਲ ਸਿੰਘ ਅਤੇ ਮਾਤਾ ਹਰਵਿੰਦਰ ਕੌਰ ਨਾਲ ਰਹਿ ਰਹੇ ਹਨ। ਆਪਣੀ ਇਸ ਡਬਲ ਗ੍ਰੈਜੂਏਸ਼ਨ ਤੋਂ ਬਾਅਦ, ਉਹ ਹੁਣ ਇਟਲੀ ਵਿੱਚ ਹੀ ਆਪਣੀ ਮੈਡੀਕਲ ਸਪੈਸ਼ਲਾਈਜ਼ੇਸ਼ਨ ਦੀ ਟ੍ਰੇਨਿੰਗ ਸ਼ੁਰੂ ਕਰਨ ਦੀ ਯੋਜਨਾ ਬਣਾ ਰਹੇ ਹਨ। ਅਸੀਂ ਡਾ. ਗਗਨਦੀਪ ਸਿੰਘ ਅਤੇ ਉਨ੍ਹਾਂ ਦੇ ਪਰਿਵਾਰ ਨੂੰ ਇਸ ਸ਼ਾਨਦਾਰ ਸਫਲਤਾ ‘ਤੇ ਬਹੁਤ-ਬਹੁਤ ਮੁਬਾਰਕਬਾਦ ਦਿੰਦੇ ਹਾਂ ਅਤੇ ਉਨ੍ਹਾਂ ਦੇ ਉੱਜਵਲ ਭਵਿੱਖ ਦੀ ਕਾਮਨਾ ਕਰਦੇ ਹਾਂ।
